ເຊົ້າມື້ນີ້, ວັນທີ 16 ກໍລະກົດ 2017 ໄດ້ມີຜູ້ໃຊ້ເຟສບຸກຊື່ ອີ່ນ້ອງມົດໂຕນ້ອຍ ແຕ່ຮັກຈິງ ໂພສຮູບທີ່ຄ້າຍຄືຮູບປັ້ນພະຍານາກ ທີ່ກຳລັງລອຍຢູ່ເທິງແມ່ນໍ້າ ເຊິ່ງລະບຸວ່າເປັນແມ່ນໍ້າຂອງ ບໍລິເວນບ້ານທ່າສະຫວ່າງ ເມືອງໄຊບູລີ ແຂວງສະຫວັນນະເຂດ ໂດຍມີຂໍ້ຄວາມອະທິບາຍວ່າ “ພະຍານາກຂຶ້ນຢູ່ແມ່ນ້ຳຂອງບ້ານຂ້ອຍນີ່ແລະມື້ວານນີ້ຄັ້ງແລກຂອງຊີວິດທີ່ໄດ້ເຫັນຝາກກົດໄລ້ກົດແຊແນ່ເດີ ຂຶ້ນຢູ່ບ້ານທ່າສະຫວ່າງ ເມືອງໄຊບູລີ ແຂວງສະຫວັນນະເຂດ ໃຜແຊຂໍໃຫ້ລ້ຳລວຍລ້ຳລວຍສາທຸສາທຸສາທຸ” ແລະ ປະກອບມີຮູບ 5 ຮູບ ທີ່ຖ່າຍແຕ່ລະຮູບຄົນລະມຸມ ແຕ່ທ່າພະຍານາກຕັ້ງຄໍຊູຫົວຂຶ້ນເໜືອນໍ້າໃນອົງສາດຽວກັນ ສ່ວນລຳໂຕນັ້ນແມ່ນຈົມຢູ່ນໍ້າ. ແລະໃນຂະນະທີ່ເຟສບຸກແຟນເພຈທີ່ໃຊ້ຊື່ວ່າ: Tolin Studio-ໂຕຫລີ່ນສະຕູດິໂອ ໄດ້ໂພສຮູບດັ່ງກ່າວພ້ອມຮູບປະຊາຊົນກຳລັງເຝົ້າເບິ່ງບາງຢ່າງເທີງໜ້ານໍ້າ.
ໂພສດັ່ງກ່າວນັ້ນ ໄດ້ມີຜູ້ພົບເຫັນແລະພາກັນເຂົ້າມາກົດໄລ້ ຂໍພອນ ແລະແຊຕໍ່ຫຼາຍກວ່າ 22,000 ຄັ້ງ. ໃນຂະນະດຽວກັນ, ກໍມີຜູ້ຕັ້ງຂໍ້ສົງໄສວ່າ ຮູບພາບດັ່ງກ່າວນັ້ນອາດຈະເປັນພຽງຮູບພາບຕັດຕໍ່ທໍ່ນັ້ນ. ຕົວຢ່າງຂໍ້ສັງເກດມີຄື:
1. ສັງເກດເຫັນວ່າ ຮູບແຕ່ລະໃບແມ່ນຖ່າຍຕ່າງມຸມ ແຕ່ວ່າທ່າຂອງພະຍານາກດັ່ງກ່າວຢູ່ໃນທ່າຊູຄໍໃນອົງສາດຽວກັນ ຫຼືບໍ່ມີການເຄື່ອນໄຫວໃດໆ ເຊິ່ງຖ້າເປັນສິ່ງທີ່ມີຊີວິດກໍຄວນຕ້ອງມີການເຄື່ອນໄຫວຂຶ້ນໆ ລົງໆ.
