spot_img
Homeຂ່າວການພັດທະນານະຄອນຫລວງຍອມຮັບມີໜີ້ຈາກການກໍ່ສ້າງເສັ້ນທາງຈໍານວນຫລາຍ.

ນະຄອນຫລວງຍອມຮັບມີໜີ້ຈາກການກໍ່ສ້າງເສັ້ນທາງຈໍານວນຫລາຍ.

Published on

ໃນໂອກາດໃຫ້ກຽດສໍາພາດລາຍການວຽງຈັນພັດທະນາຂອງສະຖານີໂທລະພາບແຫ່ງຊາດຂອງທ່ານເຈົ້າຄອງນະຄອນ ຫລວງວຽງຈັນ ສີນລະວົງ ຄຸດໄພທູນ ເມື່ອບໍ່ດົນມານີ້ໃຫ້ຮູ້ວ່າ: ປັດຈຸບັນນະຄອນຫລວງວຽງຈັນແມ່ນມີໜີ້ສີນເພີ່ມ ຂຶ້ນຈາກການກໍ່ສ້າງເສັ້ນທາງໃນຕົວເມືອງເປັນຈໍານວນຫລາຍ, ໂດຍສະເພາະນັບແຕ່ເລີ່ມມີການຈັດຕັ້ງປະຕິບັດຮູບ ແບບ 70%-30% ໝາຍວ່າລັດລົງທຶນ 70% ແລະ ປະຊາຊົນປະກອບສ່ວນ 30% ຂອງມູນຄ່າເສັ້ນທາງທີ່ກໍ່ສ້າງ ແລະ ປາກົດວ່າສາມາດຈັດຕັ້ງປະຕິບັດສໍາເລັດໄດ້ພຽງ 20 ກວ່າເສັ້ນເທົ່ານັ້ນກໍໄດ້ຢຸດເຊົາ ຍ້ອນວ່າການຊໍາລະເງິນຕາມອັດຕາສ່ວນໃຫ້ບໍລິສັດຜູ້ຮັບເໝົາທີ່ລົງທຶນກ່ອນບໍ່ສາມາດປະຕິບັດໄດ້ນັບທັງພາກລັດ ແລະ ປະຊາຊົນຍ້ອນບັນຫາຄວາມຫຍຸ້ງຍາກດ້ານງົບປະມານ.

ທ່ານເຈົ້າຄອງ ໃຫ້ຮູ້ວ່າ: ຕາມການຄິດໄລ່ຂອງຂະແໜງກ່ຽວຂ້ອງເຫັນວ່ານະຄອນຫລວງວຽງຈັນມີຄວາມຕ້ອງການງົບປະມານຢ່າງໜ້ອຍ 20 ຕື້ກີບຕໍ່ປີເພື່ອນໍາໃຊ້ເຂົ້າໃນການສ້ອມແປງເສັ້ນທາງຊຸດໂຊມເປ່ເພ ແລະ ຜ່ານມາໄດ້ຮັບງົບປະມານພຽງແຕ່ 500 ລ້ານກີບຕໍ່ປີ, ສະນັ້ນມີຫລາຍເສັ້ນທາງທີ່ກໍ່ສ້າງສໍາເລັດແຕ່ຍັງບໍ່ສາມາດຊໍາລະໜີ້ໃຫ້ຜູ້ຮັບເໝົາໄດ້ ເປັນຕົ້ນ: ເສັ້ນທາງໜອງແຕ່ງ, ດອນໜູນ-ທ່າງ່ອນ ແລະ ເສັ້ນທາງອື່ນໆ ແລະ ຈາກສະພາບດັ່ງກ່າວ, ອົງການປົກຄອງນະຄອນຫລວງວຽງຈັນ ຈຶ່ງໄດ້ຄົ້ນຄວ້າສ້າງຕັ້ງກອງທຶນທາງປະຊາຊົນນະຄອນຫລວງວຽງຈັນ ເພື່ອເປັນທຶນຮອນພັດທະນາພື້ນຖານໂຄງລ່າງຖະໜົນຫົນທາງໃນຕໍ່ໜ້າ.

