ສຳນັກຂ່າວເອເອຟພີລາຍງານ ເມື່ອວັນທີ 23 ມີນາ 2017 ຜ່ານມາວ່າ ທີມວິທະຍາາດຈາກສູນຂໍ້ມູນນໍ້າກ້ອນ ແລະຫິມະແຫ່ງຊາດ (ເອັນເອສໄອດີຊີ) ສັງກັດໃນອົງການບໍລິຫານການບິນ ແລະອະວະກາດແຫ່ງຊາດ (ນາຊາ) ຂອງສະຫະລັດອາເມຣິກາ ໄດ້ຖະແຫຼງຂ່າວໃນເມືອງໄມອາມີ ລັດຟໍຣິດາ ສະຫະລັດອາເມຣິກາ ບອກວ່າພື້ນທີ່ເຊິ່ງປົກຄຸມດ້ວຍນໍ້າກ້ອນ ແລະຫິມະຢູ່ບໍລິເວນຂົ້ວໂລກເໜືອ ແລະຂົ້ວໂລກໃຕ້ ຫົດນ້ອຍລົງເຫຼືອໜ້ອຍທີ່ສຸດເປັນປະຫວັດການ
ແຜ່ນນໍ້າກ້ອນຂົ້ວໂລກ ຈະປ່ຽນຂະໜາດໄປຕາມລະດູການ ເຊິ່ງຊ່ວງຕົ້ນເດືອນີນາ ຈະມີຂະໜາດໃຫຍ່ທີ່ສຸດ ກ່ອນທີ່ຈະນ້ອຍລົງເຫຼືອພື້ນທີ່ໜ້ອຍສຸດໃນເດືອນກັນຍາ ທີ່ເປັນຊ່ວງຮ້ອນຂອງຂົ້ວໂລກ, ແຕ່ແຜ່ນນໍ້າກ້ອນທະວີບອາກຕິກ ທີ່ປົກຄຸມຂົ້ວໂລກເໜືອ ວັດແທກໃນເດືອນມີນາ ເຫຼືອພຽງແຕ່ 14.42 ລ້ານຕາລາງກິໂລແມັດ ນ້ອຍກວ່າສະຖິຕິນ້ອຍທີ່ສຸດໃນປີ 2015 ຮອດ 417.000 ຕາລາງກິໂລແມັດ, ສ່ວນແຜ່ນນໍ້າກ້ອນ ທີ່ແອນຕາຣ໌ຄຕິກ ທີ່ປົກຄຸມຂົ້ວໂລກໃຕ້ ໃນເດືອນມີນາ ກໍເຮັດສະຖິຕິເຫຼືອພື້ນທີ່ນ້ອຍທີ່ສຸດເປັນປະຫວັດການໃນຮອບ 38 ປີ ນັບຕັ້ງແຕ່ມີການເກັບສະຖິຕິ ປາກົດການດັ່ງກ່າວ ກໍໃຫ້ເກີດຄວາມກັງວົນໃຈສູງຂຶ້ນອີກວ່າ ພາວະໂລກຮ້ອນກຳລັງເລັ່ງຄວາມໄວ ແລະເພີ່ມທະວີຄວາມຮຸນແຮງຂຶ້ນເລື້ອຍໆ