ປັດຈຸບັນ ນະຄອນຫຼວງວຽງຈັນ ໄດ້ຮັບການພັດທະນາຫຼາຍດ້ານ ໃນນີ້ ການພັດທະນາພື້ນຖານໂຄງລ່າງ ເປັນຕົ້ນ ຖະໜົນຫົນທາງ ໄດ້ມີການກໍ່ສ້າງຫຼາຍເສັ້ນ ເພື່ອໃຫ້ປະຊາຊົນໄດ້ມີເສັ້ນທາງທຽວໄປມາສະດວກສະບາຍ ຄຽງຄູ່ກັບການພັດທະນາດັ່ງກ່າວ ໄດ້ພົບບັນຫາຂີ້ເຫຍື້ອຂອງກຸ່ມຄົນ ຫຼື ປະຊາຊົນຜູ້ທີ່ຂີ້ຄ້ານມັກງ່າຍ ບໍ່ເປັນເຈົ້າການໃນການຮັກສາຄວາມສະອາດ ນຳເອົາໄປລັກຖິ້ມໃສ່ເສັ້ນທາງ ໂດຍສະເພາະ ຈະພົບເຫັນຢູ່ເສັ້ນທາງ 450 ປີ ແລະ ເສັ້ນທາງຕັດໃໝ່ອື່ນໆ ເຊິ່ງເຮັດໃຫ້ສັງຄົມມີຫາງສຽງຈົ່ມວ່າ ອີກບັນຫາໜຶ່ງ ກໍ່ຄືຄວາມເປິະເປື້ອນຂອງເສັ້ນທາງ ເນື່ອງຈາກວ່າເປັນເຂດກຳລັງກໍ່ສ້າງ ບັນຫາການຖົມດິນຂອງລົດຂົນຫີນ ຂົນດິນຕ່າງໆ ໄດ້ມີດິນ-ຊາຍຕົກໃສ່ຖະໜົນຫົນທາງ ພ້ອມນັ້ນຍັງມີຄວາມເປິະເປື້ອນຂອງທາງຮ່ອມທາງຊອຍ ທີ່ຍັງບໍ່ທັນປູເບຕົງ ຍາມລະດູຝົນລົດຂອງປະຊາຊົນອອກຕາມເສັ້ນທາງຮ່ອມ ແລ້ວຢຽບຂີ້ຕົມມາໃສ່ ແລະ ອື່ນໆ.
ທ່ານນາງ ບົວວອນ ຈັນທະລາຕີ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ໄດ້ໃຫ້ສຳພາດວ່າ: ສາເຫດຂອງຂີ້ເຫຍື້ອ ຄວາມເປິະເປື້ອນຍ້ອນງົບປະມານບໍ່ມີພຽງພໍໃນການຄຸ້ມຄອງເສັ້ນທາງ ເຮັດໃຫ້ສັງຄົມເປັນຫ່ວງເປັນໃຍ ແລະ ຕຳນິສົ່ງຂ່າວ ຕໍ່ກັບສະພາບທີ່ເກີດຂຶ້ນ ຫ້ອງການ ຄບຕ ໄດ້ມີຄວາມເປັນຫ່ວງເປັນໃຍ ໂດຍພາຍໃຕ້ການນຳພາຂອງອົງຄະນະພັກປົກຄອງ ນວ ໄດ້ມີການຄົ້ນຄວ້າເອົາໃຈໃສ່ແກ້ໄຂບັນຫາມີມະຕິສະບັບເລກທີ 03 ກ່ຽວກັບວຽກ ແລະ ມາດຕະການຮັກສາຄວາມສະອາດຂອງອົງການປົກຄອງ ນວ ໄດ້ກຳນົດນະໂຍບາຍ 6 ສ ໃນນັ້ນ ສ ສະອາດ ໄດ້ແຍກອອກມາເປັນ 8 ສະອາດ ແຕ່ໃນແຜນວຽກ ແລະ ມາດຕະການກ່ຽວກັບເສັ້ນທາງໄດ້ສຸມໃສ່ຖະໜົນຫົນທາງສະອາດ ເລັ່ງໃສ່ມາດຕະການຕໍ່ຜູ້ລະເມີດ ຕາມທີ່ໄດ້ລະບຸໄວ້ໃນມະຕິຕົກລົງດັ່ງກ່າວ ຄື: ຖ້າຜູ້ໃດເອົາຂີ້ເຫຍື້ອໄປລັກຖິ້ມ ເຈົ້າໜ້າທີ່ຈັບໄດ້ຈະປັບໃໝ 100 ເທົ່າ ຈາກປົກກະຕິເກັບຄ່າຂີ້ເຫຍື້ອ 400 ກີບຕໍ່ກິໂລ ຈະກາຍເປັນ 40.000 ກີບຕໍ່ກິໂລ ສ່ວນບັນຫາລົດຂົນຫີນ-ຊາຍ ລົດເທປູນຕ່າງໆ ທີ່ສ້າງຄວາມເປິະເປື້ອນຕໍ່ຫົນທາງ ໄດ້ມີມາດຕະການປັບໃໝຄັນໜຶ່ງ ຄັ້ງໜຶ່ງ 1 ແສນກີບ ພ້ອມທັງຮັບຜິດຊອບຄ່າລ້າງທາງຖ້າເປື້ອນຫຼາຍຄັນໜຶ່ງ 5 ແສນກີບ ຫຼື ຕາມຈຳນວນທີ່ໃຊ້ລ້າງ ຜ່ານມາແມ່ນໄດ້ຈັດຕັ້ງປະຕິບັດແລ້ວ.
ເພື່ອເຮັດໃຫ້ ນວ ກາຍເປັນນະຄອນຫຼວງທີ່ສະອາດ ແລະ ໜ້າຢູ່ຂອງໝົດທຸກຄົນ ຮຽກຮ້ອງໃຫ້ປະຊາຊົນທີ່ດຳລົງຊີວິດຢູ່ ໃຫ້ເປັນເຈົ້າການຮັກສາຄວາມສະອາດຊ່ວຍກັນ ແລະ ພ້ອມກັນຈັດຕັ້ງປະຕິບັດຄຳຂວັນ 5 ຮ່ວມ ທີ່ອົງການປົກຄອງ ນວ ວາງອອກ ຄື: ຮ່ວມຢູ່ຮ່ວມປົກປັກຮັກສາ ຮ່ວມສ້າງສາພັດທະນະນາຮ່ວມແກ້ໄຂບັນຫາ ແລະ ຮ່ວມຈະເລີນກ້າວໜ້າໄປນຳ ນວ.
ແຫລ່ງຂ່າວ: ໜັງສືພິມວຽງຈັນໃໝ່