ວັນທີ 18 ສິງຫາ 2014 ທີ່ກະຊວງສາທາລະນະສຸກ ທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການ
ກະຊວງສາທາລະນະສຸກ ໄດ້ອອກຖະແຫຼງຂ່າວກ່ຽວກັບການກະກຽມສະກັດກັ້ນພະຍາດ ໄວຣັດອີໂບລາ (Ebola)
ທີ່ກຳລັງມີການລະບາດໃຫຍ່ໃນປະເທດເຊລາລີອອນ (Sierra Leone) ໄລບີເລຍ (Liberia) ກິນີ (Guinea) ແລະ
ໄນຈີເລຍ (Nigeria) ຂອງທະວີບອາຟຣິກກາ ຕາມການລາຍງານຫຼ້າສຸດຂອງອົງການອະນາໄມໂລກ ກໍລະນີສະ
ສົມຈົນເຖິງວັນທີ 16 ສິງຫາ 2014 ມີຈຳນວນທັງໝົດ 2.240 ກໍລະນີ ໃນນັ້ນ ເສຍຊີວິດແລ້ວ 1.229 ຄົນ.
ເຊື້ອຈຸລະໂລກອີໂບລາ ແມ່ນເຊື້ອຈຸລະໂຣກທີ່ພາໃຫ້ເກີດພະຍາດໃນຄົນ ຄົ້ນພົບຄັ້ງທຳອິດໃນປີ 1976 ທີ່ປະເທດ
ສາທາລະນະລັດ ປະຊາທິປະໄຕ ກົງໂກ (Congo) ແລະ ປະເທດຊູດານ (Sudan) ເຊື້ອຈຸລະໂຣກອີໂບລາ ແມ່ນໃສ່
ຕາມຊື່ແມ່ນ້ຳອີໂບລາຢູ່ ສ ກົງໂກ ໂຕເຈຍເປັນສັດທີ່ນຳເຊື້ອອີໂບລາໄປຍັງສັດຊະນິດອື່ນ ແລະ ຄົນ ແຕ່ກໍ່ສາ
ມາດຕິດຕໍ່ໂດຍກົງຈາກຄົນຫາຄົນ ຜ່ານການສຳພັດກັບເລືອດ ຫຼື ນ້ຳລາຍຂອງຄົນຕິດເຊື້ອ/ສົບ ຫຼື ໂດຍການ
ສຳຜັດກັບອຸປະກອນທີ່ອະເຊື້ອບໍ່ຖືກວິທີ ໂດຍສະເພາະ ເຂັມ ແລະ ບັ້ງສີດຢາ ນອກຈາກນັ້ນ ການແຜ່ເຊື້ອຜ່ານ
ການສຳພັດທາງປາກ ການກອດ ແລະ ທາງເພດສຳພັນກໍ່ສາມາດເກີດຂຶ້ນໄດ້ ໄລຍະບົ່ມເຊື້ອຂອງພະຍາດອີໂບ
ລາ ແຕ່ 2-21 ວັນ ອາການຂອງໄຂ້ເລືອດອອກອີໂບລາ ມີອາການໄຂ້ກະທັນຫັນ ເຈັບຫົວ ເຈັບຄໍ ອ່ອນເພຍ ເຈັບ
ກ້າມຊີ້ນ ປວດຮາກ/ຮາກ ແລະ ມີອາການຖອກທ້ອງຮ່ວມນຳ ໃນກໍລະນີຄົນເຈັບໜັກອາດເຮັດໃຫ້ຕັບ ແລະ
ໄຂ່ຫຼັງຊຸດໂຊມ ມີອາການເລືອດໄຫຼພາຍໃນ ແລະ ຂ້າງນອກຮ່າງກາຍ ເຊິ່ງພາໃຫ້ເສຍຊີວິດໄດ້ ອັດຕາການຕາຍ
ຂອງພະຍາດດັ່ງກ່າວ ແມ່ນສູງເຖິງ 50-90% ປັດຈຸບັນ ຍັງບໍ່ມີວັກຊີນປ້ອງກັນ ຫຼື ຢາປິ່ນປົວສະເພາະຂອງຜູ້
ຕິດເຊື້ອພະຍາດອີໂບລາເທື່ອ ເຊິ່ງການປິ່ນປົວຄົນເຈັບແມ່ນປິ່ນປົວຕາມອາການ ເຊັ່ນ: ການແກ້ໄຂ້ແກ້ປວດ
ການຮັກສາສະພາວະນ້ຳ ການໃຫ້ຢາຕ້ານເຊື້ອ ມາດຕະການຂັ້ນຕົ້ນຕໍແມ່ນການຫຼີກລຽງສຳພັດນຳຜູ້ຕິດເຊື້ອ.
