ກົດໝາຍວ່າດ້ວຍ ການປົກປ້ອງຜົນກະທົບ ຈາກການນຳເຂົ້າສິນຄ້າ, ຊຶ່ງເປັນກົດໝາຍສ້າງໃໝ່ ຄາດວ່າຈະນຳເອົາ ຜົນປະໂຫຍດມາສູ່ ສປປ ລາວ ຢ່າງຫລວງຫລາຍ ໂດຍສະເພາະ ແມ່ນການຮັກສາສະຖຽນລະພາບ ທາງດ້ານເສດຖະກິດ ແລະ ເຮັດໃຫ້ໜໍ່ແໜງການຜະລິດພາຍ ໃນມີການຂະຫຍາຍຕົວ.
ກົດໝາຍສະບັບນີ້, ສະເໜີໂດຍທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ຢູ່ທີ່ ຂອງສະພາແຫ່ງຊາດ ຊຸດທີ VIII ໃນວັນທີ 30 ຕຸລາ ຊຶ່ງສະມາຊິກສະພາ ກໍໄດ້ປະກອບຄໍາຄິດຄໍາເຫັນ ຢ່າງກົງໄປກົງມາ, ເນື່ອງຈາກວ່າກົດໝາຍສະບັບນີ້ ສ້າງຂຶ້ນເພື່ອປົກປ້ອງ ຜູ້ຜະລິດ ສິນຄ້າພາຍໃນ ພາຍໃຕ້ເງື່ອນໄຂ ການເຊື່ອມໂຍງເສດຖະກິດ ກັບພາກພື້ນ ແລະ ສາກົນ, ພ້ອມທັງເປັນການ ສ້າງເງື່ອນໄຂ ໃຫ້ຜູ້ຜະລິດສິນຄ້າພາຍໃນ ໄດ້ປັບປຸງໂຕເອງ ໃຫ້ມີຄວາມເຂັ້ມແຂງ, ເຕີບໃຫຍ່ຂະຫຍາຍຕົວ ແລະ ສາມາດແຂ່ງຂັນກັບ ການນຳເຂົ້າສິນຄ້າ ເພື່ອປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມຂອງຊາດ.
ພາຍຫລັງ ທີ່ສະພາແຫ່ງຊາດຮັບຮອງ ແລະ ປະກາດໃຊ້ ຢ່າງເປັນທາງການແລ້ວ, ກົດໝາຍສະບັບດັ່ງກ່າວ, ຈະເຮັດໃຫ້ ນັກລົງທຶນ ທັງພາຍໃນ ແລະ ຕ່າງປະເທດ ມີຄວາມເຊື່ອໝັ້ນ ໃນການລົງທຶນ, ດຳເນີນທຸລະກິດ ແລະ ການຜະລິດ ຢູ່ ສປປ ລາວ, ໂດຍສະເພາະແມ່ນ ວິສາຫະກິດຂະໜາດນ້ອຍ ແລະ ກາງ ທີ່ມີຄວາມສາມາດແຂ່ງຂັນ ກັບສິນຄ້ານຳເຂົ້າ, ພ້ອມທັງເຮັດໃຫ້ ຜູ້ຜະລິດສິນຄ້າພາຍໃນ ໄດ້ຮັບການປົກປ້ອງ ຈາກລະບຽບກົດໝາຍ ໃນເວລາທີ່ຕົນເອງ ໄດ້ຮັບຜົນກະທົບ ຈາກການນຳເຂົ້າສິນຄ້າ ແລະ ເຮັດໃຫ້ສິນຄ້າ ທີ່ຜະລິດຢູ່ພາຍໃນ ສປປ ລາວ ໄດ້ຮັບການພັດທະນາດີຂຶ້ນ, ສາມາດແຂ່ງຂັນກັບສິນຄ້ານຳເຂົ້າ ແລະ ສົ່ງອອກໄປສູ່ຕະຫລາດ ພາກພື້ນ ແລະ ສາກົນ ລວມທັງເປັນການສົ່ງເສີມ ສີມືແຮງງານ ກໍຄື ການນຳໃຊ້ນະວັດຕະກຳໃໝ່ ເຂົ້າໃນການຜະລິດ.
