ວັນທີ 22 ທັນວາ 2016 ຜ່ານມານີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໂອ້ລົມໃຫ້ທິດຊີ້ນຳ ແກ່ຄະນະພັກອຳນາດການປົກຄອງ ແລະ ພະນັກງານຫລັກແຫລ່ງ ພ້ອມດ້ວຍລັດຖະກອນແຂວງ ຫົວພັນ ໂດຍໄດ້ເນັ້ນໜັກ ໃຫ້ຄະນະພັກ ອຳນາດການປົກຄອງແຕ່ລະຂັ້ນ ຕ້ອງເພີ່ມທະວີຄວາມເອົາໃຈໃສ່ ຢ່າງເຄັ່ງຄັດປະຕິບັດມາດຕະການ ປະຢັດ ຕ້ານການຟຸມເຟື່ອຍ ແລະ ປະຕິບັດ ໃຫ້ໄດ້ຕາມແຜນງົບປະມານແຫ່ງລັດ ໂດຍສະເພາະການເບີກຈ່າຍເງິນເດືອນ ຂອງພະນັກງານ-ລັດຖະກອນ-ຄູ-ອາຈານ-ກຳລັງປະກອບອາວຸດ ໃຫ້ໄດ້ທັນຕາມກຳນົດເວລາ ໃນທຸກໆທ້າຍເດືອນ.
ພ້ອມນັ້ນ ໃຫ້ມີຄວາມສາມັກຄີປອງດອງ ກັບບັນດາເຜົ່າຢ່າງໜັກແໜ້ນ, ອະນຸລັກຮັກສາວັດທະນະທຳຮີດຄອງປະເພນີ ອັນເປັນມູນເຊື້ອຂອງເຜົ່າ ແລະ ຂອງຊາດໄວ້ໃຫ້ຍືນຍົງ, ຮັບປະກັນຄວາມມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບຍຸຕິທຳ, ພ້ອມກັນຮັກສາ ແລະ ເຊີດຊູກຽດຊື່ສຽງຖິ່ນກຳເນີດ ຂອງພັກຂອງລັດ, ຂອງກອງທັບປະຊາຊົນລາວ ໄວ້ໃຫ້ໝັ້ນຄົງ. ເອົາໃຈໃສ່ຄົ້ນຄວ້າ ຄວບຄຸມບັນດາໜີ້ສິນຂອງລັດ ຜັນຂະຫຍາຍ 5 ທ່າແຮງຫລັກ ເພື່ອພັດທະນາແຂວງຫົວພັນ ຕາມທິດສີຂຽວ ຍືນຍົງເປັນຕົ້ນ ແມ່ນການປູກຝັງ, ລ້ຽງສັດ, ພະລັງງານໄຟຟ້ານ້ຳຕົກ, ຫັດຖະກຳ ແລະ ການທ່ອງທ່ຽວ, ການພັດທະນາທາງດ້ານວັດທະນະທຳສັງຄົມ ໃຫ້ສູງຂຶ້ນເປັນຕົ້ນແມ່ນການສຶກສາ, ສາທາລະນະສຸກຢູ່ໃນຂັ້ນພື້ນຖານ ໃຫ້ກວ້າງຂວາງ ແລະ ຮຽກຮ້ອງໃຫ້ເອົາໃຈໃສ່ ດ້ານຈັນຍາບັນ ໃຫ້ມີຄວາມໜັກແໜ້ນ, ຄະນະພັກອຳນາດການປົກ ຄອງທຸກຂັ້ນ ຕ້ອງກຳແໜ້ນແນວທາງຫັນປ່ຽນໃໝ່ ຂອງພັກ-ລັດຖະບານ.
ຈາກນັ້ນ, ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ໄດ້ລາຍງານສະພາບການ ພັດທະນາເສດຖະກິດ-ສັງຄົມໂດຍຫຍໍ້ ໂດຍຍົກໃຫ້ເຫັນບາງຈຸດທີ່ພົ້ນເດັ່ນ ເຊັ່ນ: ພື້ນຖານໂຄ່ງລ່າງ ໄດ້ຮັບການປັບປຸງ, ການປູກຝັງຂອງປະຊາຊົນ ເປັນຂະບວນຟົດຟື້ນ, ການທ່ອງທ່ຽວ-ການບໍລິການ ມີທ່າຂະຫຍາຍຕົວ, ໂຄງປະກອບເສດຖະກິດ ມີທ່າອ່ຽງຫັນປ່ຽນຢ່າງຕັ້ງໜ້າ, ກົນໄກເສດຖະກິດຕະຫລາດ ໄດ້ຮັບການພັດທະນາກາຍເປັນຮູບປະທຳ ເທື່ອລະກ້າວ, ການພັດທະນາເສດຖະກິດ-ສັງຄົມ ມີທ່າຂະຫຍາຍຕົວທີ່ດີຕໍ່ເນື່ອງ ລວມຍອດຜະລິດຕະພັນພາຍໃນ (GDP) ບັນລຸ 2.000 ຕື້ກວ່າກີບ, ສະເລ່ຍລາຍຮັບໄດ້ 7 ລ້ານກວ່າກີບ ຫລື 914 ໂດລາສະຫະລັດ ຕໍ່ຄົນຕໍ່ປີ, ປັດຈຸບັນ ທົ່ວແຂວງມີ 13.201 ຄອບຄົວທຸກຍາກ, ກວມ 27,09% ຂອງຄອບຄົວທັງໝົດ, ສາມາດລົບລ້າງບ້ານທຸກຍາກໄດ້ 358 ບ້ານ, ສ້າງບ້ານພັດທະນາໄດ້ 173 ບ້ານ ແລະ ອອກໃບຢັ້ງຢືນ ຄອບຄົວພັດທະນາໄດ້ 2.311 ຄອບຄົວ.
ຂ່າວ: ສຳນັກຂ່າວສານປະເທດລາວ