ລັດຖະບານລາວສັ່ງໃຫ້ແຕ່ງຕັ້ງ ຄະນະສະເພາະກິດໜຶ່ງຂຶ້ນ ເພື່ອດໍາເນີນມາດຕະການສຶກສາ, ກວດກາ ແລະ ຄົ້ນຄົ້ວວິໄຈບັນຫາທີ່ດິນ ຢ່າງເລິກເຊິ່ງ ພາຍຫລັງພົບວ່າລັດເສຍຜົນປະໂຫຍດ ຈາກການໃຫ້ສໍາປະທານທີ່ດິນບໍ່ໜ້ອຍ ຍິ່ງກວ່ານັ້ນຍັງສ້າງປະກົດການຫຍໍ້ທໍ້ ຕໍ່ສັງຄົມ ແລະ ປະຊາຊົນ.
ອີງຕາມກອງປະຊຸມລັດຖະບານສະໄໝສາມັນ ແລະ ກອງປະຊຸມນາຍົກ-ຮອງນາຍົກລັດຖະມົນຕີ ປະຈໍາເດືອນ ມັງກອນ 2017 ໄດ້ປິດລົງຢ່າງເປັນທາງການ ໃນວັນທີ 25 ມັງກອນ 2017 ນີ້ ທີ່ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ ເຊິ່ງຜົນຂອງປະຊຸມຄັ້ງນີ້ ໄດ້ສຸມໃສ່ປຶກສາຫາລື ແລະ ຕົກລົງຮັບຮອງເອົາບັນຫາສໍາຄັນຮີບດ່ວນ ໃນນັ້ນເລື່ອງທີ່ດິນແມ່ນບັນຫາໜຶ່ງ ທີ່ສໍາຄັນຮີບດ່ວນໂດຍກອງປະຊຸມໄດ້ເປັນເອກະພາບ ໃນເບື້ອງຕົ້ນກ່ຽວກັບທິດທາງແກ້ໄຂ ດັ່ງນີ້: ໃຫ້ແຕ່ງຕັ້ງຄະນະສະເພາະກິດໜຶ່ງຂຶ້ນ ເພື່ອສຶກສາ ແລະ ວິເຄາະ-ວິໄຈ ບັນຫາທີ່ດິນໃຫ້ເລິກເຊິ່ງ ໂດຍມອບໃຫ້ ທ່ານ ບຸນທອງ ຈິດມະນີ, ຮອງນາຍົກລັດຖະມົນຕີ ເປັນຜູ້ຊີ້ນໍາ, ມີລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຫົວໜ້າຄະນະ, ມີບັນດາຮອງລັດຖະມົນຕີ ກະຊວງກ່ຽວຂ້ອງ ປະກອບເປັນຄະນະ, ມີກອງເລຂາປະຈໍາການຢູ່ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ມີງົບປະມານ ໃນການເຄື່ອນໄຫວປະຕິບັດໜ້າທີ່ ແລະ ຄວາມຮັບຜິດຊອບ ຂອງຄະນະ, ໃຫ້ຄະນະທີ່ຖືກແຕ່ງຕັ້ງສຶກສາ ແລະ ວິເຄາະ-ວິໄຈບັນຫາທີ່ດິນ ໃຫ້ລະອຽດ-ເລິກເຊິ່ງ ພ້ອມທັງເບິ່ງບົດຮຽນຂອງປະເທດເພື່ອນມິດສາກົນ.
ຄາດໝາຍໃນການເຮັດວຽກ ຂອງຄະນະໃຫ້ສຳເລັດ ແລະ ສາມາດລາຍງານ ລັດຖະບານ ຢ່າງຊ້າພາຍໃນເດືອນຕຸລາ ປີ 2017, ກ່ອນຈະນຳສະເໜີຕໍ່ກອງປະຊຸມກົມການເມືອງສູນກາງພັກ ແລະ ກອງປະຊຸມສະພາແຫ່ງຊາດເພື່ອພິຈາລະນາ, ໃຫ້ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສືບຕໍ່ຕິດຕາມ, ກວດກາ ບັນຫາສະພາບການຄຸ້ມຄອງ, ນຳໃຊ້, ການເຊົ່າ-ສຳປະທານ ແລະ ການບຸກລຸກທີ່ດິນປ່າສະຫງວນ, ປ່າຕົ້ນນໍ້າ, ຊັບພະຍາກອນທໍາມະຊາດ ທີ່ບໍ່ຖືກຕ້ອງໃນຂອບເຂດທົ່ວປະເທດ ຢ່າງເປັນປົກກະຕິ, ມີການລາຍງານໃຫ້ລັດຖະບານຊາບ ແລະ ສະເໜີທິດທາງແກ້ໄຂເປັນແຕ່ລະໄລຍະ.
ແນວໃດກໍດີ ຫລາຍຊຸມປີຜ່ານມາ ມີປະຊາຊົນຈໍານວນບໍ່ໜ້ອຍໄດ້ໂທລະສັບສາຍດ່ວນ ເຂົ້າຫາສະພາແຫ່ງຊາດເພື່ອຂໍຄວາມເປັນທໍາຈາກພາກລັດ ໃນກໍລະນີມີການບຸກລຸກພື້ນທີ່ທໍາກິນ ແລະ ທີ່ຢູ່ອາໃສຂອງປະຊາຊົນ ຈາກກຸ່ມຄົນຈໍານວນໜຶ່ງ ທີ່ສວຍໂອກາດ ໂດຍໃຫ້ຄ່າຊົດເຊີຍບໍ່ສົມເຫດສົມຜົນ ຄືຊື້ຖືກຂາຍແພງ, ຍິງກວ່ານັ້ນຍັງມີບາງຄົນສວຍໃຊ້ອໍານາດລັດ ເອົາດິນປະຊາຊົນມາເປັນຂອງຕົນເອງ; ສ່ວນນັກລົງທຶນຕ່າງປະເທດເຂົ້າມາລົງທຶນໃນ ສປປ ລາວ ຍັງພົບວ່າມີບາງໂຄງການ ໄດ້ຮັບຜົນປະໂຫຍດຕໍ່າຫລາຍ ຈາກຄ່າການສໍາປະທານທີ່ດິນ ນອກຈາກນັ້ນ ການພັດທະນາຫລາຍເກີນໄປ ໂດຍບໍ່ມີການສຶກສາ, ກວດກາ ຄົ້ນຄ້ວາ ແລະ ວິໃຈດ້ານດິນຢ່າງເລິກເຊິ່ງ ໄດ້ສົ່ງຜົນກະທົບພາບລວມຂອງຊາດ ເປັນຕົ້ນເຮັດໃຫ້ເນື້ອທີ່ ການຜະລິດກະສິກໍາ ເພື່ອຄໍ້າປະກັນສະບຽງອາຫານໄລຍະຍາວໄດ້ຮັບຜົນກະທົບ; ເນື້ອທີ່ປ່າໄມ້ຖືກບຸກລຸກ ແລະ ຫລຸດລົງ, ເຂດທໍາມາຫາກິນ ແລະ ບ່ອນຢູ່ອາໃສຂອງປະຊາຊົນໄດ້ຮັບຜົນກະທົບ ຢ່າງກວ້າງຂວາງ ແລະ ຂໍ້ຂັດແຍ່ງອື່ນໆ.
ຂ່າວ: ສຳນັກຂ່າວສານປະເທດລາວ