ຕາມການລາຍງານຂອງເວັບໄຊອ໊ອດດີຕີ້ເຊັນທຣັນ ເມື່ອວັນທີ 20 ທັນວາ 2016 ຜ່ານມາວ່າ ໄຄໂຣ ອໍທິຊ ອາຍຸ 11 ປີ ໄດ້ໃຊ້ເວລາວ່າງໃນທຸກໆອາທິດ ມາຕັ້ງໂຕະຮັບການປຶກສາບັນຫາທາງອາລົມ ກັບຄົນທີ່ຜ່ານໄປມາ ຢູ່ສະຖານີລົດໄຟໃຕ້ດິນເບດຟອດ ເອລ ໃນນະຄອນຫຼວງນິວຢອກ ສະຫະລັດ, ລາວຈະຢູ່ນັ້ນ ເປັນເວລາ 2 ຊົ່ວໂມງ ລໍຖ້າລູກຄ້າເຂົ້າມາຫາ
ຄ່າບໍລິການພຽງແຕ່ 2 ດອນລາສະຫະລັດ ກັບການປຶກສາ 5 ນາທີ ເຮັດໃຫ້ມີຄົນຈຳນວນຫຼາຍພາກັນມາຂໍຄຳແນະນຳຈາກລາວ ເຊິ່ງ ໄຄໂຣ ສາມາດ ໃຫ້ຄຳປຶກສາທີ່ດີ ແບບບໍ່ໜ້າເຊື່ອວ່າເດັກອາຍຸນ້ອຍເທົ່ານີ້ຈະເຮັດໄດ້ ເຊິ່ງບັນຫາຕ່າງໆ ທີ່ຄົນມັກຖາມມີ: ເລື່ອງຄວາມຮັກຄວາມສຳພັນ, ບັນຫາການເຮັດວຽກ ແລະອື່ນໆ ເຊິ່ງລາວສາມາດໃຫ້ຄຳປຶກສາໄດ້ທຸກເລື່ອງ
ພໍ່ຂອງລາວໄດ້ເວົ້າວ່າ ລາວເອງຫາເງິນໄດ້ບໍ່ຫຼາຍປານໃດ, ລູກຊາຍຈຶ່ງເກີດມີໄອເດຍ ທີ່ຢາກເຮັດທຸລະກິດທີ່ສາມາດເຮັດໄດ້ດ້ວຍຕົວເອງ ເຊິ່ງລາວກໍສະໜັບສະໜູນຄວາມຄິດຂອງລູກ, ໃນມື້ຕໍ່ມາ ລາວຈຶ່ງເອົາໂຕະມາຕັ້ງເທິງຖະໜົນ ແລະລາວກໍກາຍເປັນທີ່ນິຍົມຢ່າງບໍ່ໜ້າເຊື່ອ, ມື້ໃດທີ່ມີລູກຄ້າເຂົ້າຫຼາຍ ກໍໄດ້ເງິນຮອດ 50 ດອນລາສະຫະລັດ
ແນວໃດຕາມ ເລື່ອງເງິນກໍບໍ່ແມ່ນເຫດຜົນດຽວທີ່ເຮັດໃຫ້ ໄຄໂຣ ອອກມາໃຫ້ຄຳປຶກສາໃຫ້ຄົນອື່ນແບບນີ້, ແຕ່ເພາະວ່າລາວເຄີຍຖືກໝູ່ທຳຮ້າຍຮ່າງກາຍຢູ່ໂຮງຮຽນ, ເມື່ອສາມາດຜ່ານພົ້ນປະສົບການເຫຼົ່ານີ້ມາໄດ້ ລາວກໍຢາກທີ່ຈະຊ່ວຍໃຫ້ຄຳປຶກສາດ້ານອາລົມກັບຜູ້ອື່ນໆ ເຊິ່ງວຽກນີ້ກໍເຮັດໃຫ້ລາວມີໝູ່ໃໝ່ອີກຫຼາຍຄົນ