ການປົກປ້ອງຜົນກະທົບ ຈາກການນຳເຂົ້າສິນຄ້າ ແມ່ນການນຳໃຊ້ ມາດຕະການທາງດ້ານພາສີ ຫລື ການກຳນົດ ປະລິມານການນຳເຂົ້າ ໃນໄລຍະເວລາໃດໜຶ່ງ ເພື່ອປົກປ້ອງ ຜູ້ຜະລິດສິນຄ້າພາຍໃນ ທີ່ໄດ້ຮັບຄວາມເສຍຫາຍ ຢ່າງຫລວງຫລາຍ ຫລື ມີໄພຂົ່ມຂູ່ທີ່ຈະກໍ່ໃຫ້ເກີດ ຄວາມເສຍຫາຍຢ່າງຫລວງຫລາຍ ຈາກການນຳເຂົ້າ ສິນຄ້າທີ່ ເພີ່ມຂຶ້ນນັ້ນ ໃຫ້ສາມາດປັງປຸງຕົນເອງ ແລະ ແຂ່ງຂັນໄດ້.
ການສ້າງກົດໝາຍວ່າດ້ວຍ ການປົກປ້ອງຜົນກະທົບ ຈາກການນຳເຂົ້າສິນຄ້າ ແມ່ນປະຕິບັດຕາມພັນທະ ຂອງການເຂົ້າເປັນສະມາຊິກ ຂອງອົງການການຄ້າໂລກ ເຊິ່ງໄດ້ກຳນົດເງື່ອນໄຂ ພາຍຫລັງ ເຂົ້າເປັນສະມາຊິກ ອົງການການຄ້າໂລກແລ້ວ ລັດຖະບານລາວ ຕ້ອງສ້າງກົດໝາຍດັ່ງກ່າວ ໃຫ້ສຳເລັດພາຍໃນ 5 ປີ ຫລັງການເຂົ້າເປັນ ສະມາຊິກສົມບູນ, ໝາຍຄວາມວ່າ ສປປ ລາວ ຕ້ອງສ້າງກົດໝາຍສະບັບນີ້ ໃຫ້ສຳເລັດກ່ອນ ວັນທີ 2 ກຸມພາ 2018. ກົດໝາຍສະບັບດັ່ງກ່າວ, ຈະບໍ່ສາມາດສ້າງເປັນນິຕິກຳລຸ່ມກົດໝາຍໄດ້ ເພາະໄດ້ກຳນົດມາດຕະການ ຂຶ້ນອັດຕາພາສີຕໍ່ສິນຄ້ານຳເຂົ້າ ທີ່ສ້າງຜົນກະທົບ ຕໍ່ສິນຄ້າຜະລິດຕະພັນພາຍໃນ. ສະຫລຸບລວມແລ້ວ ການສ້າງກົດໝາຍ ສະບັບດັ່ງກ່າວ, ແມ່ນມີຄວາມຈຳເປັນຢ່າງຍິ່ງ ເພື່ອເປັນເຄື່ອງມືທີ່ສຳຄັນ ໃນການປົກປ້ອງ ຜູ້ຜະລິດສິນຄ້າຢູ່ ສປປ ລາວ ໃຫ້ສາມາດແຂ່ງຂັນກັບ ສິນຄ້ານຳເຂົ້າ ແລະ ອື່ນໆ.
ທ່ານ ນາງ ເຂັມມະນີ ພົນເສນາ ໃຫ້ຮູ້ຕື່ມວ່າ: ກົດໝາຍວ່າດ້ວຍ ການປົກປ້ອງຜົນກະທົບ ຈາກການນຳເຂົ້າສິນຄ້າ ປະກອບມີ 7 ພາກ, 53 ມາດຕາ ພາຍຫລັງຖືກຮັບຮອງ ແລະ ປະກາດໃຊ້ຢ່າງເປັນທາງການແລ້ວ ກໍຈະເປັນເຄື່ອງມືທີ່ດີ ໃຫ້ແກ່ການຄຸ້ມຄອງ, ຕິດຕາມ, ກວດກາ ການນຳເຂົ້າສິນຄ້າ ແລະ ຊ່ວຍເຫລືອ ຜູ້ຜະລິດສິນຄ້າພາຍໃນ ເພື່ອສ້າງຄວາມເຂັ້ມແຂງ ແລະ ສາມາດແຂ່ງຂັນກັບສາກົນໄດ້.
ຂ່າວຈາກ: ຂ່າວສານປະເທດລາວ.