ຕາມການລາຍງານຂ່າວຂອງເວັບໄຊປະເທດຈີນ ເມື່ອວັນທີ 17 ທັນວາ 2016 ຜ່ານມາວ່າ ຕາມເວລາທ້ອງຖິ່ນປະມານ 16:00 ໂມງ, ບໍລິເວນບ່ອນພັກອາໄສ ແຖວຖະໜົນຫຼົງຖູ ເມືອງເຫີ່ເຟ່ຍ ມົນທົນອັນຮຸຍ ເກີດເຫດລົດເອສຢູວີ ສີດຳ ທີ່ຈອດຢູ່ບໍລິເວນສີ່ແຍກ ຖືກອ້ອມຮອບດ້ວຍຖັງຂີ້ເຫຍື້ອ ກວ່າ 40 ຖັງ ເພາະໄປຈອດບໍລິເວນທີ່ພະນັກງານເກັບຂີ້ເຫຍື້ອ ຕ້ອງເອົາຖັງຂີ້ເຫຍື້ອມາປະໄວ້ຮຽງກັນ ເພື່ອລໍຖ້າລົດຂີ້ເຫຍື້ອ ມາເກັບ ເຊິ່ງພະນັກງານພະຍາຍາມຕິດຕໍ່ຫາເຈົ້າຂອງລົດແລ້ວ ແຕ່ບໍ່ສາມາດຕິດຕໍ່ໄດ້ ຈຶ່ງເອົາຖັງໄປກອງໄວ້ອ້ອມລົດ

ຕາມການລາຍງານບອກວ່າ ເຖິງແມ່ນວ່າລົດຄັນດັ່ງກ່າວ ຈະອ້ອມລ້ອມດ້ວຍຖັງຂີ້ເຫຍື້ອຈຳນວນຫຼາຍ ແຕ່ກໍຍັງມີຊ່ອງຫວ່າງເຫຼືອ ຈຶ່ງບໍ່ໄດ້ສ້າງຄວາມເສຍຫາຍໃຫ້ລົດ, ເຊິ່ງຊາວບ້ານແຖວນັ້ນບອກວ່າ ເຫັນລົດຄັນດັ່ງກ່າວ ຈອດປະໄວ້ບ່ອນນັ້ນ ຕັ້ງແຕ່ຕອນສວາຍຂອງວັນທີ 17 ທັນວາ 2016 ແຕ່ບໍ່ມີໃຜທັນເຫັນເຈົ້າຂອງ

ພະນັກງານເກັບຂີ້ເຫຍື້ອບອກວ່າ ບໍລິເວນນັ້ນ ເປັນເຂດຊຸມຊົນ ແລະເປັນບ່ອນທີ່ພະນັກງານເກັບຂີ້ເຫຍື້ອ ເອົາຖັງມາປະລວມກັນໄວ້ຊົ່ວຄາວ ເພື່ອຖ້າລົດຂີ້ເຫຍື້ອມາເກັບໄປໂຮງງານຂີ້ເຫຍື້ອ, ເຊິ່ງປົກກະຕິກໍບໍ່ໄດ້ມີການອະນຸຍາດໃຫ້ຈອດບໍລິເວນນັ້ນ, ລົດຄັນດັ່ງກ່າວກໍຈອດປະໄວ້ຫຼາຍຊົ່ວໂມງແລ້ວ ແລະອີກຢ່າງກໍບໍ່ສາມາດຕິດຕໍ່ຫາເຈົ້າຂອງລົດໄດ້ ຈຶ່ງໄດ້ເຮັດແບບນັ້ນ