ອີງຕາມການລາຍງານຂອງສຳນັກຂ່າວຣອຍເຕີ ເມື່ອວັນທີ 19 ທັນວາ 2016 ວ່າ ໃນຊ່ວງອາທິດຜ່ານມາ ສະຫະລັດອາເມລິກາໄດ້ປະເຊີນກັບສະພາບອາກາດໜາວເຢັນຫຼາຍ ໃນຫຼາຍໆພື້ນທີ່ ໂດຍສະເພາະທາງພາກເໜືອ ຂອງລັດມອນທານາ ແລະລັດນໍທະດາໂກຕາ ມີຫິມະຕົກຫຼາຍກວ່າເຂດອື່ນໆ ເຊິ່ງອາກາດໜາວເຂົ້າຂັ້ນອັນຕະລາຍ, ປະຊາຊົນສ່ຽງເປັນພະຍາດຄວາມເຢັນກັດ ຫາກອອກໄປສຳຜັດກັບອາກາດດົນກວ່າ 10 ນາທີ, ລວມທັງລົມໜາວແຮງ ສາມາດເຮັດໃຫ້ເກີດພາວະໂຕເຢັນເກີນ

ນັກອຸຕຸນິຍົມວິທະຍາຈາກສູນພະຍາກອນອາກາດ ໄດ້ເປີດເຜີຍວ່າ ບາງສ່ວນຂອງພື້ນທີ່ລັດມອນທານາ ອຸນຫະພູມຕິດລົບຕໍ່າເປັນປະຫວັດການ, ເມື່ອວັນສຸກ ທີ 16 ທັນວາ 2016 ຜ່ານມາອຸນຫະພູມຫຼຸດລົງຕໍ່າສຸດເຖິງ -34 ອົງສາ ໜາວສຸດໃນຮອບກວ່າ 30 ປີ ຕັ້ງແຕ່ປີ 1983 ເຊິ່ງເປັນຜົນກະທົບມາຈາກມວນອາກາດເຢັນ ຈາກບໍລິເວນຂົ້ວໂລກເໜືອ ທີ່ພັດມາທາງພາກໃຕ້ຂອງແຄນນາດາ ແລະພາກເໜືອຂອງລັດ ປະກອບກັບພາຍຸທີ່ພັດມາຈາກມະຫາສະໝຸດປາຊີຟິກ

ຖະໜົນໃນລັດມອນທານາ ຕ້ອງໄດ້ປິດເພື່ອເລັ່ງເອົາຫິມະອອກຈາກເສັ້ນທາງ, ຂະນະທີ່ຫຼາຍໆໂຮງຮຽນ ໄດ້ປະກາດປິດ ແລະທາງເຈົ້າໜ້າທີ່ກໍອອກມາເຕືອນປະຊາຊົນໃຫ້ອາໄສຢູ່ໃນບ້ານ, ນອກຈາກນີ້ ພື້ນທີ່ໃນລັດວິສຄອນຊິນ ອິນດິແອນາ ເວີມອນ ນິວແຮມເຊຍ ແລະລັດເມນ ຍັງໄດ້ຮັບຜົນກະທົບເກີດຫິມະຖະຫຼົ່ມຢ່າງແຮງ ຫຼັງຈາກເກີດພາຍຸເມື່ອວັນທີ 17 ທັນວາ 2016 ຜ່ານມາ ມີປະລິມານຫິມະສະສົມໜາປະມານ 15 ຊັງຕີແມັດ