ສຳນັກຂ່າວຕ່າງປະເທດ ລາຍງານໃນວັນທີ 17 ກໍລະກົດຜ່ານມານີ້ວ່າ ນັກທ່ອງທ່ຽວນຳນວນຫລວງຫລາຍ ໄດ້ແຫ່ກັນເຂົ້າຊົມ ຜາສາດຫີນໂບໄພກຸກ ແຫລ່ງມໍລະດົກໂລກແຫ່ງໃໝ່ຫລ້າສຸດຂອງກຳປູເຈຍ ໃນໄລຍະທ້າຍອາທິດທີ່ຜ່ານມານີ້ ຫລັງຈາກທີ່ຜາສາດຫີນດັ່ງກ່າວ ໄດ້ຖືກຮັບຮອງຂຶ້ນທະບຽນໂດຍອົງການຢູເນສໂກ ຂອງສະຫະປະຊາຊາດ ເມື່ອວັນທີ 8 ກໍລະກົດທີ່ຜ່ານມາ.
ຜາສາດຫີນໂບໄພກຸກ ຕັ້ງຢູ່ແຂວງກຳປົງທົມ ຫ່າງຈາກນະຄອນຫລວງພະນົມເປັນ ໄປທາງທິດເໜືອປະມານ 206 ກິໂລແມັດ ເປັນມໍລະດົກໂລກແຫ່ງທີ 3 ຂອງກຳປູເຈຍແລ້ວ ໂດຍລະບຸວ່າ ພື້ນທີ່ດັ່ງກ່າວຄືເມືອງອິສານປຸຣະ ເມືອງຫລວງຂອງອານາຈັກເຈນລະ ອາລະຍະທຳຂອມທີ່ຈະເລີນຮຸ່ງເຮືອງ ໃນທ້າຍສະຕະວັດທີ 6 ເຖິງຕະສະວັດທີ 7.
ທ່ານ ແຊມ ນອມ ຜູ້ຮັບຜິດຊອບຜາສາດຫີນດັ່ງກ່າວໄດ້ກ່າວວ່າ ຕອນນີ້ຜາສາດຫີນໄດ້ຂຶ້ນທະບຽນເປັນມໍລະດົກໂລກແລ້ວ ຂ້າພະເຈົ້າຫວັງວ່າ ປະຊາຊົນຂອງເຮົາຈະໄດ້ປະໂຫຍດຈາກບ່ອນນີ້ ແລະ ຂ້ອຍຕ້ອງຂໍຂອບໃຈເຖິງບັນພະບູລຸດຂອງພວກເຮົາ ທີ່ໄດ້ສ້າງສິ່ງເຫລົ່ານີ້ ແລະ ເກັບຮັກສາໃຫ້ເຮົາຈົນເຖິງທຸກວັນນີ້.
ອີງຕາມການລາຍງານຂອງທາງການກຳປູເຈຍລະບຸວ່າ ຈຳນວນນັກທ່ອງທ່ຽວທີ່ເດີນທາງເຂົ້າກຳປູເຈຍ ເມື່ອປີກາຍຜ່ານມາຢູ່ທີ່ 5 ລ້ານຄົນ ຊຶ່ງປີນີ້ມີການຄາດວ່າ ຈະມີນັກທ່ອງທ່ຽວເດີນທາງເຂົ້າປະເທດ ປະມານ 5.5 ລ້ານຄົນ.
