ໃນຕອນບ່າຍຂອງວັນທີ 22 ທັນວາ 2016, ເວລາ 14:30 ໂມງ, ທີ່ ສະຖານທູດເຢຍລະມັນ ປະຈຳ ສປປ ລາວ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີ ກະຊວງການຕ່າງປະເທດ ໄດ້ເຂົ້າຮ່ວມເຊັນປື້ມໄວ້ອາໄລ ຕໍ່ກັບເຫດການຄົນຮ້າຍຂັບລົດບັນທຸກ ແລ່ນບຸກເຂົ້າທຳຮ້າຍປະຊາຊົນ ໃນງານຕະຫລາດຄຼິດສມາດ ຢູ່ໃຈກາງນະຄອນຫລວງແບກແລັງ, ປະເທດເຢຍລະມັນ.
ໂດຍມີເນື້ອໃນວ່າ: “ພວກຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າໂສກ ກ່ຽວກັບເຫດການສະຫຍອງຂວັນ ທີ່ເກີດຂຶ້ນຈາກການ ກໍ່ການກະທຳທີ່ໂຫດຮ້າຍປ່າເຖື່ອນ ຕໍ່ກັບເຫດການຄົນຮ້າຍຂັບລົດບັນທຸກ ແລ່ນບຸກເຂົ້າທຳຮ້າຍປະຊາຊົນ ໃນງານຕະຫລາດຄຼິດສະມາດ ຢູ່ໃຈກາງນະຄອນຫລວງແບກແລັງ, ໃນວັນທີ 19 ທັນວາ 2016, ເຊິ່ງເຮັດໃຫ້ມີຜູ້ເສຍຊີວິດ ແລະ ບາດເຈັບເປັນຈຳນວນຫລວງຫລາຍ. ໃນນາມລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ປະຊາຊົນລາວ, ພວກຂ້າພະເຈົ້າ ຂໍສະແດງຄວາມເສົ້າສະຫລົດໃຈ ແລະ ສະແດງຄວາມເຫັນໃຈຢ່າງສຸດຊຶ້ງ ມາຍັງລັດຖະບານ ແຫ່ງ ສາທາລະນະລັດ ສະຫະພັນ ເຢຍລະມັນ ແລະ ປະຊາຊົນເຢຍລະມັນ ກໍຄື ຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍ ຈາກເຫດການກະທຳຮຸນແຮງດັ່ງກ່າ”
ຂ່າວ: ສຳນັກຂ່າວສານປະເທດລາວ