spot_img
Homeສຸຂະພາບ ແລະ ສີ່ງແວດລ້ອມຜູ້ປະກັນ​ສັງຄົມມີ​ສິດ​ຮ້ອງ​ຮຽນ​ເຖິງ​ກອງ​ທຶນ ​ແລະ ​ໂຮງໝໍ​ໃນ​ກໍລະນີ​ບໍ່​ໄດ້​ຮັບ​ຄວາມ​ຍຸຕິ​ທໍາ

ຜູ້ປະກັນ​ສັງຄົມມີ​ສິດ​ຮ້ອງ​ຮຽນ​ເຖິງ​ກອງ​ທຶນ ​ແລະ ​ໂຮງໝໍ​ໃນ​ກໍລະນີ​ບໍ່​ໄດ້​ຮັບ​ຄວາມ​ຍຸຕິ​ທໍາ

Published on

ປັດຈຸບັນ​, ມີບັນຫາ​ໜຶ່ງ​ທີ່​ສັງຄົມ​ຢາກ​ໃຫ້​ລັດຖະບານ​ກວດກາຄືນ ​ແລະ ​ແກ້​ໄຂ​ໂດຍ​ໄວ​ທີ່​ສຸດນັ້ນກໍ​ຄືສະພາບ​ການ​ບໍລິການ​ປີ່​ນປົວ​ສຸຂະພາບ​ໃຫ້​ສະມາຊິກກອງ​ທຶນ​ປະກັນ​ສັງຄົມ​ແຫ່ງ​ຊາດ​ຢູ່​ບັນດາ​ໂຮງໝໍ​ແຫ່ງ​ຕ່າງໆ, ພາຍຫລັງ​ເຫັນ​ວ່າ​ຜູ້​ປະກັນ​ຕົນ​ສ່ວນ​ຫລວງຫລາຍ​ຍັງ​ບໍ່​ໄດ້​ຮັບ​ຜົນ​ປະ​ໂຫຍ​ດຈາກ​ການ​ບໍລິການຂອງ​ແພດ​ໝໍຢ່າງ​ເຕັມສ່ວນ ​ແລະ ດີ​ເທົ່າ​ທີ່​ຄວນ ​ເປັນຕົ້ນ:​ ກໍລະນີ​​ແພດໝໍ​ຂຽນຊະນິດ​ຢາ​ທີ່​ມີລາຄາສູງ​ປະມານ​ເກີນ 50 ພັນ​ກີບ​ຂຶ້ນ​ເມືອ​ແມ່ນ​ຈະ​ບໍ່​ມີຢູ່​ໂຮງໝໍ​ນັ້ນ, ຊຶ່ງ​ຕ້ອງ​ໄດ້​ໄປ​ຊື້​ຢູ່​ທາງ​ນອກ, ນອກ​ນີ້​ຍັງ​ມີ​ກໍລະນີຢາ​ທີ່​ແພດ​ໝໍວາງ​ໃຫ້​ໃນ​ເວລາ​​ເຮົາໄປ​ໃຊ້​ບັດ​ປະກັນ​ສັງຄົມ​ມັກ​ເປັນ​ຊະນິດ​ຢາ​ລາຄາ​ຖືກ, ຊຶ່ງ​ແຕກ​ຕ່າງ​ຈາກ​ໄປ​ກວດ​ແບບ​ເສຍ​ເງິນ​ເອງ, ນອກຈາກ​ນີ້​ຍັງ​ມັກ​ພົບ​ເຫັນ​ກໍລະນີ​ແພດ​ໝໍ​ຈໍານວນ​ໜຶ່ງເວົ້າຈາ​ບໍ່​ສຸພາບ ​ແລະ ​ຫລາຍ​ໆບັນຫາອື່ນອີກ.

