ເພື່ອນຜູ້ອ່ານຄົງຈະບໍ່ຖຽງເນາະວ່າ “ການຮັບພະນັກງານ(ລັດຖະກອນ)” ຂອງອົງການລັດບາງກໍລະນີໃນໄລຍະທີ່ຜ່ານມາ ເປັນສິ່ງຫຍໍ້ທໍ້ໜຶ່ງໃນລະບົບການບໍລິຫານລັດ ມີຫາງສຽງຈົ່ມວ່າຈາກມະຫາຊົນຢ່າງໜາຫູ ຈົນກາຍເປັນຄວາມເສຍຫາຍຕໍ່ລັດ ແລະເຮັດໃຫ້ປະຊາຊົນຂາດຄວາມເຊື່ອໝັ້ນຕໍ່ລະບົບການຮັບພະນັກງານຂອງລັດ ຢ່າງຫຼີກລ້ຽງບໍ່ໄດ້.
ວັນທີ 15 ກຸມພາ 2017 ທີ່ຜ່ານມາ ມີອະດີດພະນັກງານຄູຜູ້ໜຶ່ງ ໄດ້ຂຽນລະບາຍຄວາມນ້ອຍໃຈຂອງຕົນເອງລົງເຟສບຸກຊື່ Khamphien Phetsy ເຖິງຄວາມງຸນງົງສົງໄສຕໍ່ວິທີຄັດເລືອກເອົາພະນັກງານລັດຖະກອນ ໂດຍລະບຸວ່າບາງຄົນມີຄະແນນໜ້ອຍ ແຕ່ເປັນລູກຫຼານຂອງພະນັກງານຜູ້ຮັບຜິດຊອບການຄັດເລືອກ ພັດໄດ້ຖືກຮັບເຂົ້າເປັນພະນັກງານ ໃນຂະນະທີ່ມີບາງຄົນມີຄະແນນຫຼາຍແຕ່ບໍ່ມີເສັ້ນມີສາຍ ພັດບໍ່ຖືກເລືອກ ໂດຍຍົກຕົວຢ່າງລູກຂອງຕົນເອງ ທີ່ບໍ່ຖືກເລືອກມາຢ່າງລະອຽດຈະແຈ້ງ. ການໂພສດັ່ງກ່າວຂອງຜູ້ກ່ຽວໄດ້ຮັບຄວາມສົນໃຈຕໍ່ຜູ້ຄົນໃນສັງຄົມຢ່າງຫຼວງຫຼາຍ, ຖືກແຊຕໍ່ຢ່າງກວ້າງຂວາງເຖິງ 1,600 ກວ່າແຊ ແລະມີຜູ້ເຂົ້າມາປະກອບຄຳເຫັນເກືອບ 1,000 ຄຳເຫັນ ໃນນັ້ນເກືອບ 100% ແມ່ນສະໜັບສະໜຸນຕໍ່ຜູ້ໂພສບັນຫາດັ່ງກ່າວ ແລະສະແດງຄວາມເຫັນໃຈຕໍ່ຜູ້ກ່ຽວ. ເບິ່ງລາຍລະອຽດໄດ້ລີ້ງນີ້: https://goo.gl/ddajdH
ທ່ານຜູ້ອ່ານສາມາດພິສູດບົດຂຽນນີ້ໄດ້ ໂດຍການສອບຖາມພະນັກງານໃນອົງການຈັດຕັ້ງລັດ ໂດຍສະເພາະແມ່ນໃນຂົງເຂດເສດຖະກິດ (ເຮັດວຽກກ່ຽວຂ້ອງກັບເງິນ) ທ່ານອາດຈະຮູ້ວ່າພະນັກງານຫຼາຍຄົນເຂົ້າເຮັດວຽກ ຍ້ອນມີຜູ້ໃຫ້ຄວາມຊ່ວຍເຫຼືອ ຫຼື ເປັນຄົນຝາກຂອງຜູ້ທີ່ມີອຳນາດ.
ບັນຫາດັ່ງກ່າວນີ້, ເປັນຫາງສຽງທີ່ໂດ່ງດັງມາໄດ້ຫຼາຍປີ ທັງການຊື້ຈ້າງເຂົ້າເຮັດວຽກ, ທັງການຫຼອກລວງເອົາເງິນແລ້ວບໍ່ໄດ້ເຮັດວຽກ ແລະການຫລິ້ນເສັ້ນຫລິ້ນສາຍ ຄົນເຈົ້າ ຄົນຂ້ອຍ ໂດຍບໍ່ໄດ້ຄັດເລືອກເອົາຕາມຄວາມຮູ້ຄວາມສາມາດທີ່ແທ້ຈິງຂອງຜູ້ສະໝັກ ບັນຫາດັ່ງກ່າວໄດ້ກາຍເປັນສິ່ງຫຍໍ້ທໍ້ທີ່ທາງພາກລັດໄດ້ພະຍາຍາມຫາວິທີທາງແກ້ໄຂ ດ້ວຍການສຶກສາອົບຮົມການເມືອງ-ແນວຄິດ ແລະສິນທຳປະຕິວັດໃຫ້ແກ່ພະນັກງານລັດຖະກອນ ໃນອົງການຈັດຕັ້ງຕ່າງໆຢ່າງສະໝໍ່າສະເໝີ.
ແນວໃດກໍຕາມ, ກໍບໍ່ໄດ້ໝາຍຄວາມວ່າຈະເປັນແບບນັ້ນໝົດທຸກບ່ອນ ຫຼືພະນັກງານທຸກຄົນລ້ວນແຕ່ເຂົ້າເຮັດວຽກດ້ວຍ ວິທີທາງທີ່ບໍ່ຖືກຕ້ອງແບບນັ້ນທຸກຄົນ.