ວັນທີ 21 ທັນວາ ປີ 1990 ຫຼືມື້ນີ້ເມື່ອ 26 ປີທີ່ແລ້ວ ເປັນມື້ວາງຈຳໜ່າຍເກມ Final Fight ເທິງເຄື່ອງ Super Famicom ທີ່ປະເທດຍີ່ປຸ່ນ. ໂດຍເກມ Final Fight ຖືວ່າເປັນ 1 ໃນເກມແນວແອັກຊັ່ນລຸຍດ້ານຂ້າງແບບ 2D ຍຸກບຸກເບີກແລະໄດ້ຮັບຄວາມນິຍົມສູງສຸດໃນຕອນນັ້ນ.
ເນື້ອເລື່ອງຂອງເກມ Final Fight ຈະກ່າວເຖິງ ເຈສສິກ້າ (Jessica) ລູກສາວຂອງ ໄມ ແຮກກ້າຣ໌ (Mike Haggar) ອະດີດນັກມວຍປ້ຳອາຊີບທີ່ປັດຈຸບັນດຳລົງຕຳແໜ່ງເຈົ້າເມືອງຂອງ ເມືອງເມໂທຣຊິຕີ້ (Metro City) ໄດ້ຖືກແກ້ງ ແມດເກຍຣ໌ (Mad Gear) ລັກພາໂຕໄປເພື່ອບີບບັງຄັບໃຫ້ແຮກກ້າຣ໌ຍອມຮ່ວມມືໃນແຜນການອັນຊົ່ວຮ້າຍຂອງພວກມັນ ແຕ່ວ່າດ້ວຍໃຈຮັກຄວາມຍຸດຕິທຳ ແຮກກ້າຣ໌ ຈຶ່ງຫັນໄປຮ່ວມມືກັບ ໂຄດີ້ (Cody) ແຟນສາວຂອງເຈສສິກ້າ ໃນການບຸກຮັງຂອງແມດເກຍຣ໌ແລະຊ່ອຍເຈສສິກ້າອອກມາໃຫ້ສຳເລັດ.
ລະບົບຂອງເກມ Final Fight ນັ້ນຈະສາມາດຫຼິ້ນໄດ້ 2 ຄົນພ້ອມກັນມາຕັ້ງແຕ່ສະໄໝຍັງເປັນຕູ້ອາເຂດຢອດຫຼຽນພຸ້ນ, ໂດຍເລີ່ມຕົ້ນເກມກໍຈະມີໂຕລະຄອນມາໃຫ້ເລືອກໃຊ້ເຖິງ 3 ໂຕໄດ້ແກ່: ກາຍ (Guy), ໂຄດີ້ ແລະ ແຮກກ້າຣ໌ ແຕ່ເນືີອງຈາກສັກກະຍະພາບຂອງເຄື່ອງ Super Famicom ໃນຕອນນັ້ນຍັງບໍ່ອຳນວຍ, ທາງ Capcom ຈຶ່ງຕ້ອງໃຫ້ Final Fight ພາກທຳອິດແບ່ງອອກເປັນ 2 ເວີຊັ່ນຄື: ເວີຊັ່ນທຳອິດແມ່ນມີໂຄດີ້ແລະແຮກກ້າຣ໌ໃຫ້ຫຼິ້ນ ແລະອີກເວີຊັ່ນແມ່ນຈະມີພຽງກາຍຄົນດຽວເທົ່ານັ້ນ ເຊິ່ງບໍ່ສາມາດຫຼິ້ນພ້ອມກັນ 2 ຄົນໄດ້ ແລະແຕ່ລະໂຕລະຄອນກໍຈະມີຄວາມສາມາດໃນການຕໍ່ສູ້ຄົນລະສະຕາຍ.
