ໃນວັນທີ 20 ທັນວາ 2016ຜ່ານມານີ້ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງຄະນະຜູ້ແທນຂັ້ນສູງ ຂອງສູນກາງພັກກອມມູນິດຈີນ ນໍາໂດຍສະຫາຍ ຫລິວ ສີປາວ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະເຂົ້າຮ່ວມກອງປະຊຸມສຳມະນາ ທິດສະດີສອງພັກລາວ-ຈີນ ຄັ້ງທີ 5 ຢູ່ ສປປ ລາວ ແຕ່ວັນທີ 20-22 ທັນວາ 2016.
ໃນໂອກາດດັ່ງກ່າວ, ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ຕໍ່ການມາຢ້ຽມຢາມຢ່າງເປັນທາງການ ແລະ ເຂົ້າຮ່ວມກອງປະຊຸມສໍາມະນາ ທິດສະດີສອງພັກ ລາວ-ຈີນ ຄັ້ງທີ 5 ຢູ່ ສປປ ລາວ ຂອງສະຫາຍ ຫລິວ ສີປາວ ພ້ອມດ້ວຍຄະນະ, ເຊິ່ງເປັນການຜັນຂະຫຍາຍຂໍ້ຕົກລົງ ລະຫວ່າງການນໍາສູງສຸດ ຂອງສອງພັກ, ສອງລັດ ລາວ-ຈີນ ແລະ ແຜນການຮ່ວມມື ລະຫວ່າງ 2 ພັກ ລາວ-ຈີນ ແຕ່ປີ 2016-2020 ຢ່າງເປັນຮູບປະທໍາ, ທັງເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ.
ພ້ອມນີ້, ສະຫາຍ ຫລິວ ສີປາວ ໄດ້ສະແດງຄວາມຂອບໃຈຕໍ່ສະຫາຍ ບຸນຍັງ ວໍລະຈິດ ທີ່ໄດ້ໃຫ້ການຕ້ອນຮັບຄະນະ ແລະ ໄດ້ແຈ້ງສະພາບພົ້ນເດັ່ນ ຂອງພັກກອມມູນິດຈີນ, ສະພາບການພັດທະນາເສດຖະກິດ-ສັງຄົມຂອງຈີນ ນັບແຕ່ກອງປະຊຸມໃຫຍ່ຄັ້ງທີ 18 ຂອງ ພັກກອມມູນິດຈີນ ເປັນຕົ້ນມາ ກໍຄືຕີລາຄາສູງ ຕໍ່ການພົວພັນຮ່ວມມືຮອບດ້ານ ລະຫວ່າງສອງພັກ, ສອງລັດ ຈີນ-ລາວ ໃນໄລຍະຜ່ານມາ ແລະ ໃນປັດຈຸບັນ, ເຊິ່ງເປັນການປະກອບສ່ວນ ອັນສໍາຄັນເຂົ້າໃນພາລະກິດການສ້າງສາພັດທະນາ ຢູ່ແຕ່ລະປະເທດ ກໍຄືພາລະກິດປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືໃນຂົງເຂດ ແລະ ໃນໂລກ.
ແຫຼ່ງຂ່າວ: ສຳນັກຂ່າວສານປະເທດລາວ