ບົດຄວາມເກມ: ມື້ນີ້ໃນອະດີດ ວັນທີ 22 ທັນວາ ຫຼືມື້ວາງຈຳໜ່າຍເກມ The 3rd Birthday

0
1552

ວັນທີ 22 ທັນວາ ປີ 2010 ຫຼືມື້ນີ້ເມື່ອ 6 ປີທີ່ແລ້ວ ເປັນມື້ວາງຈຳໜ່າຍຂອງເກມ The 3rd Birthday ເທິງເຄື່ອງ PSP ທີ່ປະເທດຍີ່ປຸ່ນ. ເຊິ່ງເກມນີ້ເປັນແນວຊູດຕິ້ງມຸມມອງບຸກຄົນທີ 3 ທີ່ພັດທະນາຮ່ວມກັນທັງ Square Enix ແລະ HexaDrive. ນອກຈາກນີ້ກໍເປັນເກມລຳດັບທີ 3 ຂອງຊີຣີ Parasite Eve ເຊິ່ງທາງທີມພັດທະນາໄດ້ຕັດສິນໃຈໃຫ້ພາກນີ້ເປັນພາກ Spin-off ຂອງຊີຣີທີ່ມີຄວາມກ່ຽວຂ້ອງກັບເນື້ອຫາໃນພາກ 1-2 ໜ້ອຍຫຼາຍ, ທັງນີ້ໂຕເກມຍັງໄດ້ ທ່ານຮາຈິເມະ ທາບາຕະ (Hajime Tabata) ຜູ້ທີ່ມີຜົນງານກຳກັບເກມ Final Fantasy Type-0 ແລະ Final Fantasy XV ມາເປັນໄດເຣັກເຕີ້ໃຫ້ແກ່ພາກນີ້ນຳ. 

ເນື້ອເລື່ອງຂອງເກມນີ້ຈະເກີດຂຶ້ນໃນຊ່ວງປີ 2013 ຫຼື 1 ປີຫຼັງຈາກທີ່ກຸ່ມມອນສເຕີ້ທີ່ມີຊື່ເອີ້ນວ່າ: Twisted ໄດ້ປະກົດໂຕທີ່ເບື້ອງລຸ່ມຂອງເກາະແມນຮັດຕັນແລະທຳລາຍເມືອງໄປແບບມຸ່ນເອະເລະ ເຊິ່ງທາງການສະຫະລັດຯຕ້ອງຫາມາດຕະການມາຕໍ່ກອນກັບພວກ Twisted ດ້ວຍການຈັດຕັ້ງໜ່ວຍສະເພາະກິດທີ່ມີຊື່ວ່າ: Counter Twisted Investigation (CTI) ຂຶ້ນມາໂດຍສະເພາະ, ເຊິ່ງມີ ອາຢະ ນາງເອກຈາກ Parasite Eve ພາກ 1-2 ເປັນ 1 ໃນສະມາຊິກຂອງໜ່ວຍດັ່ງກ່າວ ເຊິ່ງນາງເຄີຍປະສົບເຫດຮ້າຍເຮັດໃຫ້ໝົດສະຕິແລະສູນເສຍຄວາມຊົງຈຳໄປເມື່ອ 2 ປີກ່ອນ, ນາງຈຶ່ງຕ້ອງອາໄສພະລັງ Over Drive ທີ່ຕິດໂຕມາໃນການທ່ອງເວລາໄປຫາອະດີດເພື່ອປາບພວກ Twisted ພ້ອມກັບຄົ້ນຫາຕົ້ນຕໍຂອງເລື່ອງນີ້ແລະຫາທາງຟື້ນຄືນຄວາມຊົງຈຳກັບມາໃຫ້ໄດ້. 

ລະບົບຂອງເກມນີ້ຈະເປັນສ່ວນປະສົມລະຫວ່າງແນວແອັກຊັ່ນຊູດຕິ້ງກັບແນວ RPG ເຊິ່ງຈະມີພາລະກິດໃຫ້ຫຼິ້ນຢູ່ຫຼາຍດ່ານ ໂດຍຈະມີສູນບັນຊາການຂອງໜ່ວຍ CTI ເປັນສະຖານທີ່ຮັບພາລະກິດ, ອ່ານໄຟລ໌ກ່ຽວກັບພາລະກິດຕ່າງໆ ແລະສາມາດຊື້ຫຼືປັບແຕ່ງອາວຸດໄດ້, ເຊິ່ງຜູ້ຫຼິ້ນສາມາດເຊບໄດ້ທັງເວລາຢູ່ໃນສູນ CTI ແລະບໍລິເວນເຊບໂຊນພາຍໃນພື້ນທີ່ລະຫວ່າງປະຕິບັດພາລະກິດ. ນອກຈາກນີ້ ເວລາຜ່ານແຕ່ລະດ່ານກໍຈະໄດ້ Bounty Point ທີ່ປຽບຄືເງິນໃນເກມແລະຄ່າປະສົບການເອົາໄວ້ພັດທະນາໂຕລະຄອນແລະອາວຸດທີ່ໃສ່ໄດ້, ດ້ານລະບົບການຕໍ່ສູ້ຜູ້ຫຼິ້ນຈະສາມາດເລືອກຕິດຕັ້ງອາວຸດແລະສະຫຼັບໃຊ້ໄປມາໄດ້ໂດຍກົດພຽງປຸ່ມດຽວຄ້າງໄວ້ ແລະຟື້ນພະລັງຊີວິດເອງໄດ້ຖ້າຫາກເຂົ້າກຳບັງຫຼືຢືນນອກເຂດຕໍ່ສູ້. 

