ຂົວຂ້າມນ້ຳຂອງປາກແບງ-ເມືອງເງິນ ເປັນຂົວທີ່ຕັ້ງຢູ່ເສັ້ນທາງຫຼວງແຫ່ງຊາດລະຫວ່າງທາງ ເລກທີ 2W ແລະ 2E
ເຊື່ອມຕໍ່ໃສ່ກັນຈາກແຂວງອຸດົມໄຊ ຫາ ແຂວງໄຊຍະບູລີ ພາຍຫຼັງສ້າງສຳເລັດຈະເປັນຈຸດທາງຜ່ານທີ່ສຳຄັນເພື່ອອຳ
ນວຍຄວາມ ສະດວກໃນການຄົມມະນາຄົມຂົນສົ່ງສິນຄ້າຂອງສອງແຂວງອອກສູ່ແຂວງ ອື່ນໆ ແລະ ປະເທດໃກ້ຄຽງ
ໃຫ້ນັບມື້ດີຂຶ້ນກວ່າເກົ່າ, ທັງເປັນການເຊື່ອມຕໍ່ເຂດພາກເໜືອຂອງລາວກັບບັນດາປະເທດອ້ອມຂ້າງ ໃຫ້ໃກ້ຊິດກັນ
ຫຼາຍຂຶ້ນ.
ຕາມການເປີດເຜີຍຂອງທ່ານ ໂນລະສັກ ສີສຸພັນ ຫົວໜ້າໂຄງການກໍ່ສ້າງຂົວຂ້າມນ້ຳຂອງປາກແບງກະຊວງໂຍທາທິ
ການ ແລະ ຂົນສົ່ງ (ຍທຂ) ຕໍ່ກັບທີມຂ່າວເສດຖະກິດໃຫ້ຮູ້ວ່າ: ໂຄງການກໍ່ສ້າງຂົວຂ້າມນ້ຳຂອງປາກແບງເມືອງປາກ
ແບງ ແຂວງອຸດົມໄຊ ຫາ ເມືອງເງິນ ແຂວງໄຊຍະບູລີເປັນຂົວໜຶ່ງທີ່ຕັ້ງຢູ່ຕາມສາຍທາງຫຼວງແຫ່ງຊາດ ລະຫວ່າງ
ທາງເລກ ທີ 2W ແລະ 2E ເພື່ອເຊື່ອມຕໍ່ສອງແຂວງໃສ່ກັນ ທັງຈະອຳນວຍຄວາມສະດວກໃນການຄົມມະນາຄົມຂົນ
ສົ່ງສິນຄ້າລະຫວ່າງ ແຂວງອຸດົມໄຊຫາ ແຂວງໄຊຍະບູລີ ເຊື່ອມຕໍ່ໃສ່ເຂດພາກເໜືອຂອງລາວກັບປະເທດໄທ, ຫວຽດ
ນາມ ແລະ ປະເທດຈີນທີ່ມີຊາຍແດນຕິດກັນໃຫ້ສະດວກໃນການລົງທຶນຮ່ວມກັນຫຼາຍຂຶ້ນ.
ຂົວທີ່ມີມູນຄ່າການລົງທຶນກວ່າ 200 ຕື້ນີ້ ເມື່ອສ້າງສຳເລັດຈະອຳນວຍຄວາມສະດວກໃນດ້ານການຄ້າ, ການລົງທຶນ
ແລະ ການບໍລິການໄດ້ຄ່ອງຕົວ ແລະ ສະດວກກວ່າເກົ່າຫຼາຍ ຊຶ່ງຂະນະນີ້ກໍ່ສ້າງ ໂດຍລວມມີຄວາມຄືບໜ້າ 52,51%,
ໃນນີ້ ວຽກທີ່ສຳເລັດ 100% ປະກອບມີວຽກເບຕົງເສົາຂົວ ຫຼື ພາກສ່ວນລຸ່ມ ລວມທັງແຜ່ນເບຕົງທາງຍ່າງ ແລະ ວຽກ
ດິນຈຳນວນໜຶ່ງ.
ປະຈຸບັນ ທາງໂຄງການກຳລັງຂຸ້ນຂ້ຽວປະຕິບັດຢູ່ເປັນຕົ້ນແມ່ນການກະກຽມວຽກ ໂຄງສ້າງຂອງພາກສ່ວນເທິງຈຳນວນ
ໜຶ່ງ ແລະ ກຽມຜ່ານແບບວິທີການກໍ່ສ້າງຂາງຂົວແບບຂົວເສົາເບີ 0 ຫາ 1 ເບື້ອງເມືອງປາກແບງ ແລະ ຂາງຂົວແຕ່ເສົາ
4 ຫາ 5, 6, 7 ເບື້ອງ ເມືອງເງິນ, ລວມໄປເຖິງການອອກແບບທາງເຂົ້າຂົວທັງສອງເບື້ອງຄືນໃໝ່ ທ່ານ ໂນລະສັກ
ສີສຸພັນກ່າວຕື່ມ.
ທ່ານຫົວໜ້າໂຄງການຍັງໃຫ້ຮູ້ອີກວ່າ: ໂຄງການກໍ່ສ້າງຂົວຂ້າມນ້ຳຂອງປາກແບງ ເມືອງປາກແບງແຂວງອຸດົມໄຊ ຫາ
ເມືອງເງິນ ແຂວງໄຊຍະບູລີ ໄດ້ເລີ່ມລົງມືປະຕິບັດວັນທີ 23 ທັນວາ 2012 ໂດຍມີລວງຍາວທັງໝົດ 700 ແມັດ (ລວມ
ທັງທາງເຂົ້າຂົວທັງສອງເບື້ອງຍາວ 321 ແມັດ), ລວງຍາວຂອງຂົວແມ່ນ 379 ແມັດ ແລະ ກວ້າງ 13 ແມັດ, ຄາດຈະ
ໃຫ້ສຳເລັດໃນວັນທີ 22 ມີນາ 2015 ລວມມູນຄ່າຂອງການກໍ່ສ້າງທັງໝົດ 30,89 ກວ່າລ້ານໂດລາ ຫຼື ປະມານ 247,19
ຕື້ກີບ ໂດຍເປັນທຶນ ກູ້ຢືມພິເສດຈາກທະນາຄານ EXIM BANK ຈາກ ສປ ຈີນ 95% ແລະ ລັດຖະບານລາວສົມທົບ 5%,
ສ່ວນການອອກແບບຂອງຕົວຂົວແມ່ນໃຫ້ສາມາດນຳໃຊ້ໄດ້ໄລຍະ 100 ປີ, ຊຶ່ງຈະຊ່ວຍເອື້ອອຳນວຍເງື່ອນໄຂສະດວກ
ໃນການຄົມມະນາຄົມສິນຄ້າ ຂອງທັງສອງແຂວງໄດ້ ເປັນຢ່າງດີ ແລະ ສາມາດຮອງຮັບແຜນພັດທະນາເສດຖະກິດສັງ
ຄົມໃນໄລຍະຍາວໄດ້.
ຂອບໃຈຂ່າວຈາກ: http://www.sedthakid.la/home/khao/19848.html