ຂປລ. ລັດຖະບານລາວມີງົບ 50 ລ້ານໂດລາສະຫະລັດນໍາໃຊ້ເຂົ້າໃນກອງທຶນຫລຸດຜ່ອນຄວາມທຸກຍາກ ( ທລຍ ) ໂດຍມີເປົ້າໝາຍເລັ່ງລັດແກ້ໄຂຄວາມທຸກຍາກໃນ 43 ຕົວເມືອງທົ່ວປະເທດນັບແຕ່ 2017-2019 ຂະນະທີ່ ສປປ ລາວໄດ້ວາງຄາດໝາຍສູ້ຊົນເຮັດໃຫ້ປະເທດຕົນເອງຫລຸດພົ້ນອອກຈາກຄວາມທຸກຍາກພາຍໃນປີ 2020.
ຫລ້າສຸດ ວັນທີ 31 ມັງກອນ 2017 ທີ່ ນະຄອນຫລວງວຽງຈັນ ຄະນະນໍາກອງທຶນຫລຸດຜ່ອນຄວາມທຸກຍາກ (ທລຍ), ກະຊວງກະສິກໍາ ແລະ ປ່າໄມ້ຈັດກອງປະຊຸມ ສະພາ ບໍລິຫານ ກອງທືນຫລຸດຜ່ອນຄວາມທຸກຍາກ (ທລຍ) ຂຶ້ນ ໂດຍການເປັນປະທານຂອງ ທ່ານ ລຽນ ທິແກ້ວ ລັດຖະມົນຕີກະຊວງ ກະສິກຳ ແລະ ປ່າໄມ້. ປະທານສະພາບໍລິຫານ ກອງທືນຫລຸດ ຜ່ອນຄວາມທຸກຍາກຂັ້ນສູນກາງ ມີຮອງລັດຖະມົນຕີ, ບັນດາຮອງເຈົ້າແຂວງ, ຜູ້ຕ່າງໜ້າທະນາ ຄານໂລກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ເພື່ອທົບທວນ ຕີລາຄາ ແລະ ຊອກຫາຊ່ອງທາງແຜນລະອຽດໃນການຈັດຕັ້ງປະຕິບັດໃຫ້ມີຜົນສໍາເລັດໃຫຍ່ກວ່າເກົ່າ.
ກອງປະຊຸມຄັ້ງນີ້ ຄະນະນໍາຂອງ ທລາຍກໍໄດ້ອະທິບາຍບາງບັນຫາດັ່ງນີ້ ກອງທຶນຫລຸດຜ່ອນຄວາມທຸກຍາກ (ທລຍ) ໄລຍະ 3 ແມ່ນການສືບຕໍ່ເສີມຂະຫຍາຍຜົນສຳເລັດ ຈາກ (ທລຍ) ໄລຍະ2 ເພື່ອການຈັດຕັ້ງ ປະຕິບັດ ນະໂຍບາຍ ແຜນງານ ຂອງລັດຖະບານ ໃນການພັດທະນາຊົນບົດ ແລະ ແກ້ໄຂຄວາມທຸກຍາກ ເຊິ່ງໄດ້ມີການສົມທົບທຶນ ລະຫວ່າງລັດຖະບານ ສປປ.ລາວ ກັບ ທະນາຄານໂລກ ພ້ອມດ້ວຍຄູ່ຮ່ວມໃຫ້ທຶນອື່ນໆ ສະເພາະ (ທລຍ) ໄລຍະ3 ມີມູນຄ່າ 50 ລ້ານກວ່າໂດລາສະຫະລັດເພື່ອນໍາໃຊ້ເຂົ້າໃນການຈັດຕັ້ງປະຕິບັດ ຢູ່ 263 ບ້ານ ໃນ 43 ເມືອງທຸກຍາກ 10 ແຂວງທົ່ວປະເທດນັບແຕ່ປີ 2017-2019.
ເພື່ອນຳພາປະເທດຊາດ ອອກຈາກ ສະຖານະພາບດ້ອຍພັດທະນາ ໃນປີ 2020 ກ້າວໄປສູ່ ປະເທດ ທີ່ມີລາຍຮັບ ປານກາງ-ສູງ ໃນປີ 2030 ນັ້ນ ໂຄງການ ກອງທຶນຫລຸດຜ່ອນຄວາມທຸກຍາກ (ທລຍ) ໄລຍະ3 ໄດ້ສືບຕໍ່ສຸມໃສ່ການຈັດຕັ້ງປະຕິບັດ ໃນເງື່ອນໄຂ ທີ່ລັດຖະບານ ໄດ້ກຳນົດໄວ້ໂດຍ ຫັນເອົາການພັດທະນາ ຊົນນະບົດ ແລະ ລົບລ້າງຄວາມທຸກຍາກ ເປັນຈຸດສຸມ ບູລິມະສິດສໍາຄັນ ໄລຍະ 2016-2020 ນອກຈາກນັ້ນ ບັນດານະ ໂຍບາຍຂອງຜູ້ໃຫ້ທຶນ ກໍ່ແມ່ນປະຕິບັດຕາມເງື່ອນໄຂທີ່ ລັດຖະບານ ກຳນົດໄວ້ເຊັ່ນ.
5 ປີຜ່ານມາ 2011-2016 ກອງທຶນຫລຸດຜ່ອນຄວາມທຸກຍາກສາມາດຕີລາຄາ ແລະ ຍາດໄດ້ຜົນສໍາເລັດດັ່ງນີ້: ໂຄງການ ທລຍ ໄລຍະ 2 ມີງົບປະມານ 80 ລ້ານກວ່າໂດລາສະຫະລັດ ໃນນັ້ນ ລັດຖະບານສົມທົບທຶນ 10 ລ້ານໂດລາ, ທະນາຄານໂລກ 25 ລ້ານໂດລາ, ສະວິດເຊີແລນ 13 ລ້ານກວ່າໂດລາ ແລະ ອົດສະຕາລີ 17 ລ້ານກວ່າໂດລາ ເຊິ່ງສາມາດຈັດຕັ້ງປະຕິບັດ 1.931 ໂຄງການຍ່ອຍກ່ຽວກັບຂະແໜງການສາທາລະນະສຸກ, ສຶກສາ, ນໍ້າສະອາດ, ຄົມມະນາຄົມ, ກະສິກໍາ ນອກຈາກນັ້ນ ກໍໄດ້ປະກອບທຶນຈໍານວນ 50 ລ້ານກວ່າໂດລາເຂົ້າໃນການພັດທະນາຄວາມຈໍາເປັນ 1.300 ກວ່າບ້ານທຸກຍາກ ເຊິ່ງມີປະຊາຊົນໄດ້ຮັບຜົນປະໂຫຍດໂດຍກົງເກືອບ 7 ແສນຄົນ.
ຂ່າວໂດຍ. ສັກ (ສຳນັກຂ່າວສານປະເທດລາວ)
ຕິດຕາມຂ່າວເສດຖະກິດລາວ ກົດໄລຄ໌ເລີຍ!