​ຕໍ່​ບັນຫາ​ຕ່າງໆທີ່​ເກີດ​ຂຶ້ນ​ນີ້​, ​ຫ້ອງການ​ກອງ​ທຶນ​ປະກັນ​ສັງ​ຄົມ​ແຫ່ງ​ຊາດ ​ໄດ້​ຊີ້​ແຈງ​ຕໍ່​ໜັງສື​ພີ​ມລາວ​ພັດທະນາພວກ​ເຮົາ​ໃນ​ວັນ​ທີ 8 ສິງຫາ​ນີ້ວ່າ: ​ກອງທຶນປະກັນສັງຄົມແຫ່ງຊາດ (ຫກປຊ) ເປັນອົງການຈັດຕັ້ງລັດທີ່​ບໍ່​ຫວັງ​ຜົນ​ກຳ​ໄລ ພາຍໃຕ້ການຊີ້ນຳຂອງກະຊວງແຮງງານ ແລະ ສະຫວັດດີການສັງຄົມ, ​ເປັນກອງທຶນລວມໝູ່ເພື່ອປະກອບສ່ວນຈາກພາກລັດຖະບານ, ຜູ້ໃຊ້ແຮງງານ ແລະ ຜູ້ອອກແຮງງານໂດຍມີການຫັກເງິນ​ເປັນ​ລາຍ​ເດືອນ​ເຂົ້າ​ກອງ​ທຶນດັ່ງກ່າວຕາມອັດຕາຄື: ພາກ​ລັດ​ແມ່ນຈໍານວນ 16,5% ຂອງ​ເງິນ​ເດືອນ, ໃນນັ້ນລັດຖະບານສົມທົບ 8,5% ​ແລະ ພະນັກງານ-ລັດຖະກອນສົມທົບ 8% ຂອງເງິນເດືອນທັງໝົດ. ສ່ວນ​ພາກວິສາຫະກິດ​ແມ່ນຈໍານວນ 11,5% ໃນນັ້ນຜູ້ໃຊ້ແຮງງານສົມທົບ 6% ​ແລະ ຜູ້ອອກແຮງງານສົມທົບ 5,5% ຂອງເງິນເດືອນປະກັນຕົນ ​ແລະ ກໍລະນີຂອງຜູ້ສະໝັກໃຈ​ແມ່ນສົມ​ທົບປະມານ 9% ຂອງວົງເງິນທີ່​ສາມາດ​ເລືອກ​ໄດ້ນັບ​ແຕ່ຄ່າແຮງງານຂັ້ນຕ່ຳສຸດທີ່​ລັດ​ກຳນົດ 9 ​ແສນ​ກີບ​ຂຶ້ນ​ໄປ ​ແລະ ຜູ້​ເປັນສະມາຊິກ​ກອງ​ທຶນຈະ​ໄດ້​ຮັບຜົນ​ປະ​ໂຫຍ​ດ​ຈາກ​ການ​ຮັບປະກັນ​ຄວາມ​ສ່ຽງ​ຕ່າງໆ​ໃນ​ການ​ດໍາລົງ​ຊີວິດ​ໃຫ້​ມີ​ຄວາມ​ໝັ້ນ​ທ່ຽງ ໂດຍ​ສະ​ເພາະ​ອຸດ​ນູນໃນຍາມ​ເຈັບ​ໄຂ້​ໄດ້​ປ່ວຍ, ​​​ເກີດອຸ​ປະ​ຕິ​ເຫດ​​ເສຍ​ອົງຄະ, ເກີດລູກ, ຫລຸ​ລູກ, ເຖົ້າແກ່, ວ່າງ​ງານ ແລະ ເສຍຊີວິດ ​ເພື່ອໃຫ້ມີບ່ອນເພິ່ງໃນຕອນທີ່ມີການຂາດລາຍໄດ້ ແລະ ມີລາຍຈ່າຍເພີ່ມ, ​ໂດຍ​ການ​ໃຊ້​ບັດ​ສະມາຊິກ​ແທນ​ເງິນສົດ​ໃນ​ການ​ເຂົ້າ​ຮັບ​ບໍລິການ​ປິ່ນປົວ​ຕາມ​​ໂຮງໝໍ​ຕ່າງໆ ທັງບໍ່​ຈໍາກັດ​ຈໍານວນ​​ເງິນ ແລະ ຈໍານວນ​ຄັ້ງ ​ແລະ ມາ​ຮອດປັດຈຸບັນ​ກອງ​ທຶນ​ນີ້ມີສະມາຊິກ​ຫລາຍ​ກວ່າ 7 ​ແສນ​ຄົນ, ​​ໃນ​ນີ້ຫລາຍ​ກວ່າ 60% ​ແມ່ນ​ປິ່ນປົວ​ຢູ່​ໂຮງໝໍ​ມະ​ໂຫສົດ, 25% ​ແມ່ນ​ໂຮງໝໍມິດຕະພາບ 150 ​ແລະ ສ່ວນ​ທີ່​ເຫລືອ​ແມ່ນ​ໂຮງໝໍ​​ແຫ່ງອື່ນໆ ​ເຊັ່ນ:​ ເສດຖາທິລາດ, ​ໂຮງໝໍ 103, ​ໂຮງໝໍ​ແຂວງ​ວຽງ​ຈັນ, ຫລວງ​ພະ​ບາງ, ຊຽງ​ຂວາງ, ຫົວ​ພັນ, ຫລວງ​ນໍ້າ​ທາ, ອຸດົມ​ໄຊ, ບໍ່​ແກ້ວ, ຜົ້ງ​ສາລີ, ​ໄຊ​ຍະ​ບູລີ, ບໍລິ​ຄໍາ​ໄຊ, ຄໍາ​ມ່ວນ, ສະ​ຫວັນນະ​ເຂດ, ສາລະ​ວັນ, ຈໍາປາ​ສັກ, ​ເຊ​ກອງ, ອັດ​ຕະປື, ​ໄຊ​ສົມບູນ ​ແລະ ອີກ 9 ​ໂຮງໝໍເມືອງ​ໃນ​ນະຄອນຫລວງ​ວຽງຈັນ ​ແລະ​ ໂຮງໝໍ​ວິທະຍາ​ເຂດ​ດົງ​ໂດກ ​ແລະ ການ​ຈ່າຍ​ເງິນ​ຈາກ​ກອງ​ທຶນ​ໃຫ້​ບັນດາ​ໂຮງໝໍ​ທີ່​ເປັນຄູ່ສັນຍາ​ນັ້ນ​ເປັນ​​ແບບ​ມອບ​ເໝົາ ​ແລະ ​ຕາມ​ສັນຍາ​ຕົກລົງ​ການ​ບໍລິການ​ປິ່ນປົວ​ລະຫວ່າງ​ຫ້ອງການ​ກອງ​ທຶນ​ປະກັນ​ສັງຄົມ​ແຫ່ງ​ຊາດ ​ແລະ ​ໂຮງໝໍ​ຄູ່​ສັນຍາ​ໄດ້​ລະບຸ​ໄວ້​ວ່າ: ​ໃນ ກໍລະນີ​ຢາ​ຢູ່​ໂຮງໝໍ​ບໍ່​ມີ ສະມາຊິກ​ປະກັນ​ສັງຄົມ​ຈຳ​ເປັນ​ຕ້ອງ​ໄດ້​ໄປ​ຊື້ຢາ​ນອກ​ນັ້ນ ​ແມ່ນຕ້ອງ​ແຈ້ງ​ໃຫ້​ປ່ອງ​ບໍລິການປະກັນ​ສັງຄົມຢູ່​ໂຮງໝໍ​​ຮູ້​ເສຍ​ກ່ອນ ​ແລ້ວ​ສາມາດ​ນຳ​ໃບ​ບິນ​ມາ​ຖອນ​ເງິນ​ຄືນ​ໄດ້ຕາມ​ມູນ​ຄ່າ​ຢາ​ທັງ​ໝົດພາຍ​ໃນກຳນົດ​ບໍ່​ໃຫ້​ເກີນ 30 ວັນ. ​ໃນ​ກໍລະນີໂຮງໝໍ​ຈ່າຍ​ຢາ ຫລື ​ໃຫ້​ບໍລິການ​ບໍ່​ຖືກ​ຕາມ​ເຕັກນິກ​ວິຊາ​ການ​ແພດ ​ແລະ ​ເກີດ​ມີ​ຜົນ​ເສຍ​ຫາຍ​ທາງ​ດ້ານ​ສຸຂະພາບໂຮງໝໍ​ຕ້ອງ​ຮັບຜິດຊອບ​ຄ່າ​ໃຊ້​ຈ່າຍ​ທຸກ​ຢ່າງ​ທີ່​ເກີດ​ຂຶ້ນຝ່າຍ​ດຽວ ​ໂດຍ​ມີ​ການ​ສັນ​ນະ​ສູດ ​ແລະ ຢັ້ງຢືນ​ທາງ ການ​ແພດ.

