ສຳນັກຂ່າວຕ່າງປະເທດລາຍງານຈາກ ນະຄອນຫຼວງ ເບຣຸດ ປະເທດເລບານອນ ເມື່ອວັນທີ 9 ກໍລະກົດວ່າ ຂໍ້ຕົກລົງຢຸດຍິງ ຄວບຄຸມຮອດແຂວງ ກູເນຕາ ແລະ ແຂວງ ຊະໄວດາ ມີຜົນບັງຄັບໃຊ້ຢ່າງເປັນທາງການນັບຕັ້ງແຕ່ເວລາທ່ຽງຄືນຕາມເວລາທ້ອງຖິ່ນ ໂດຍເປັນຜົນມາຈາກການເຈລະຈານອກຮອບຫຼາຍຄັ້ງລະຫວ່າງສະຫະລັດກັບຣັດເຊຍ ຮ່ວມດ້ວຍຈໍແດນ ໃນຮອບຫຼາຍເດືອນທີ່ຜ່ານມາ ແລະ ມີການປະກາດຢ່າງເປັນທາງການໃນການພົບປະຫາລືເປັນຄັ້ງທຳອິດຂອງປະທານາທິບໍດີ ໂດນັລ ທຣັມ ກັບປະທານາທິບໍດີ ວາລາດີເມຍ ປູຕິນ ນອກຮອບການປະຊຸມສຸດຍອດຜູ່ນຳກຸ່ມປະເທດເສດຖະກິດຂະໜາດ ຈີ 20 ເຊິ່ງຈັດຂຶ້ນທີ່ ເຢຍລະມັນ ໃນວັນສຸກທີ່ຜ່ານມາ.

ຂໍ້ຕົກລົງດັ່ງກ່າວຖືເປັນການຮ່ວມມືກັນໃນຄັ້ງທຳອິດຂອງລັດຖະບານວໍຊິງຕັນ ກັບ ລັດຖະບານມອສກູ ໃນການພະຍາຍາມສ້າງຄວາມໝັ້ນຄົງໃຫ້ເກີດຂຶ້ນໃນສະມໍລະພູມຊີເຣຍ ທີ່ມີການຕໍ່ສູ້ຢືດເຢື້ອມາຕັ້ງແຕ່ປີ 2011 ແລະ ສົ່ງຜົນໃຫ້ມີຄົນເສຍຊີວິດແລ້ວກວ່າ 320,000 ຄົນ.