ຂປລ. ຕາມຂໍ້ມູນຈາກ ພະແນກກະສິກໍາ ແລະ ປ່າໄມ້ແຂວງໄຊຍະບູລີ ໃຫ້ຮູ້ວ່າ: ໃນ​ໄລຍະ 6 ເດືອນຜ່ານມາ ແຂວງໄຊຍະບູລີ ໄດ້ສົ່ງອອກສິນຄ້າກະສິກໍາ ແລະ ສັດລ້ຽງ ອອກຕ່າງປະເທດ ລວມມູນຄ່າທັງໝົດ 13 ລ້ານກວ່າໂດລາ. ອັນພົ້ນເດັ່ນກວ່າໝູ່ແມ່ນມັນຕົ້ນແຫ້ງ 20.400 ໂຕນ, ມູນຄ່າ 5 ລ້ານໂດລາ, ມັນຕົ້ນດິບ 12 ໂຕນ, ມູນຄ່າ 640.000 ໂດລາ, ສາລີແຂງ 180.000 ໂຕນ, ມູນຄ່າ 2 ລ້ານໂດລາ, ໝາກໂມ 815 ໂຕນ, ມູນຄ່າ 120.000 ໂດລາ, ກ້ວຍຫອມ 3.650 ໂຕນ, ມູນຄ່າ 547.500 ກວ່າໂດລາ ແລະ ພືດອື່ນໆ ຈຳນວນ​ໜຶ່ງ. ສ່ວນ​ການ​ສົ່ງ​ອອກ​ ສັດລ້ຽງມີທັງໝົດ 33.418 ໂຕ.ໃນນີ້ມີງົວ 3.402 ໂຕ, ຄວາຍ 2.560ໂຕ ​ແລະ ໝູ 27.456 ໂຕ.

ປັດຈຸບັນ, ການ​ລ້ຽງສັດຢູ່​ແຂວງ​ໄຊ​ຍະ​ບູລີ ​ເປັນ​ວ່າ​ນັບ​ມື້​ມີ​ການ​ຂະຫຍາຍຕົວ​ດີ​ຂຶ້ນ ​ເນື່ອງ​ຈາກ​ວ່າ ປະຊາຊົນ​ໄດ້​ຫັນ​ການ​ລ້ຽງສັດ​ ແບບ​ທຳ​ມະ​ຊາດ ກ້າວໄປສູ່ການລ້ຽງແບບເປັນກຸ່ມ, ເປັນຟາມ ແລະ ຍັງມີການປູກຫຍ້າ, ລ້ຽງສັດໃຫຍ່ຕື່ມອີກ. ເຊິ່ງເຫັນວ່າໃນທົ່ວແຂວງ ມີຟາມລ້ຽງສັດໃຫຍ່ ແລະ ສັດປີກທັງໝົດ 63 ຟາມ, ຟາມງົວ 6 ຟາມ ​ແລະ ຟາມໝູ 25 ຟາມ.

ແຫລ່ງຂ່າວ: ຂປລ