ສຳນັກຂ່າວຕ່າງປະເທດ ລາຍງານໃນວັນທີ 26 ກໍລະກົດນີ້ວ່າ ກອງກຳລັງອີຣັກ ໄດ້ຈັບກຸມນັກຮົບຂອງກຸ່ມໄອເອັສລາຍໜຶ່ງໄດ້ ໃນຂະນະທີ່ປອມຕົວເປັນຜູ້ຍິງເພື່ອຫລົບໜີອອກຈາກເມືອງໂມຊູນ ເມືອງໃຫຍ່ອັນດັບ 2 ຂອງປະເທດ, ພາຍຫລັງທີ່ກອງກຳລັງຝ່າຍລັດຖະບານອີຣັກ ພະຍາຍາມປົດປ່ອຍເມືອງດັ່ງກ່າວຄືນ ຈົນສາມາດປົດປ່ອຍໄດ້ຢ່າງສົມບູນ ພາຍຫລັງຖືກຍຶດຄອງຈາກກຸ່ມດັ່ງກ່າວມາດົນເຖິງ 3 ປີ ນັບຕັ້ງແຕ່ເດືອນມິຖຸນາປີ 2014 ຜ່ານມາ.

ນັກຮົບລາຍດັ່ງກ່າວນີ້ ໄດ້ແຕ່ງກາຍເປັນຜູ້ຍິງແບບຈັດເຕັມ ມີການນຸ່ງເສື້ອຜ້າ ແລະ ແຕ່ງໜ້າທາຕາຢ່າງຄົບຊຸດ ແຕ່ຊ້ຳພັດລືມແຖໜວດ ແລະ ຂົນຄິ້ວທີ່ດົກໜາເກີນທຳມະຊາດຂອງຜູ້ຍິງ ຈຶ່ງເຮັດໃຫ້ຖືກສົງໃສ ແລະ ຈັບກຸມໃນທີ່ສຸດ. ດ້ານກອງກຳລັງອີຣັກໄດ້ເປີດເຜີຍວ່າ ນອກຈາກນັກຮົບລາຍດັ່ງກ່າວນີ້ແລ້ວ ຍັງມີນັກຮົບໄອເອັສອີກຫລາຍຄົນ ພະຍາຍາມແຕ່ງຕົວປອມເປັນຜູ້ຍິງ ເພື່ອຫລົບໜີອອກໄປຈາກເມືອງ ແຕ່ກໍຖືກຈັບກຸມໄດ້ເຊັ່ນກັນ.