ນອກນີ້, ສະມາຊິກ​ປະກັນ​ສັງຄົມ​​ແມ່ນມີ​ສິດ​ຮ້ອງ​ຮຽນ​ເຖິງ​ຫ້ອງການ​ກອງ​ທຶນ​ປະກັນ​ສັງຄົມ​ແຫ່ງ​ຊາດ ຫລື ​ໂຮງໝໍ​​ກ່ຽວຂ້ອງ​ໃນ​ກໍລະນີ​ທີ່​ບໍ່​ໄດ້​ຮັບ​ຄວາມ​ຍຸຕິ​ທຳ​ໃນ​ການ​ໄປ​ຊົມ​ໃຊ້​ການ​ບໍລິການ​ປິ່ນປົວ​ເພື່ອ​ໃຫ້​ພາກສ່ວນ​ກ່ຽວຂ້ອງ​ຮັບ​ຊາບ ​ແລະ ພິຈາລະນາ​ແກ້​ໄຂ​ຕາມ​ລະບຽບ​ການ. ນອກຈາກ​ນີ້, ຫ້ອງການ​ກອງທຶນ​ດັ່ງກ່າວ​ຍັງ​ໄດ້​​ເປີດ​​ໂທລະສັບສາຍ​ດ່ວນປະກັນ​ສັງຄົມ​ໝາຍ​​ເລກ 020-55489030 ​ແລະ 020-54346222 ​ເພື່ອ​ໃຫ້​ຄໍາ​ແນະ​ນໍາ​ໃນ​ກໍລະນີ​ມີ​ບັນຫາ​ດ້ານ​ການ​ປິ່ນປົວຕ່າງໆ, ທັງ​ຮັບ​ຄໍາ​ສະ​ເໜີ​ ​ແລະ ສ່ອງ​ແສງ​ຈາກ​ສັງຄົມຕໍ່​ຈັນ​ຍາ​ບັນ ​ແລະ ມາລະຍາດ​ຂອງພະນັກງານ​ແພດ​ໝໍ ​ເພື່ອ​ໃຫ້​ມີ​ການ​​ປັບປຸງ​ແກ້​ໄຂ​ດີກວ່າ​ເກົ່າ, ​ແນ​ໃສ່​​ເຮັດ​ໃຫ້ຜູ້​ທີ່​ໄດ້ປະກອບສ່ວນ​ເງິນ​ເຂົ້າ​ກອງ​ທຶນ​ປະກັນ​ສັງ​ຄົມ​​ໃຫ້ໄດ້​ຮັບ​ການ​ບໍລິການ​ປິ່ນປົວ​ສຸຂະພາບທີ່​ມີປະສິດທິພາບ ​ແລະ ປະສິດທິ​ຜົນດີ​ຂຶ້ນ.

