ການເບິ່ງວ່າ ຢາໝົດອາຍຸ ຫລື ບໍ່ນັ້ນ ເລີ່ມຕົ້ນ ຄືເບິ່ງມື້ໝົດອາຍຸຂອງຢາ ທີ່ລະບຸໄວ້ເທິງສະຫລາກຢາ ແລະ ຖ້າຢານັ້ນບໍ່ມີມື້ບອກໝົດອາຍຸ ອາດເບິ່ງຈາກມື້ເດືອນປີທີ່ຜະລິດ ຊຶ່ງທົ່ວໆໄປເຮົາຖືວ່າ ຫາກເປັນຢານ້ຳຈະເກັບໄວ້ໄດ້ປະມານ3 ປີນັບຈາກມື້ຜະລິດ ແລະ ຫາກເປັນຢາເມັດຈະເກັບໄວ້ໄດ້ 5 ປີ ແລະ ຖ້າເປັນຢາຢອດຕາ ຫາກເປີດໃຊ້ແລ້ວເກັບໄວ້ໄດ້ພຽງໜຶ່ງເດືອນ
ນອກຈາກນີ້ ເຮົາຍັງມີວິທີສັງເກດຢາທີ່ເສື່ອມຄຸນນະພາບດ້ວຍວິທີດັ່ງຕໍ່ໄປນີ້
- ຢາເມັດ ສັງເກດວ່າ ເມັດຢາຈະແຕກ ສີປ່ຽນໄປ ມີຈຸດດ່າງ ຂຶ້ນໂໝກ ຫລື ຫາກເປັນຢາເມັດເຄືອບນ້ຳຕານ (ເຊັ່ນ ວິຕາມິນລວມ) ເມັດຢາອາດໜຽວມີກິ່ນຫືນ ຫລືກິ່ນຜິດໄປຈາກເກົ່າ
- ຢາແຄບຊູນ ສັງເກດວ່າ ແຄບຊູນຈະບວມ ໂພງອອກ ຫລື ລວມກັນ ຜົງຢາໃນແຄບຊູນປ່ຽນສີ ເຊັ່ນ ຢາ ເຕຕາໄຊຄິນ ທີ່ເສຍຄຸນແລ້ວ ຜົງຢາຈະປ່ຽນຈາກສີເຫລືອງເປັນສີນ້ຳຕານ ຊຶ່ງເປັນອັນຕະລາຍຕໍ່ຫມາກໄຂ່ຫລັງຫລາຍ
- ຢານ້ຳ ເຊັ່ນ ຢາຫລຸດກົດ ຢາ ຄາລາໄມນທາແກ້ຄັນ ຫາກເສື່ອມສະພາບ ຕະກອນຈະຈັບກັນເປັນກ້ອນ ເກາະຕິດກັນແໜ້ນ ສັ່ນແລ້ວບໍ່ກະຈາຍຕົວແບບເກົ່າ ມີຄວາມເຂັ້ມຂຸ້ນ ກິ່ນ ສີ ຫລື ລົດຊາດປ່ຽນໄປ
- ຢານ້ຳ(ຫວານ) ເຊັ່ນ ຢາແກ້ໄອ ຫາກໝົດອາຍຸ ຢາຈະມີລັກສະນະຂຸ່ນມີຕະກອນ ຜົງຕົວຢາລະລາຍບໍ່ໝົດ ສີປ່ຽນ ມີກິ່ນບູດສົ້ມ
- ຢາຂີ້ເຜິ້ງ ແລະ ຄີມ ຖ້າພົບວ່າ ເນື້ອຢາແຂງຫລືອ່ອນກວ່າເກົ່າ ເນື້ອບໍ່ລຽບ ເນື້ອຢາແຫ້ງແຂງ ຫລື ສີຂອງຢາປ່ຽນໄປ ໃຫ້ຖິ້ມເລີຍ
ເມື່ອຮູ້ກັນຈັ່ງຊີ້ແລ້ວ ທາງທີ່ດີບໍ່ຄວນສ່ຽງໃຊ້ຢາໝົດອາຍຸ ເພາະອາດເກີດອັນຕະລາຍກັບຮ່າງກາຍຂອງທ່ານພາຍຫລັງໃຊ້ຢາໄດ້