ຕາມການລາຍງານເມື່ອວັນທີ 23 ທັນວາ 2016 ຂອງສຳນັກຂ່າວຕ່າງປະເທດວ່າ ທາງການຈີນຢືນຢັນວ່າ ພົບຜູ້ຕິດເຊື້ອພະຍາດໄຂ້ຫວັດສັດປີກ ເປັນຄົນທີສອງ ແລະທີ ສາມ ໃນອາທິດນີ້ ເຊິ່ງໃນຂະນະທີ່ເກົາຫຼີໃຕ້ ແລະຍີ່ປຸ່ນ ເລັ່ງຄວບຄຸມການລະບາດຂອງໄວຣັດ
ຜູ້ຕິດເຊື້ອທີ່ພົບນັ້ນ ອາໄສຢູ່ເມືອງຊຽງໄຮ້ ແລະເຊຍເໝິນ ໃນມົນທົນຟູຈຽນ ທາງພາກຕາເວັນອອກຂອງຈີນເຊິ່ງຂໍ້ມູນຈາກໜ່ວຍງານສາທາລະນະສຸກຂອງຊຽງໄຮ້ ວິນິດໄສວ່າ ຜູ້ຕິດເຊື້ອຢູ່ຊຽງໄຮ້ນັ້ນ ຕິດເຊື້ອໄຂ້ຫວັດສັດປີກສາຍພັນ H7N9 ເຊິ່ງເຂົາຫາກໍ່ເດີນທາງກັບມາຈາກການໄປທ່ຽວຢູ່ແຂວງຈຽງຊູ
ສ່ວນຢູ່ໃນເຊຍເໝິນ ທາງການອອກຄຳສັ່ງໃຫ້ເຊົາຂາຍສັດປີກ ໃນພື້ນທີ່ເຂດ Siming ຕັ້ງແຕ່ວັນທີ 22 ທັນວາ 2016 ເປັນຕົ້ນໄປ ຫຼັງຈາກພົບວ່າຊາຍອາຍຸ 44 ປີຄົນໜຶ່ງຕິດເຊື້ອໄຂ້ຫວັດສັດປີກສາຍພັນ H7N9 ເມື່ອວັນອາທິດຜ່ານມາ ແລະໃນຕອນນີ້ຄົນເຈັບໄດ້ເຂົ້າປິ່ນປົວຢູ່ໂຮງໝໍດ້ວຍອາການຄົງທີ່
ການປະກາດການຕິດເຊື້ອໄຂ້ຫວັດສັດປີກ 2 ຄົນຫຼ້າສຸດນີ້ ເກີດຂຶ້ນຫຼັງຈາກທາງການຮົງກົງຢືນຢັນວ່າ ພົບການຕິດເຊື້ອໄຂ້ຫວັດສັດປີກ ກັບຜູ້ອາຍຸສູງຄົນໜຶ່ງເມື່ອອາທິດຜ່ານມາ, ຄຳປະກາດພົບຜູ້ຕິດເຊື້ອໄຂ້ຫວັດສັດປີກຈຳນວນ 3 ຄົນນີ້ ມີຂຶ້ນຫຼັງຈາກທາງການເກົາຫຼີໃຕ້ ແລະຍີ່ປຸ່ນ ຫາກໍ່ອອກຄໍາສັ່ງຂ້າເປັດ ແລະໄກ່ ຫຼາຍລ້ານໂຕ ໃນຊ່ວງເດືອນພະຈິກຜ່ານມາ ເພາະມີການລະບາດໃນຟາມສັດ