ຂປລ. ທ່ານ ຫງວຽນ ບາ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ລາວ ກ່າວວ່າ: ການພົວພັນດ້ານການເມືອງ ກໍຄືການພົວພັນດ້ານການທູດ ລະຫວ່າງສອງຝ່າຍລາວ-ຫວຽດນາມ ແລະ ຫວຽດນາມ-ລາວ ໃນໄລຍະ 55 ປີຜ່ານມາ ໄດ້ປະກົດຜົນສໍາເລັດຢ່າງຫລວງຫລາຍ ໂດຍການແລກປ່ຽນຢ້ຽມຢາມລະຫວ່າງການນຳຂັ້ນສູງຢ່າງລຽນຕິດ, ການຈັດກອງປະຊຸມປຶກສາຫາລືຮ່ວມກັນ, ການຄ້າ, ການລົງທຶນ, ສ້າງພັດທະນາເສດຖະກິດ-ສັງຄົມ, ການສຶກສາ ແລະ ອື່ນໆ.
ສະເພາະໃນປີ 2017 ນີ້ ກໍໄດ້ມີການແລກປ່ຽນຫລາຍຄະນະນຳຂັ້ນສູງຂອງ ສສ ຫວຽດນາມຢ້ຽມຢາມ ສປປ ລາວ ແລະ ການນຳຂັ້ນສູງຂອງ ສປປ ລາວ ຢ້ຽມຢາມ ສສ ຫວຽດນາມ ເພື່ອສືບຕໍ່ເສີມຂະຫຍາຍພົວພັນ ລະຫວ່າງສອງພັກ-ສອງລັດ ແລະ ປະຊາຊົນສອງຊາດ, ທັງປຶກສາຫາລືແລກປ່ຽນບັນຫາສະເພາະ ເພື່ອຊຸກຍູ້ການພົວພັນຮ່ວມມືລະຫວ່າງສອງຊາດ. ການພົວພັນການທູດສອງຝ່າຍ ແມ່ນອີງໃສ່ມູນເຊື້ອແຕ່ອະດີດຫລາຍທົດສະວັດຜ່ານມາ ທີ່ສອງຊາດໄດ້ຮ່ວມກັນຕໍ່ສູ້ຕ້ານສັດຕູໂຕດຽວກັນ, ອີກປັດໄຈໜຶ່ງ ແມ່ນຄວາມເຊື່ອໝັ້ນລະຫວ່າງສອງຝ່າຍທີ່ເລິກເຊິ່ງ ເຮັດໃຫ້ການພົວພັນຮ່ວມມືທາງດ້ານການເມືອງ ແລະ ການທູດ ມີການພັດທະນາຢ່າງຈົບງາມ.
ສຳລັບການພົວພັນທາງເສດຖະກິດ ຍິ່ງເປັນອົງປະກອບສຳຄັນໃນການພົວພັນຫວຽດນາມ-ລາວ ເພາະວ່າສອງຊາດແມ່ນມີຄວາມມຸ່ງຫວັງ ແລະ ເປົ້າໝາຍອັນດຽວກັນ ໃນການສ້າງສາພັດທະນາປະເທດຊາດ ໃຫ້ມີຄວາມສີວິໄລ ແລະ ນຳເອົາຊີວິດການເປັນຢູ່ທີ່ດີຂຶ້ນມາສູ່ປະຊາຊົນທັງສອງຊາດ, ສະນັ້ນພວກເຮົາຈິ່ງໄດ້ແບ່ງປັນຜົນປະໂຫຍດ ແລະ ເປົ້າໝາຍການພົວພັນເສດຖະກິດ ໂດຍສະເພາະແມ່ນການລົງທຶນ ແລະ ການຄ້າ ໃຫ້ນັບມື້ເພີ່ມທະວີຂຶ້ນເລື້ອຍໆ.
ຢ່າງໃດກໍຕາມ ຍັງມີບາງຄັ້ງບາງຂົງເຂດພົບຄວາມຫຍຸ້ງຍາກ ແລະ ມີຂໍ້ຈຳກັດ ແຕ່ວ່າທັງສອງຝ່າຍ ກໍໄດ້ມີການກວດພົບ ແລະ ແກ້ໄຂທັນເວລາ, ເຮັດແນວໃດ ເພື່ອເພີ່ມທະວີປັບປຸງການພົວພັນທາງດ້ານເສດຖະກິດລະຫວ່າງສອງປະເທດ ແລະ ເຮັດໃຫ້ການພົວພັນເສດຖະກິດ ເປັນເສົາຄ້ຳອັນແໜ້ນແກ່ນ ໃຫ້ສົມກັບການພົວພັນການເມືອງທີ່ດີຂອງສອງຝ່າຍ.
