ຫ້ອງກວດກາ ແລະ ຄວບຄຸມຢາເສບຕິດ, ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ຈັດພິທີຈູດທໍາລາຍຢາເສບຕິດ ລວມມີຢາບ້າ 13 ລ້ານກວ່າເມັດ ແລະ ຍັງມີກັນ ຊາແຫ້ງ, ຢາໄອ, ກາເຟອິນ, ໂຣເດຍຣອມ, ແປ້ງປະສົມຫົວເຊື້ອຜະລິດຢາບ້າ ຫຼາຍພັນກິໂລ.
ພິທີຈູດທໍາລາຍສິ່ງເສບຕິດດັ່ງກ່າວໄດ້ຈັດຂຶ້ນໃນວັນທີ 17 ຕຸລາ 2017 ທີ່ເດີ່ນຫາດດອນຈັນ ນະຄອນຫຼວງວຽງຈັນ ເນື່ອງໃນໂອກາດສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 16 ປີ (12 ຕຸລາ 2001-12 ຕຸລາ 2017 ) ພາຍໃຕ້ການເປັນປະທານຂອງ ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ , ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ; ມີລັດຖະມົນຕີ, ຮອງລັດຖະມົນຕີ, ບັນດາທູຕານຸທູດ, ອົງການຈັດຕັ້ງສາກົນ ແລະ ບັນດາທ່ານຫົວໜ້າ-ຮອງກົມ ເຂົ້າຮ່ວມ.
ໃນພິທີທ່ານ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ ກ່າວລາຍງານກ່ຽວກັບສະພາບການປະຕິບັດວຽກງານກວດກາ ແລະ ຄວບຄຸມຢາເສບຕິດໃນໄລຍະ 1 ປີ ຜ່ານມາວ່າ: ນັບແຕ່ເດືອນ ມິຖຸນາ 2016 ຫາ ເດືອນ ກັນຍາ 2017 ສາມາດມ້າງຄະດີໄດ້ທັງໝົດທົ່ວປະເທດ 3.814 ເລື່ອງ, ຈັບກຸມຜູ້ຖືກຫາໄດ້ 5.811 ຄົນ, ໃນນີ້ເປັນຍິງ 784 ຄົນ, ຄົນຕ່າງປະເທດ 127 ຄົນ(ເປັນຍິງ 18 ຄົນ); ຢຶດຢາບ້າໄດ້ 2.552 ກິໂລກຼາມ, ເຮໂລອິນ 190 ກິໂລກຼາມ, ຄາເຟອິນ 1.875 ກິໂລກຼາມ, ຢາຝິ່ນ 224ກິໂລກຼາມ, ກັນຊາ 5.047ກິໂລກຼາມ, ຢາໄອ 130 ກິໂລກຼາມ, ໂຄເຄນ 0,01 ກຼາມ.
ຢາເສບຕິດທີ່ນຳມາຈູດທໍາລາຍ ເຊິ່ງສານໄດ້ຕັດສິນ ແລະ ມີຄຳສັ່ງໃຫ້ທຳລາຍຖິ້ມ ມີລາຍລະອຽດຄື: ຢາບ້າ 13ລ້ານກວ່າເມັດ, ກັນຊາແຫ້ງ 2.382 ກິໂລກຼາມ, ຢາໄອ 93ກິໂລກຼາມ, ແປ້ງປະ ສົມເຊື້ອຜະລິດຢາບ້າມີ 272 ກິໂລກຼາມ, ຄາເຟອິນ 4.312 ກິໂລກຼາມ, ໂຣເດຍອອມ 259 ກິໂລກຼາມ ແລະ ແປ້ງຝຸ່ນສີແດງ 12 ແກັດ.
ແຫລ່ງຂ່າວ: ສຳນັກຂ່າວສານປະເທດລາວ