ບັນຍາກາດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ຕອນເຊົ້າວັນທີ 09/05/2017 ໂດຍການເປັນປະທານຂອງ ທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ. ກອງປະຊຸມໄດ້ຮັບຟັງບົດລາຍງານກ່ຽວ ກັບການປັບປຸງກົດໝາຍວ່າດ້ວຍໄຟຟ້າສະບັບປັບປຸງໃໝ່ຄັ້ງທີ 3 ຈາກ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່.
ກົດໝາຍວ່າດ້ວຍໄຟຟ້າສະບັບປັບປຸງໃໝ່ ໄດ້ມີການປັບປຸງຈາກກົດໝາຍສະບັບເດີມ ທີ່ມີ 11 ໝວດ ມາເປັນ 13 ພາກ (ປ່ຽນຈາກໝວດເປັນພາກ), ເພີ່ມໃໝ່ 2 ພາກ, ຈາກ 81 ມາດຕາມາເປັນ 113 ມາດຕາ. ຈຸດປະສົງຕົ້ນຕໍໃນການປັບປຸງ ເນື້ອໃນກົດໝາຍ ກໍ່ເພື່ອເພີ່ມລະບຽບການເພື່ອຄຸ້ມຄອງການພັດທະນາໂຄງການການຜະລິດໄຟຟ້າສະເພາະຂອງເອກະຊົນ ( IPP ) ແລະ ໂຄງການກໍ່ສ້າງເຂື່ອນ, ສາຍສົ່ງໄຟຟ້າທີ່ລົງທຶນໂດຍພາກລັດ ແລະ ເອກະຊົນ ເພື່ອຮັບປະກັນປະສິດທິພາບ, ປະສິດທິຜົນ, ຄວາມປອດໄພ ແລະ ຜົນປະໂຫຍດຂອງລັດ ແລະ ປະຊາຊົນ, ລວມທັງການກຳນົດກົນໄກການ ອະນຸມັດໂຄງການໄຟຟ້າທີ່ໂປ່ງໃສ, ເປີດເຜີຍ ແລະ ມີການແຂ່ງຂັນໂດຍເພີ່ມສິດອຳນາດໃຫ້ກັບສະພາແຫ່ງຊາດ.

      ເພີ່ມຄວາມຊັດເຈນ ກ່ຽວກັບ ພາລະບົດບາດຂອງຂະແໜງການ ເພື່ອຮັບປະກັນຄວາມເປັນເຈົ້າການໃນການ ຮັບຜິດຊອບຕໍ່ຜົນງານ ແລະ ບັນຫາຕ່າງໆຂອງໂຄງການໄຟຟ້າ, ຄຽງຄູ່ກັບການກຳນົດຂອດການປະສານງານລະຫວ່າງຂະແໜງການດ້ວຍກັນ, ສູນກາງ ແລະ ທ້ອງຖີ່ນ ໃຫ້ມີຄວາມຈະແຈ້ງ.
ສ້າງລະບຽບການໃຫ້ມີການວາງແຜນການພັດທະນາພະລັງງານໄຟຟ້າ ຄຽງຄູ່ກັບວຽກງານຂອງຂະແໜງການ ອື່ນຢ່າງກົມກຽວກັນ, ຮັບປະກັນການພັດທະນາຢ່າງສົມຄູ່ກັບຄວາມຕ້ອງການຕົວຈິງ, ເປັນມິດກັບສີ່ງແວດລ້ອມ ກໍ່ຄື ການຫຼີກລ້ຽງບໍ່ພັດທະນາໂຄງການ ໃນເຂດປ່າສະຫງວນ ແລະ ປ່າປ້ອງກັນ ແລະ ຫຼີກລ້ຽງການລົງທຶນທີ່ບໍ່ຈຳເປັນ.
ສ້າງນະໂຍບາຍທາງດ້ານລາຄາໄຟຟ້າ ເພື່ອການສົ່ງເສີມການຊົມໃຊ້ໄຟຟ້າເຂົ້າໃນການແກ້ໄຂບັນຫາການດຳລົງຊີວິດປະຈຳວັນ ເປັນຕົ້ນແມ່ນປະຊາຊົນເຂດທຸກຍາກຫ່າງໄກສອກຫຼີກ ແລະ ຈຸລະວິສະຫະກິດ, ວິສາຫະກິດຂະໜາດນ້ອຍ ແລະ ຂະໜາດການຕ່າງໆ.
ສ້າງກົນໄກການກຳນົດ ແລະ ການຮັບຮອງລາຄາໄຟຟ້າໃຫ້ມີຄວາມເປັນທຳ, ໂປ່ງໃສ, ເປີດເຜີຍ ແລະ ມີສ່ວນ ຮ່ວມຂອງຕົວແທນປະຊາຊົນຜູ້ຊົມໃຊ້ໄຟຟ້າຫຼາຍຂື້ນ, ເອົາໃຈໃສ່ພັນທະຂອງຜູ້ຈຳໜ່າຍໄຟຟ້າ ແລະ ເພີ່ມກົນໄກການ ຄຸ້ມຄອງ ແລະ ການກວດກາຄວາມປອດໄພ ຂອງຜູ້ຊົມໃຊ້ໄຟຟ້າ.
ຈັດວາງການແບ່ງຂັ້ນຄຸ້ມຄອງລະຫວ່າງ ສູນກາງ ແລະ ທ້ອງຖີ່ນຄືນ ໃຫ້ເທດເໝາະກັບສະພາບຕົວຈິງ ແລະ ຈຳກັດການພັດທະນາໂຄງການຂະໜາດນ້ອຍທີ່ມີປະສິດຕິຜົນຕໍ່າ.