ບົດຄວາມຫຼ້າສຸດ

ພໍ່ເດັກອາຍຸ 14 ທີ່ກໍ່ເຫດກາດຍິງໃນໂຮງຮຽນ ທີ່ລັດຈໍເຈຍຖືກເຈົ້າໜ້າທີ່ຈັບເນື່ອງຈາກຊື້ປືນໃຫ້ລູກ

ອີງຕາມສຳນັກຂ່າວ TNN ລາຍງານໃນວັນທີ 6 ກັນຍາ 2024, ເຈົ້າໜ້າທີ່ຕຳຫຼວດຈັບພໍ່ຂອງເດັກຊາຍອາຍຸ 14 ປີ ທີ່ກໍ່ເຫດການຍິງໃນໂຮງຮຽນທີ່ລັດຈໍເຈຍ ຫຼັງພົບວ່າປືນທີ່ໃຊ້ກໍ່ເຫດເປັນຂອງຂວັນວັນຄິດສະມາສທີ່ພໍ່ຊື້ໃຫ້ເມື່ອປີທີ່ແລ້ວ ແລະ ອີກໜຶ່ງສາເຫດອາດເປັນເພາະບັນຫາຄອບຄົບທີ່ເປັນຕົ້ນຕໍໃນການກໍ່ຄວາມຮຸນແຮງໃນຄັ້ງນີ້ິ. ເຈົ້າໜ້າທີ່ຕຳຫຼວດທ້ອງຖິ່ນໄດ້ຖະແຫຼງວ່າ: ໄດ້ຈັບຕົວ...

ປະທານປະເທດ ແລະ ນາຍົກລັດຖະມົນຕີ ແຫ່ງ ສປປ ລາວ ຕ້ອນຮັບວ່າທີ່ ປະທານາທິບໍດີ ສ ອິນໂດເນເຊຍ ຄົນໃໝ່

ໃນຕອນເຊົ້າວັນທີ 6 ກັນຍາ 2024, ທີ່ສະພາແຫ່ງຊາດ ແຫ່ງ ສປປ ລາວ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ...

ແຕ່ງຕັ້ງປະທານ ຮອງປະທານ ແລະ ກຳມະການ ຄະນະກຳມະການ ປກຊ-ປກສ ແຂວງບໍ່ແກ້ວ

ວັນທີ 5 ກັນຍາ 2024 ແຂວງບໍ່ແກ້ວ ໄດ້ຈັດພິທີປະກາດແຕ່ງຕັ້ງປະທານ ຮອງປະທານ ແລະ ກຳມະການ ຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ແຂວງບໍ່ແກ້ວ ໂດຍການເຂົ້າຮ່ວມເປັນປະທານຂອງ ພົນເອກ...

ສະຫຼົດ! ເດັກຊາຍຊາວຈໍເຈຍກາດຍິງໃນໂຮງຮຽນ ເຮັດໃຫ້ມີຄົນເສຍຊີວິດ 4 ຄົນ ແລະ ບາດເຈັບ 9 ຄົນ

ສຳນັກຂ່າວຕ່າງປະເທດລາຍງານໃນວັນທີ 5 ກັນຍາ 2024 ຜ່ານມາ, ເກີດເຫດການສະຫຼົດຂຶ້ນເມື່ອເດັກຊາຍອາຍຸ 14 ປີກາດຍິງທີ່ໂຮງຮຽນມັດທະຍົມປາຍ ອາປາລາຊີ ໃນເມືອງວິນເດີ ລັດຈໍເຈຍ ໃນວັນພຸດ ທີ 4...