ການບັງຄັບຂອງເກມນີ້ຈະຂ້ອນຂ້າງພື້ນໆ ແລະເຂົ້າໃຈໄດ້ງ່າຍສຳລັບມືໃໝ່ ເພາະນອກຈາກປຸ່ມບັງຄັບທິດທາງການເຄື່ອນທີ່ແລ້ວ ກໍຈະມີພຽງປຸ່ມໂຈມຕີແລະປຸ່ມໂດດພ້ອມກັນ ກໍຈະເປັນທ່າໄມ້ຕາຍທີ່ໂຈມຕີສັດຕູອ້ອມຂ້າງ (ແຕ່ມີຂໍ້ເສຍຄືເມື່ອໃຊ້ແລ້ວຈະເສຍພະລັງຊີວິດເລັກນ້ອຍ), ສ່ວນການຈັບທຸ້ມນັ້ນຜູ້ຫຼິ້ນສາມາດເຮັດໄດ້ໂດຍການຍ່າງໄປຕຳສັດຕູ ໂຕລະຄອນກໍຈະເຮັດການຈັບສັດຕູໂຕນັ້ນໂດຍອັດຕະໂນມັດ (ຖ້າບໍ່ຖືກມັນສວນກ່ອນ) ແລ້ວຄ່ອຍກົດປຸ່ມໂຈມຕີພ້ອມກັບປຸ່ມທິດທາງທີ່ຕ້ອງການທຸ້ມສັດຕູໂຕນັ້ນໄປ ແຕ່ຖ້າເປັນແຮກກ້າຣ໌ກໍຈະມີທ່າທຸ້ມອີກແບບຄື: ລະຫວ່າງທີ່ຈັບໂຕສັດຕູໄດ້ ໃຫ້ກົດປຸ່ມໂດດຕາມດ້ວຍປຸ່ມໂຈມຕີກໍຈະເປັນທ່າທຸ້ມ Pile Driver ທີ່ມີພະລັງໂຈມຕີສູງກວ່າ, ສ່ວນໂຄດີ້ຈະມີຄວາມສາມາດພິເສດບ່ອນທີ່ເມື່ອຈັບອາວຸດທີ່ເປັນມີດມາໃຊ້ ເວລາກົດໃຊ້ມີດໂຈມຕີສັດຕູໄລຍະປະຊິດຈະເປັນການເອົາມີດຈິ້ມ ເຊິ່ງຕ່າງຈາກໂຕລະຄອນອື່ນທີ່ຈະເປັນການດຶກອອກໄປ ແລະສຸດທ້າຍແມ່ນ ກາຍ ທີ່ຈະສາມາດໂດດໄຕ່ກຳແພງຫຼືຂອບສາກໄດ້ (ຄືກັບຊຸນລີໃນ Street Fighter). ທັງນີ້ Final Fight ເວີຊັ່ນທີ່ລົງຕູ້ເກມອາເຂດຈະມີຄວາມຍາວທັງໝົດ 6 ດ່ານ ແລະຍັງມີສາກເກັບຄະແນນໂບນັສໃຫ້ຫຼິ້ນອີກ 2 ສາກ ແລະຈະມີບອສຢູ່ທ້າຍສາກລວມທັງໝົດ 6 ໂຕ (ດ່ານລະໂຕ) ແຕ່ພໍຍ້າຍມາລົງເຄື່ອງ Super Famicom ຈຳນວນດ່ານກໍຖືກຕັດລົງເຫຼືອ 5 ດ່ານ ແລະຕັດດ່ານໂບນັສບາງແບບອອກໄປນຳ.
Fact ເລັກນ້ອນກ່ຽວກັບເກມ Final Fight
- ທ່ານໂຢຊິກິ ໂອຄາໂມໂຕະ (Yoshiki Okamoto) ໂປຣດິວເຊີ້ຂອງ Final Fight ພາກທຳອິດໄດ້ເຜີຍວ່າເກມນີ້ໄດ້ແຮງບັນດານໃຈມາຈາກເກມ Double Dragon II: The Revenge ໂດຍເລີ່ມຕົ້ນນັ້ນທາງຝ່າຍຂາຍຂອງ Capcom ນັ້ນຕ້ອງການຈະໃຫ້ທີມພັດທະນາຂອງບໍລິສັດລອງເຮັດພາກຕໍ່ຂອງເກມ Street Fighter ພາກທຳອິດ ເຊິ່ງທີມຂອງທ່ານໂອຄາໂມໂຕະໄດ້ຕັ້ງໃຈແຕ່ທຳອິດວ່າໃຫ້ Final Fight ເປັນພາກຕໍ່ຂອງ Street Fighter ຫັ້ນແຫຼະ ແຕ່ພໍເຮັດໄປເຮັດມາ ທາງ Capcom ກໍມີຄຳສັ່ງໃຫ້ໃຊ້ຊື່: Final Fight ໄປຄືເກົ່າ ເນື່ອງຈາກວ່າໂຕເກມທີ່ເຮັດມານັ້ນບໍ່ໄດ້ມີຄວາມຄືຫຼືຄ້າຍ Street Fighter ເລີຍແມ້ແຕ່ໜ້ອຍດຽວ.
- ຍອດຂາຍຂອງ Final Fight ພາກທຳອິດ ເມື່ອນັບລວມທຸກແພລັດຟອຣ໌ມແລ້ວ ສາມາດເຮັດໄປໄດ້ 3.4 ລ້ານຊຸດທົ່ວໂລກ ແລະເຖິງວ່າຈະມີການເຮັດພາກຕໍ່ອອກມາແດ່ ແຕ່ກໍບໍ່ມີພາກໃດທີ່ເຮັດຍອດຂາຍໄດ້ສູງເທົ່າພາກທຳອິດອີກເລີຍ.
- ຄວາມສຳເລັດຂອງ Final Fight ພາກທຳອິດ ບໍ່ໄດ້ມີພຽງຍອດຂາຍເທົ່ານັ້ນ ຫາກແຕ່ຄວາມນິຍົມຂອງມັນຍັງສົ່ງຜົນເຖິງກະແສຈາກຜູ້ຫຼິ້ນໃນຊ່ວງ ຄ.ສ 1989-1991 ທີ່ໃຜໆຕ່າງກໍເວົ້າເປັນສຽງດຽວກັນວ່າ: “ນຶກເຖິງເກມລຸຍດ້ານຂ້າງຕີອັນຕະພານ ຕ້ອງຄຶດເຖິງ Final Fight ກ່ອນສະເໝີ”
ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!
ທີ່ມາ: online station