Fact ເລັກນ້ອຍກ່ຽວກັບເກມ The 3rd Birthday

  • ໃນຊ່ວງຕົ້ນເກມນີ້ເຄີຍຖືກວາງແຜນວ່າຈະລົງໃຫ້ກັບສະມາດໂຟນ ແຕ່ໄດ້ຖືກປ່ຽນມາເປັນເກມ Exclusive ເທິງ PSP ແທນ ດ້ວຍເຫດຜົນທາງກົນລະຍຸດການຕະຫຼາດແລະຮູບແບບຂອງເກມ.

  • ລະຫວ່າງທີ່ເກມນີ້ຍັງຢູ່ໃນຂັ້ນຕອນການພັດທະນາ ທ່ານໂນມຸຣະ ແລະທ່ານທາບາຕະໄດ້ຕັ້ງເປົ້າວ່າເກມນີ້ໜ້າຈະຂາຍໄດ້ປະມານ 5 ແສນຊຸດທົ່ວໂລກ ໂດຍປະເມີນຈາກຄວາມສຳເລັດທີ່ເຄີຍເຮັດໄວ້ໄດ້ຕັ້ງແຕ່ເກມ Crisis Core: Final Fantasy VII ຈົນເກມໄດ້ວາງຈຳໜ່າຍແທ້ກໍສາມາດເຮັດຍອດຂາຍປະຈຳອາທິດທຳອິດໃນຍີ່ປຸ່ນໄປໄດ້ 140,000 ຊຸດ ແລະເມື່ອນັບຈົນຮອດທ້າຍປີ 2011 ປະກົດວ່າຍອດຂາຍໄປຈົບທີ່ຈຳນວນ 249,747 ຊຸດ (ສະເພາະໃນຍີ່ປຸ່ນ), ແຕ່ວ່າ ໃນປັດຈຸບັນຍັງບໍ່ມີການລາຍງານຍອດຂາຍຈາກພູມິພາກອື່ນໆເລີຍນອກຈາກຍີ່ປຸ່ນ. 

  • ເກມນີ້ໄດ້ຮັບຄຳວິຈານທີ່ເອີ້ນວ່າ: “ສຽງແຕກ” ໄປຄົນລະທິດລະທາງ ໂດຍຝັ່ງຍີ່ປຸ່ນຈະຍ້ອງໃນດ້ານຂອງ Gameplay ທີ່ມີການອອກແບບໄດ້ມ່ວນເປັນຕາຫຼິ້ນ ແຕ່ຈະໄປສັບປະເດັນຂອງເນື້ອເລື່ອງທີ່ຫຼຸດຈາກຂອບເກົ່າໆຂອງພາກ 1-2 ໄປໄກພໍສົມຄວນ ໃນຂະນະທີ່ຝັ່ງຕາເວັນຕົກຈະແນມວ່າເນື້ອເລື່ອງເບິ່ງມີຄວາມແປກໃໝ່ ບໍ່ຈຳເຈກັບພລ໋ອດທີ່ເປັນກິ່ນອາຍເກມຍີ່ປຸ່ນແບບເກົ່າໆ ແຕ່ດ້ານ Gameplay ນັ້ນ ເຖິງວ່າຈະມີລູກຫຼິ້ນໃໝ່ໆທີ່ສະແດງໃຫ້ເຫັນເຖິງຄວາມຄິດສ້າງສັນ ແຕ່ເມື່ອທຽບກັບເກມຊູດຕິ້ງອື່ນໆແລ້ວ ລະບົບເກມນີ້ຍັງຂາດຄວາມຄ່ອງໂຕ ແລະບໍ່ຄ່ອຍເປັນມິດກັບຜູ້ຫຼິ້ນທີ່ບໍ່ສັນທັດເກມຊູດຕິ້ງປານໃດ. 

  • ຫາກຜູ້ຫຼິ້ນເຄລຍເກມໃນຮອບທີ 2 ຈະມີສາກຈົບໃຫ້ເບິ່ງເພີ່ມຕື່ມໃນ Credit ແລະຖ້າຜູ້ຫຼິ້ນສາມາດເຄລຍເກມໄດ້ຮອດ 10 ຮອບຂຶ້ນໄປ ຈະສາມາດຫຼິ້ນເກມຮອບຕໍ່ໄປໂດຍມີລູກປືນໃຫ້ໃຊ້ໄດ້ແບບບໍ່ຈຳກັດ. 

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station