ສຳລັບການພົວພັນດ້ານປ້ອງກັນຊາດ-ປ້ອງກັນຄວາມສະຫງົບ ແມ່ນດີຫລາຍບົນຟື້ນຖານຄວາມເຂົ້າອົກເຂົ້າໃຈ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ, ທັງມີບາດກ້າວຂະຫຍາຍຕົວດ້ວຍຜົນສຳເລັດຢ່າງຕັ້ງໜ້າ ໃນນັ້ນ, ສອງຝ່າຍໄດ້ຮ່ວມກັນປະສານສົມທົບ ຮັກສາຄວາມສະຫງົບທາງດ້ານການເມືອງ ແລະ ສັງຄົມຂອງແຕ່ລະປະເທດ ຮັບປະກັນລະບອບການເມືອງການປົກຄອງຂອງ ແຕ່ລະຊາດ. ເມື່ອບໍ່ດົນມານີ້ ຫວຽດນາມໄດ້ບັນລຸຫລາຍຂໍ້ຕົກລົງທີ່ສຳຄັນ ເຊິ່ງໃນນັ້ນ ລວມມີບັນຫາຊາດກ່ຽວກັບການຄຸ້ມຄອງ ແລະ ບໍລິຫານດ່ານຊາຍແດນ ລະຫວ່າງລາວ-ຫວຽດນາມ ກໍຄືປະເທດອື່ນໆ ລ້ວນແຕ່ເປັນບັນຫາຫຍຸ້ງຍາກສົມຄວນ ແຕ່ກໍສາມາດຍາດມາໄດ້ຜົນສຳເລັດ ອັນສະແດງໃຫ້ເຫັນເຖິງຄວາມສະໜິດສະໝົມໄວ້ເນື້ອເຊື່ອໃຈກັນ ແລະ ການຮ່ວມມືຢ່າງຈິງໃຈ ເພື່ອເຮັດໃຫ້ມີເສັ້ນຊາຍແດນທີ່ມີສັນຕິພາບ ແລະ ສະຖຽນລະພາບ ລະຫວ່າງສອງຊາດ.
ທ່ານ ທູດ ຫງວຽນ ບາ ຮຸ່ງ ໃຫ້ຮູ້ອີກວ່າ: ສະເພາະການຮ່ວມມື ຊ່ວຍເຫລືອດ້ານການສຶກສາ ສອງຝ່າຍ ປັດຈຸບັນກໍມີ ນັກຮຽນນັກສຶກສາລາວ ໄປຮຽນຢູ່ຫວຽດນາມຫລາຍກວ່າ 14.000 ຄົນ ແລະ ມີນັກສຶກສາຫວຽດນາມ 100 ກວ່າຄົນກຳລັງສຶກສາຢູ່ລາວ ເຊິ່ງເປັນຜົນສຳເລັດທີ່ດີ ແລະ ແມ່ນໜຶ່ງກຳລັງແຮງອັນສຳຄັນ ຂອງການພົວພັນສອງຊາດ ປັດຈຸບັນ ບັນດາກະຊວງ, ຂະແໜງການ ແລະ ທ້ອງຖິ່ນຈະໄດ້ສືບຕໍ່ປະສານສົບທົບ ເພື່ອເພີ່ມທະວີວຽກງານການສຶກສາ, ກໍ່ສ້າງ, ຝຶກອົບຮົມ ແລະ ບຳລຸງພະນັກງານ ໃນແຕ່ລະຂັ້ນ. ການສຶກສານີ້ກໍແມ່ນຈຸດສຳຄັນ ແລະ ຄວາມແຈ້ງສະຫວ່າງ ຂອງການພົວພັນຫວຽດ-ລາວ ກໍຄືການຮ່ວມມືລະຫວ່າງ ປະຊາຊົນສອງຊາດ ໃຫ້ມີຄວາມຍືນຍົງຕະຫລອດໄປ.
ແຫລ່ງຂ່າວ: ຂປລ