ຕາມການລາຍງານຂອງສຳນັກຂ່າວເອເອຟພີ ເມື່ອວັນທີ 19 ທັນວາ 2016 ຜ່ານມາວ່າ ນາງ ຊະເວ ຊຸນຊິນ ອາຍຸ 60 ປີ ຜູ້ເປັນໃຈກາງຄະດີບໍ່ດີທີ່ດັງລະດັບປະເທດຂອງເກົາຫຼີໃຕ້ ວ່າອາໄສຄວາມເປັນໝູ່ສະໜິດຂອງປະທານາທິບໍດີ ປາກ ກຶນເຮ ແຊກແຊງກິດຈະການຂອງລັດຖະບານ ແລະບັງຄັບໄລ່ເງິນຈຳນວນຫຼາຍກັບບໍລິສັດຍັກໃຫຍ່ ເພື່ອປະໂຫຍດສ່ວນຕົວ ໄດ້ຖືກນຳຕົວມາສອບສວນ ຢູ່ສານເຂດກາງກຸງໂຊນ, ການປະກົດຕົວຂອງນາງ ຊະເວ ຄັ້ງນີ້ ເປັນການປາກົດຕົວຄັ້ງທຳອິດ ນັບແຕ່ເກີດເລື່ອງໃນ ເດືອນ ຕຸລາ 2016 ຜ່ານມາ ໄດ້ເດີນທາງກັບມາຈາກເຢຍລະມັນ ເພື່ອໃຫ້ປາກຄໍາກັບໄອຍະການ ແລະເປັນຄັ້ງທໍາອິດ ຫຼັງຈາກປະທານາທິບໍດີ ປາກ ກຶນເຮ ຖືກລັດຖະສະພາ ລົງມະຕິຖອດຖອນ ຈົນຢູ່ລະຫວ່າງພັກວຽກ ເພື່ອລໍຖ້າການສືບສວນຕາມຂະບວນການຖອດຖອນຂອງສານລັດຖະທຳມະນູນ

ການໄຕ່ສວນດັ່ງກ່າວນີ້ ເປັນຂະບວນການກຽມຄວາມພ້ອມຂອງສານ ເຊິ່ງນາງ ຊະເວ ບໍ່ຈຳເປັນຕ້ອງເຂົ້າຮ່ວມຟັງ, ແຕ່ທາງທະນາຍຄວາມເວົ້າວ່າ ນາງ ຊະເວ ຕ້ອງການມີສ່ວນຮ່ວມ ແລະສະແດງຄວາມຈິງໃຈໃນການດຳເນີນຄະດີ ຫຼັງຈາກຖືກວິຈານຢ່າງແຮງ ທີ່ບໍ່ຍອມມາຮັບຟັງການສືບສວນຂອງຄະນະກຳມາທິການລັດຖະສະພາ