ນອກຈາກນີ້ຍັງມີຄຳຖາມຈາກພໍ່ແມ່ປະຊາຊົນວ່າ ນະຄອນຫລວງຈະເລັ່ງແກ້ໄຂສະພາບ ທາງເປ່ທາງເພແນວໃດໃຫ້ຫາຍດີ, ໃນ​ໄລຍະ​ຜ່ານ​ມາ​ນີ້, ​ເຖິງ​ວ່າ​ນະຄອນຫລວງ​ວຽງ​ຈັນ​ ​ໄດ້​ຮັບ​ການ​ສ້າງສາ ​ແລະ ພັດທະນາ​ດີ​ຂຶ້ນຫລາຍ​ດ້ານ, ຖະໜົນ​ຫົນທາງ, ​ເຮືອນ​ຊານ​ບ້ານ​ຊ່ອງ, ຮ້ານ​ຄ້າຮ້ານ​ຂາຍ​ລະດັບ​ໃຫຍ່​ໄດ້​ເກີດ​ຂຶ້ນ​ເໝືອນ​ດັ່ງ​ດອກ​ເຫັດ ອັນ​ໄດ້​ເຮັດ​ໃຫ້​ໂສມ​ໜ້າ​ນະຄອນຫລວງ​ນັບ​ມື້ຮຸ່ງ​ເຮືອງ. ​ແຕ່​ຄຽງ​ຄູ່​ກັນນັ້ນ ກໍ​ມີ​ຫາງ​ສຽງ​ຈົ່ມ​ຫລາຍ​ຂອງ​ສັງຄົມ​ຕໍ່​ສະພາບ​ເສັ້ນ ທາງ​ຫລວງ​ໃນ​ຕົວ​ເມືອງ​ເຫັນ​ວ່າ​ນັບ​ມື້​ເປ່​ເພ ​ແລະ ຊຸດ​ໂຊມ​ລົງ​ຫລາຍ ​ເບິ່ງ​ມ່ອງ​ໃດ​ບ່ອນ​ໃດ​ກໍ​ເປັນ​ບວກ​ເປັນ​ຂຸມ ຈົນບາງ​ບ່ອນ​ກໍ​ເກືອບ​ຈະ​ບໍ່​ສາມາດ​ນຳ​ໃຊ້​ໄດ້​ແລ້ວ ​ແລະ ຈົນ​ຈະ​ບໍ່​ມີ​ບ່ອນ​ຈະ​ຕາບ​ຈະ​ຈູດ, ຖ້າ​ເອົາ​ດິນ​ມາ​ຖົມ​ກໍ​ຍິ່ງ​ຈະ​ເປັນ​ເບື່ອມ​ເປັນ​ຕົມ​ເມື່ອ​ມີ​ຝົນຕົກ​ລົງ​ມາ ​ແລະ ຖ້າ​ແດດອອກ​ກໍ​ໄງ່​ໄປ​ທົ່ວ​ເມືອງ. ​ແຕ່​ສະພາບ​ຮ້າຍ​ແຮງ​ນີ້ ຫາງ​ສຽງ​ສັງຄົມ​ສ່ວນ​ຫລາຍ​ໃຫ້​ເຫດຜົນ​ວ່າ: ຍ້ອນ​ການ​ກໍ່ສ້າງ​ບັນດາ​ເສັ້ນທາງນັ້ນຂາດ​ຄຸນ​ນະພາ​ບ, ​ແຕ່​ຜູ້​ກວດກາ​ກໍ​ຜ່ານ​ໄປ ​ແລະ ຍ້ອນ​ງົບ​ກໍ່ສ້າງ​ມີ​ການບິ​ແບ່ງ​ຫລາຍ​ພູດ​ຫລາຍ​ຕ່ອນ ​ແລະ ຕໍ່​ສະພາບ​ແນວ​ນີ້ ​ເຮົາ​ຈະ​ແກ້​ໄຂ​ແນວ​ໃດ ? ນັ້ນ​ແມ່ນ​ຄຳ​ຖາມ​ໃຫຍ່​ຕັ້ງ​ໃຫ້​ຂະ​ແໜງ​ການ​ກ່ຽວຂ້ອງ​ຕ້ອງ​ໄດ້​ຄົ້ນຄິດ, ບໍ່​ຄວນ​ຈະ​ຕອບ​ງ່າຍໆ​ວ່າ: “ຍາມ​ຝົນ​ແປງ​ບໍ່​ໄດ້ ​ແລະ ຕົກ​ແລ້ງ​ມາ​ພັດ​ວ່າ​ຂາດ​ງົບ ​ແລະ ອື່ນໆ” ຖ້າ​ເປັນ​ແນວ​ນີ້ ສະພາບ​ເສັ້ນທາງ​ເປ່​ເພ​ນັບ​ມື້ຍິ່ງ​ຈະ​ຮ້າຍ​ແຮງ​ຂຶ້ນທຸກ​ທີ ​ເມື່ອ​ຮອດ​ເວລາ​ນັ້ນ​ໂສມ​ໜ້າ​ຂອງ​ນະຄອນຫລວງ​​ເຮົາ​ຈະ​ເປັນ​ແນວ​ໃດ ? ຖ້າ​ເວົ້າ​ເລື່ອງ​ຈະ​ເຮັດ​ໃໝ່​ກໍ​ດັ່ງ​ເສັ້ນທາງ​ຕານ​ມີ​ໄຊ, ໜອງ​ບຶກ, ໜອງ​ພະຍາ​ກໍ​ເຮັດ​ມາ​​ເປັນ​ປີ​ແລ້ວ ​ແຕ່​ກໍ​ຍັງ​ບໍ່​ໄປ​ບໍ່​ມາ, ດົນໆ​ຈຶ່ງ​ເຫັນ​ລົດ​ຈົກ​ດ້າມຄັນ​ອອກ​ຈົກ​ຮ່ອງ​ລະບາຍ​ນໍ້າ​ແລ້ວ​ກໍ​ປະປ່ອຍ​ໄປ ​ເຮັດ​ໃຫ້ການ​ສັນຈອນ​ໄປມາ​ຂອງ​ປະຊາຊົນ​ໃນ​​ເຂດ​ດັ່ງກ່າວ​ພົບ​ຄວາມ​ຫຍຸ້ງຍາກ​ເປັນ​ທີ່​ສຸດ ຫລາຍ​ຄອບຄົວ​ກໍ​ຈົນ​ໄດ້​ກ່າຍ​ຂົວ​ເຂົ້າ​ເຮືອນ​ຕົນ​ເອງ ​ແລະ ຜູ້​ຂາຍ​ເຄື່ອງ​ຢູ່​ເຂດ​ນັ້ນກໍ​ພຽງ​ໄດ້​ອ້າ​ປາກ​ກິນ​ຂີ້ຝຸ່ນ ​ແລະ ຕົບ​ຮີ້ນ​ຕົບ​ຍຸງ​ຢູ່​ເທົ່າ​ນັ້ນ, ບໍ່​ຮູ້​ວ່າ​ຈະ​ໄປ​ຮ້ອງ​ຮຽນ​ໃຜ ​ເພື່ອ​ໃຫ້ການ​ກໍ່ສ້າງ​ສຳ​ເລັດ​ລົງ​ໂດຍ​ໄວ. ​ໃນ​ຂະນະ​ທີ່​ພາກ ສ່ວນ​ຮັບຜິດຊອບ​ເພິ່ນ​ພັດ​ບໍ່​ໄດ້​ຢູ່​ເຂດ​ເສັ້ນທາງ​ດັ່ງກ່າວ, ​ໃນ​ທີ່​ສຸດ​ກໍ​​ເອົາ​ແຕ່​ມັນ​ຈະ​ເປັນ​ຈະ​ໄປ​ຕາມ​ເພງ​ໃດ​ກໍ​ໄດ້ ​ແລະ ຖ້າ​ເວົ້າ​ເຖິງ​ການ​ແປງ​ທາງ​ເບິ່ງ​ແລ້ວ​ກໍ​ເຮັດ​ແບບ​ແປະໆ​ບາງໆ ສົມ​ແລ້ວ​ທີ່​ຫລາຍ​ຄົນ​ໃຫ້​ຂໍ້​ສັງ​ເກດ​ວ່າ: “​ແລດ​ຢາງ” ຖ້າ​ເວົ້າຫລາຍ​ເກີນ​ພັດ​ອ້າງ​ວ່າ​ງົບ​ໜ້ອຍ​ກໍ​ເຮັດ​ໄດ້​ໜ້ອຍ.

