ໃນວັນທີ 01 ສິງຫາ ຂອງທຸກໆປີ ເປັນວັນທີີ່ມີຄວາມໝາຍສຳຄັນສຳລັບ ສປປ ລາວ ເຊິ່ງເປັນປະເທດທີ່ຖືກຖິ້ມລະເບີດລູກຫວ່ານໃສ່ຫຼາຍທີ່ສຸດໃນໂລກ ແລະ ວັນດັ່ງກ່າວກໍໄດ້ກາຍເປັນວັນລະນຶກເຖິງການຄົບຮອບຂອງວັນມີຜົນບັງຄັບໃຊ້ສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ເຊິ່ງໃນປີ 2017 ກໍຄົບຮອບ 7 ປີຂອງສົນທິ ສັນຍາດັ່ງກ່າວ.
ສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ເປັນສົນທິສັນຍາສາກົນທີ່ຫ້າມການຜະລິດ ການນຳໃຊ້ ການຂົນສົ່ງ ແລະ ການສະສົມອາວຸດລະເບີດຕ່າງໆ ເຊິ່ງໃນໂອກາດນີ້ ລັດຖະບານແຫ່ງ ສປປ ລາວ ແລະ ຄູ່ຮ່ວມພັດທະນາ ພ້ອມດ້ວຍໜ່ວຍງານຕ່າງໆໃນຂະແໜງການລະເບີດບໍ່ທັນແຕກກໍໄດ້ມາເຕົ້າໂຮມກັນໃນພິທີລະນຶກເຖິງວັນດັ່ງກ່າວທີ່ຈັດຂຶ້ນເມື່ອຕົ້ນສັບປະດາຜ່ານມາຢູ່ກະຊວງແຮງງານ ແລະສະຫວັດດີການສັງຄົມ ໂດຍການເປັນປະທານຂອງ ທ່ານ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ ທ່ານ ນາງ ຄາຣິນາ ອິມໂມເນັນ ຜູ້ປະສານງານອົງການສະຫະປະຊາຊາດ ແລະ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ ເຊິ່ງພິທີນີ້ ບໍ່ພຽງແຕ່ເປັນການລະນຶກເຖິງການຄົບຮອບຂອງສົນທິສັນຍາດັ່ງກ່າວເທົ່ານັ້ນ ແຕ່ຍັງເປັນການຫວນຄິດເຖິງປະຫວັດສາດອັນເຈັບປວດຂອງ ສປປ ລາວ ຍ້ອນລະເບີດບໍ່ທັນແຕກນັບແຕ່ສົງຄາມສິ້ນສຸດລົງຫຼາຍກວ່າ 40 ປີຜ່ານມາ.
ທັງນີ້ ມີການເປີດເຜີຍວ່າ ເມື່ອປີ 2016 ຜ່ານມາ ມີຜູ້ບາດເຈັບ ຫຼື ເສຍຊີວິດຈາກລະເບີດບໍ່ທັນແຕກຈຳນວນ 59 ຄົນຢູ່ ສປປ ລາວ ແລະ ຈຳນວນຜູ້ເຄາະຮ້າຍຈາກລະເບີດບໍ່ທັນແຕກໃນປີນີ້ ມາຮອດປັດຈຸບັນແມ່ນມີ 23 ຄົນ ເຊິ່ງນັກວິຊາການໄດ້ຄາດວ່າ 30% ຂອງລະເບີດລູກຫວ່ານທັງໝົດ 270 ລ້ານໜ່ວຍທີ່ໄດ້ຖືກຖິ້ມລົງມາໃນໄລຍະສົງຄາມອິນດູຈີນ ແມ່ນຍັງບໍ່ທັນແຕກ ຫຼື ຍັງມີປະມານ 80 ລ້ານໜ່ວຍທີ່ຍັງບໍ່ທັນແຕກ ແລະ ຢັ່ງຢາຍຢູ່ຕາມພື້ນທີ່ຕ່າງໆທົ່ວປະເທດ.
ສປປ ລາວ ເປັນປະເທດທີສອງທີ່ໄດ້ລົງນາມໃນສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຫຼັງຈາກປະເທດນ໋ອກແວ ເຊິ່ງສົນທິສັນຍາສະບັບດັ່ງກ່າວໄດ້ປະກອບສ່ວນຢ່າງໃຫຍ່ຫຼວງຕໍ່ ສປປ ລາວ ໂດຍສະເພາະແມ່ນໂຄງການເກັບກູ້ລະເບີດແຫ່ງຊາດທີ່ໄດ້ເອົາໃຈໃສ່ປະຕິບັດໜ້າທີ່ໃນແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໃນຕະຫຼອດໄລຍະ 20 ປີຜ່ານມາ ເຊິ່ງໂຄງການເກັບກູ້ລະເບີດແຫ່ງຊາດໄດ້ເກັບກູ້ລະເບີດບໍ່ທັນແຕກອອກຈາກເນື້ອທີ່ໄດ້ຫຼາຍກວ່າ 61.000 ເຮັກຕາ ເພື່ອເຮັດໃຫ້ການນຳໃຊ້ເນື້ອທີ່ດິນມີຄວາມປອດໄພ ທຳລາຍລະເບີດບໍ່ທັນແຕກຊະນິດຕ່າງໆໄດ້ຫຼາຍກວ່າ 1,8 ລ້ານໜ່ວຍ ນອກນີ້ ສົນທິສັນຍາສະບັບດັ່ງກ່າວຍັງໄດ້ສະໜອງຂອບການຮ່ວມມືໃຫ້ແກ່ ສປປ ລາວ ກັບບັນດາປະເທດຕ່າງໆ ແລະ ຄູ່ຮ່ວມງານອື່ນໆເພື່ອສ້າງເຂົ້າໃຈໃນການຮ່ວມກັນແກ້ໄຂບັນຫາລະເບີດບໍ່ທັນແຕກຕົກຄ້າງໃນປະເທດຂອງຕົນ ແລະ ໃນຫຼາຍປີຜ່ານມານີ້ ກໍມີຜົນໄດ້ຮັບທີ່ດີຈາກການຮ່ວມມືດັ່ງກ່າວ ນອກນັ້ນ ສປປ ລາວ ຍັງໄດ້ປະກອບສ່ວນທີ່ສຳຄັນເຂົ້າໃນການລະດົມຂົນຂວາຍໃຫ້ປະເທດຕ່າງໆໃນໂລກລົງນາມ ແລະ ໃຫ້ສັດຕະຍາບັນຕໍ່ສົນທິສັນຍາອີກດ້ວຍ.
ແຫລ່ງຂ່າວ: ໜັງສືພິມປະຊາຊົນ