ໃນ​ວັນ​ທີ 21 ທັນວາ 2016 ຜ່ານມານີ້ ກອງ​ປະຊຸມ​ວິຊາ​ການ​ຂະແໜງສ່ວຍ​ສາ​ອາກອນ​ທົ່ວ​ປະເທດ ​ປະຈຳ​ສົກ​ປີ 2015-2016 ທີ່ສູນ​ການ​ຮ່ວມ​ມື​ສາກົນ ແລະ ເຝິກອົບຮົມ (ICTC) ເປັນ​ປະທານ​ຂອງ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດ​ຖະມົນຕີ​ກະຊວງ​ການ​ເງິນ ມີ​ບັນດາຫົວໜ້າ​ກົມ ຮອງ​ກົມ ພະ​ແນກ ແລະ ພະນັກງານ​ວິຊາ​ການ​ສ່ວຍສາ​ອາກອນ​ທີ່​ມາ​ຈາກ​ກົມ ພະແນກສ່ວຍ​ສາ​ອາກອນ​ແຂວງ ນະຄອນຫຼວງ​ ໃນ​ທົ່ວ​ປະເທດ.

​ຮອງ​ນາຍົກ ກ່າວ​ວ່າ: ວຽກ​ງານ​ສ່ວຍ​ສາ​ອາກອນ ​ແມ່ນ​ມີ​ບົດບາດ​ສຳຄັນ​ທີ່​ສຸດ ໃນ​ລະບົບ​ການ​ເງິນ​ແຫ່ງ​ລັດ ທີ່ເຮັດ​ໜ້າທີ່​ຂຸດ​ຄົ້ນ​ບັນດາ​ແຫຼ່ງລາຍ​ຮັບ​ເຂົ້າ​ງົບປະມານ ເພື່ອຕອບ​ສະໜອງ​ໃຫ້​ແກ່​ການ​ເບີກຈ່າຍ​ງົບປະມານ ​ໃນ​ການ​ປົກ​ປັກຮັກສາ ແລະ ພັດທະນາ​ປະເທດຊາດ ເຊິ່ງ​ລາຍ​ຮັບ​ສ່ວຍ​ສາ​ອາກອນ ​ໄດ້​ກວມ​ເອົາ​ຫຼາຍ​ກວ່າເກືອບ​ເຄິ່ງ​ໜຶ່ງ​ຂອງ​ລາຍ​ຮັບ​ງົບປະມານ​ທັງ​ໝົດ ໃນ​ແຕ່​ລະ​ປີແມ່ນ​ມີ​ລັກສະນະ​ເພີ່ມ​ຂຶ້ນ ສະແດງ​ອອກ​ໃນ​ສົກ​ປີ 2015-2016 ຕົວ​ເລກ​ແຜນການ 10.074 ຕື້​ກີບ ປະຕິບັດ​ໄດ້ 8.558 ຕື້​ກີບ ເທົ່າກັບ 85% ເຖິງ​ວ່າການ​ຈັດ​ເກັບລາຍ​ຮັບ​ໄດ້​ຖືກ​ຜົນ​ກະທົບ​ຈາກ​ປັດ​ໄຈ​ພາຍ​ໃນ ແລະ ພາຍນອກ​ຢ່າງ​ໜັກໜ່ວງ​ກໍ່​ຕາມ ແຕ່​ກໍ່ມີ​ຫຼາຍ​ແຂວງ​ທີ່​ປະຕິບັດ​ໄດ້​ລື່ນຕົວ​ເລກ​ແຜນການ​ວາງ​ໄວ້ ເປັນຕົ້ນ ແຂວງ​ຜົ້ງ​ສາລີ ຫົວພັນ ວຽງຈັນ ໄຊ​ສົມບູນ ແລະ ແຂວງ​ເຊກອງ ສ່ວນ​ບັນດາ​ແຂວງ ແລະ ກົມ​ທີ່​ເຫຼືອ ​ເຖິງ​ວ່າ​ປະຕິບັດ​ບໍ່​ໄດ້ຕາມ​ຕົວ​ເລກ​ແຜນການ​ວາງ​ໄວ້ ແຕ່​ກໍ່​ມີ​ລັກສະນະ​ຕັ້ງໜ້າ​ເພີ່ມ​ຂຶ້ນ ໃນ​ຈັງຫວະ​ດີ​ສົມຄວນ ເມື່ອ​ທຽບໃສ່​ປີ​ຜ່ານໆ​ມາ.

ຂ່າວ: ວຽງຈັນໃໝ່