ທະນາຄານພັດທະນາອາຊີ (ADB) ຄາດວ່າເສດຖະກິດລາວ ຈະຂະຫຍາຍຕົວໄປຕາມທິດທາງທີ່ກຳນົດໄວ້ ອີງຕາມການຄາດຄະເນໃນເດືອນເມສາຜ່ານມາ ເສດຖະກິດຂະຫຍາຍຕົວໃນອັດຕາ 6,9% ໃນປີ 2017 ມາຮອດໄລຍະເຄິ່ງປີ 2017 ການຂະຫຍາຍຕົວໄດ້ຫຼຸດລົງເລັກໜ້ອຍ 6,8% ແລະ ຄາດວ່າໃນປີ 2018 ການຂະຫຍາຍຕົວຂອງຜະລິດຕະພັນພາຍໃນ (GDP) ຈະຂະຫຍາຍຕົວທີ່ 7% ເສດຖະກິດໄດ້ຮັບແຮງຍູ້ໝູນສຳຄັນຈາກການສົ່ງອອກກະແສໄຟຟ້າ ໂຄງການກໍ່ສ້າງພື້ນຖານໂຄງລ່າງຂະໜາດໃຫຍ່ ພ້ອມທັງການເພີ່ມຂຶ້ນຂອງການຜະລິດພືດຜັກທັນຍາຫານ ເພື່ອເປັນສິນຄ້າ ແລະ ສົ່ງອອກສິນຄ້າກະສິກຳ.
ທ່ານ ຢະຊຸຊິ ເນກິຊິ ຜູ້ຕາງໜ້າທະນາຄານພັດທະນາອາຊີ ປະຈຳລາວ ພ້ອມຄະນະ ໄດ້ເຜີຍແຜ່ບົດລາຍງານ ການຄາດຄະເນການພັດທະນາໃນອາຊີ ປະຈຳປີ 2017 ວັນທີ 29 ກັນຍາ 2017 ວ່າ: ເສດຖະກິດຂອງລາວພວມດຳເນີນໄປດ້ວຍດີໃນຂົງເຂດອາຊີຕາເວັນອອກສຽງໃຕ້ ບັນດາມາດຕະການທີ່ໄດ້ນຳມາປະຕິບັດ ໃນປີ 2016 ແລະ ຕົ້ນປີ 2017 ລວມທັງມາດຕະຖານຮັດກຸມດ້ານງົບປະມານລາຍຈ່າຍ ແລະ ສົ່ງເສີມການລົງທຶນຂອງພາກເອກະຊົນ ເຫັນວ່າພວມຜັກດັນເສດຖະກິດໃຫ້ສືບຕໍ່ຂະຫຍາຍຕົວ.
ສ່ວນການພັດທະນາຂອງອາຊີມີຄວາມສົດໃສ ດ້ວຍອັດຕາການຂະຫຍາຍຕົວຂອງຈີດີພີ 5,9% ໃນປີ 2017 ແລະ 5,8% ໃນປີ 2018 ການຂະຫຍາຍຂອງການພັດທະນາໃນທົ່ວອາຊີ ແມ່ນໄດ້ຮັບແຮງໜູນຈາກການຟື້ນໂຕໃນໂລກດ້ານການຄ້າ ແລະ ຄວາມຕ້ອງການທີ່ມີຢ່າງຫຼວງຫຼາຍຈາກ ສປ ຈີນ ໃນຂະນະດຽວກັນ ອັດຕາເງິນເຟີ້ສ່ວນໃຫຍ່ ຍັງຢູ່ອັນດັບຄົງທີ່ເຖິງວ່າລາຄາ ນ້ຳມັນຈະຄົງທີ່ກໍ່ຕາມສຳລັບປີ 2017 ອັດຕາເງິນເຟີ້ສະເລ່ຍສຳລັບພາກພື້ນອາຊີໄດ້ຖືກດັດປັບຈາກ 3% ລົງທີ່ 2,4% ແລະ ຖືກປັບຈາກ 3,2% ລົງທີ່ 2,9% ສຳລັບປີ 2018 ໃນໄລຍະ 5 ເດືອນຕົ້ນປີ 2017 ອັດຕາການສົ່ງອອກຄິດເປັນສະກຸນເງິນໂດລາສະຫະລັດຂອງພາກພື້ນເພີ່ມຂຶ້ນ 11% ເຊິ່ງເພີ່ມຂຶ້ນເກີນກວ່າອັດຕາການສົ່ງອອກໃນໄລຍະດຽວກັນຂອງປີຜ່ານມາ ແລະ ມູນຄ່າການນຳເຂົ້າເພີ່ມຂຶ້ນ 17% ການເພີ່ມຂຶ້ນດັ່ງກ່າວ ເປັນຜົນມາຈາກມູນຄ່າສັນຍາການສົ່ງອອກສອງປີຕິດຕໍ່ກັນ ເກີດຈາກການຫຼຸດລົງຂອງສິນຄ້າ ແລະ ອັດຕາຄວາມຕ້ອງການຜົນຜະລິດອຸດສະຫະກຳພາຍນອກຍັງຄົງທີ່.
ແຫລ່ງຂ່າວ: ໜັງສືພິມວຽງຈັນໃໝ່