ທ່ານ ຄຳພັນ ມາລາບັນດິດ ຫົວໜ້າພະແນການເງິນ ນະຄອນຫຼວງວຽງຈັນ ໄດ້ໃຫ້ສຳພາດວັນທີ 30 ທັນວາ 2016 ຮູ້ວ່າ: ການຈັດຕັ້ງປະຕິບັດແຜນງົບປະມານ ສົກປີ 2015-2016 ນວ ໄດ້ຮັບເບື້ອງຕົ້ນ 1.069 ຕື້ກີບ ໃນນັ້ນ ພະແນກສ່ວຍສາອາກອນ 1.000 ຕື້ກີບ ຫ້ອງການຄຸ້ມຄອງຊັບສິນຂອງລັດ 55 ຕື້ກີບ ຫ້ອງການຄຸ້ມຄອງລັດວິສາຫະກິດ 708 ລ້ານກີບ ແລະ ດ່ານປະເພນີ-ດ່ານທ້ອງຖິ່ນ 13 ຕື້ກວ່າກີບ ໃນນັ້ນ ແຍກອອກສ່ວນຂອງທ້ອງຖິ່ນ ນວ ຈັດເກັບ 1.055 ຕື້ກີບ ແຕ່ວ່າມາຮອດງວດ 4 ຂອງສົກປີ ກະຊວງການເງິນໄດ້ມອບແຜນດັດແກ້ໃຫ້ຕື່ມ 1.464 ຕື້ກີບ ເພີ່ມຂຶ້ນປະມານ 395 ຕື້ກີບ ໃນນັ້ນ ເພີ່ມໃຫ້ພະແນກສ່ວຍສາອາກອນ 55 ຕື້ກີບ ແລະ ເພີ່ມໃຫ້ພາສີ ໝາຍວ່າເອົາສ່ວນ 10% ຂອງລາຍຮັບທີ່ເກັບຢູ່ດ່ານພາສີສາກົນທີ່ຕັ້ງຢູ່ ນວ ໃຫ້ເພີ່ມເຕີມປະມານ 344 ຕື້ກີບ ແຕ່ສາມາດຈັດຕັ້ງປະຕິບັດຕົວຈິງໄດ້ 1.214,58 ຕື້ກີບ ເທົ່າກັບ 82,96%.
ສາເຫດທີ່ບໍ່ສາມາດເກັບລາຍຮັບໄດ້ຕາມແຜນການນັ້ນ ຍ້ອນວ່າບັນດາແຫຼ່ງລາຍຮັບຕ່າງໆ ທີ່ຈັດເກັບຢູ່ທ້ອງຖິ່ນຢູ່ໃນ ນວ ບໍ່ແມ່ນພະແນກການເງິນ ນວ ເປັນຜູ້ເກັບທັງໝົດ ສ່ວນໃຫຍ່ແມ່ນສູນກາງເປັນຜູ້ຈັດເກັບ ແລະ ຄຸ້ມຄອງ ສະເພາະແຫຼ່ງລາຍຮັບທີ່ເກີດຂຶ້ນຢູ່ ນວ ສູນກາງເປັນຜູ້ຄຸ້ມຄອງຈັດເກັບກວມຢູ່ປະມານ 90% ແລະ ນວ ຈັດເກັບ 10% ເທົ່ານັ້ນ ມັນຕ່າງກັບທ້ອງຖິ່ນອື່ນ ທີ່ເກັບເອົາໝົດທັງສ່ວນຂອງສູນກາງ ທີ່ໄປຕັ້ງຢູ່ບັນດາວິສາຫະກິດຂະໜາດໃຫຍ່ທີ່ສູນກາງເກັບ ຈະມີບໍລິສັດເບຍ ໄຟຟ້າ ລາວໂທລະຄົມ ທະນາຄານໃຫຍ່ໆ ບໍລິສັດ ຂາອອກ-ຂາເຂົ້າ ແລະ ກິດຈະການອື່ນໆ ນອກນີ້ ສາເຫດໜຶ່ງອີກແຜນລາຍຮັບທີ່ກະຊວງການເງິນວາງໃຫ້ ນວ ຈັດເກັບ ຖ້າທຽບໃສ່ທ່າແຮງ ແລະ ຄວາມອາດສາມາດຕົວຈິງຂອງ ນວ ຖືວ່າບໍ່ທັນແທດເໝາະ ຫຼື ສູງເກີນຄວາມສາມາດ.
ແຫຼ່ງຂ່າວຈາກ: ຫນັງສືພິມວຽງຈັນໃຫ່ມ ແລະ http://www.abclaosnews.com/
ຕິດຕາມຂ່າວເສດຖະກິດລາວ ກົດໄລຄ໌ເລີຍ!