ປັດຈຸບັນ ຍັງບໍ່ທັນມີກໍລະນີພະຍາດອີໂບລາເກີດຂຶ້ນໃນ ສປປ ລາວ ແຕ່ປະເທດເຮົາຍັງມີຄວາມສ່ຽງຈາກການ
ເຂົ້າມາຂອງຜູ້ໂດຍສານ ທີ່ເດີນທາງມາຈາກປະເທດທີ່ມີການລະບາດ ກະຊວງສາທາລະນະສຸກ ໄດ້ຮ່ວມກັບອົງ
ການອະນາໄມໂລກ ແລະ ຂະແໜງການທີ່ກ່ຽວຂ້ອງ ສ້າງແຜນສະກັດກັ້ນ ແລະ ເຝົ້າລະວັງພະຍາດອີໂບລາ
ໂດຍມີການເປີດນຳໃຊ້ຫ້ອງບັນຊາການ ເພື່ອສະກັດກັ້ນພະຍາດ (EOC) ມີການປະຊຸມລາຍງານປະຈຳວັນ ປະ
ກອບເຄື່ອງສະແກນເນີອຸນຫະພູມ ແລະ ແຕ່ງຕັ້ງພະນັກງານແພດລົງປະຈຳດ່ານສາກົນ ຮ່າງຄຳສັ່ງແນະນຳ
ຂອງນາຍົກລັດຖະມົນຕີ ກ່ຽວກັບການສະກັດກັ້ນພະຍາດອີໂບລາ ເຝິກອົບຮົມ ແລະ ໃຫ້ຂໍ້ມູນຂ່າວສານທີ່ຈຳ
ເປັນກ່ຽວກັບພະຍາດອີໂບລາແກ່ພະນັກງານຜູ້ ປະຈຳຢູ່ດ່ານ ແລະ ປະຊາຊົນທົ່ວໄປ ເກັບກຳຂໍ້ມູນຄົນໂດຍ
ສານທີ່ເດີນທາງມາຈາກປະເທດທີ່ມີການລະບາດ ກະກຽມອຸປະກອນການແພດ ນ້ຳຢາ ແລະ ຢາທີ່ຈຳເປັນ
ກະກຽມຫ້ອງແຍກປ່ຽວສະເພາະຄົນເຈັບທີ່ສົງໃສ ຢູ່ບັນດາໂຮງໜໍຕ່າງໆ ຈັດລະບົບການປ້ອງກັນ ແລະ ຄວບ
ຄຸມການຕິດເຊື້ອພະຍາດໃນໂຮງໜໍ ຕາມມາດຖານສາກົນ ປັບປຸງຄວາມກຽມພ້ອມທາງຫ້ອງວິເຄາະ ເພື່ອ
ບົ່ງມະຕິເຊື້ອອີໂບລາ ກະຊວງສາທາລະນະສຸກ ຂໍແນະນຳໃຫ້ປະຊາຊົນໃຫ້ຫຼີກລຽງການເດີນທາງທີ່ບໍ່ຈຳເປັນ
ໄປປະເທດທີ່ມີການລະບາດ ສຳລັບປະຊາຊົນທົ່ວໄປທີ່ສົນໃຈຂໍ້ມູນເພີ່ມເຕີມ ກ່ຽວກັບພະຍາດອີໂບລາ ຫຼື
ພະຍາດຕິດຕໍ່ອື່ນໆ ສາມາດສອບຖາມທາງສາຍດ່ວນ ກະຊວງສາທາລະນະສຸກ ເບີໂທ 166 ຕະຫຼອດ 24 ຊົ່ວ
ໂມງ.
ແຫຼ່ງຂ່າວ: ວຽງຈັນໃໝ່