 

ແຫລ່ງຈາກ: ລາວພັດທະນາ.

ບົດຄວາມຫຼ້າສຸດ

ມີໃຜຊື່ຍາວກວ່ານີ້ບໍ່? ຊາຍຊາວນິວຊີແລນມີຊື່ຍາວທີ່ສຸດໃນໂລກ ໃຊ້ເວລາອ່ານ 20 ນາທີ ຈຶ່ງອ່ານແລ້ວ

ມາຮູ້ຈັກກັບຊາຍຜູ້ທີ່ມີຊື່ທີ່ຍາວທີ່ສຸດໃນໂລກ, ລໍເລນ ວອດກິນ (Laurence Watkins) ອາຍຸ 60 ປີ, ອາໄສຢູ່ເມືອງໂອດແລນ ປະເທດນິວຊີແລນ ລາວມີຈໍານວນຊື່ຍາວເຖິງ 2,253 ຄໍາ. ຜ່ານມາຊາຍຄົນນີ້ຫຼົງໄຫຼໃນລາຍການ Ripley's...

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄຂຂຶ້ນຢ່າງເປັນທາງການ

ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ເປີດຂຶ້ນໃນວັນທີ 21 -...

ກຳນົດຈັດງານ 5 ວັນ ບຸນນະມັດສະການພຣະທາດຫຼວງວຽງຈັນ ຈະຈັດຂຶ້ນໃນລະຫວ່າງວັນທີ 1-5 ພະຈິກ 2025

ໃນວັນທີ 21 ຕຸລາ 2025 ພິທີຖະແຫຼງຂ່າວ ງານປະເພນີບຸນນະມັດສະການ ພຣະທາດຫຼວງ ແລະ ງານວາງສະແດງສິນຄ້າ ປະຈຳປີ ຄສ 2025 ຈັດຂຶ້ນ ທີ່ເດີ່ນພຣະທາດຫຼວງວຽງຈັນ...

ຍີ່ປຸ່ນ ຊ່ວຍເຫຼືອລ້າໂຄງການເກັບກູ້ລະເບີດບໍ່ທັນແຕກ ຢູ່ແຂວງ ຈຳປາສັກ ສາລະວັນ ແລະ ເຊກອງ ມູນຄ່າ 4,5 ລ້ານໂດລາສະຫະລັດ

ລັດຖະບານຍີ່ປຸ່ນສືບຕໍ່ໃຫ້ການຊ່ວຍເຫຼືອວຽກງານ ລບຕ ຢູ່ພາກໃຕ້ຂອງລາວ ໃນວັນທີ 20 ຕຸລາ 2025 ທີ່ນະຄອນຫຼວງວຽງຈັນ ສປປ ລາວ ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດຍີ່ປຸ່ນ ປະຈໍາລາວ ໄດ້ຈັດພິທີລົງນາມເອກະ...