2. ຖ້າເປັນເລື່ອງຈິງແລະອີງໃສ່ຈຳນວນຮູບດັ່ງກ່າວນັ້ນແລ້ວ (ຄ້າຍຄືຖ່າຍໄດ້ຫຼາຍມຸມ) ເປັນໄປໄດ້ຍາກທີ່ຈະມີຄົນກ້າທີ່ຈະຂີ່ເຮືອອອກໄປໃກ້ໆ ແລ້ວໃຊ້ໂທລະສັບມືຖືຖ່າຍຮູບພະຍານາກດັ່ງກ່າວ.
3. ລັກສະນະຂອງພະຍານາກແມ່ນຢູ່ບ່ອນເກົ່າ ແຕ່ພັດບໍ່ເຫັນລັກສະນະການໄຫຼຂອງນໍ້າໃນບໍລິເວນຄໍພະຍານາກຜີກອອກແຕ່ຢ່າງໃດ.
4. ສັງເກດແຕ່ລະຮູບຄ້າຍຄືວ່າບໍ່ແມ່ນບ່ອນດຽວກັນ (ສັງເກດຕະຝັ່ງ)
5. ຮູບປະຊາຊົນທີ່ໄປຢືນເບິ່ງນັ້ນ ຄ້າຍຄືບໍ່ແມ່ນຮູບຢູ່ລາວ ສັງເກດຈາກຫຼັງເສື້ອຂອງປະຊາຊົນ, ຮູບທຸງຊາດ ແລະຮູບເຮືອນແຄມຝັ່ງ ແລະໄດ້ມີເຮືອຢູ່ແຄມຝັ່ງນໍາອີກ.
6. ຮູບພາບພະຍາກດັ່ງກ່າວຄືຮູບປັ້ນພະຍານາກໃນຕຳນານຫຼາຍກວ່າພະຍານາກຕົວຈິງ ເພາະພະຍານາກຕົວຈິງກໍຄືງູໃຫຍ່ ເຊິ່ງລັກສະນະຂອງສຽນ(ຫົວ) ພະຍານາກຄົງບໍ່ເປັນດັ່ງໃນຮູບ.
7. ບໍ່ປາກົດເຫັນຮູບທີ່ຫຼາກຫຼາຍກວ່າທີ່ເຫັນ ແລະ ບໍ່ມີຄລິບວິດີໂອ ສະແດງວ່າຮູບດັ່ງກ່າວນັ້ນມາຈາກຄົນພຽງຄົນດຽວ ຖ້າມີຫຼາຍຄົນເຫັນອາດຈະມີຮູບຫຼາຍລັກສະນະກວ່ານີ້ ຫຼື ມີຄລິບວິດີໂອພ້ອມ.
8. ສອບຖາມໄປຍັງນັກຂ່າວແຂວງສະຫວັນນະເຂດແລ້ວບອກວ່າ ຍັງບໍ່ເຫັນຂ່າວນີ້. ແລະສື່ກະແສຫຼັກທີ່ໜ້າເຊື່ອຖືກໍບໍ່ໄດ້ລາຍງານ. ຖ້າເປັນເລື່ອງຈິງສື່ກະແສຫຼັກຂອງປະເທດເພື່ອນບ້ານຄົງບໍ່ພາດທີ່ຈະລາຍງານຢືນຢັນຢ່າງແນ່ນອນ.
ຂໍ້ສັງເກດດັ່ງກ່າວຂ້າງເທິງນັ້ນອາດຈະບໍ່ຖືກຕ້ອງກໍໄດ້ ແລະເລື່ອງດັ່ງກ່າວກໍເປັນພຽງຄວາມເຊື່ອສ່ວນບຸກຄົນ ເຊິ່ງທີມງານພວກເຮົາເຄົາລົບຕໍ່ສິດທິຄວາມເຊື່ອສ່ວນຕົວຂອງແຕ່ລະຄົນ ຈຶ່ງຂໍຝາກບົດຄວາມສັງເກດການນີ້ໄປຍັງບັນດາທ່ານຜູ້ອ່ານຈົ່ງໄດ້ໃຊ້ວິຈາລະນາຍານໃນການເຊື່ອຂ່າວຕ່າງໆ ເທິງໜ້າເຟສບຸກຂອງທ່ານດ້ວຍ.
