ໃນຕອນເຊົ້າ ຂອງວັນທີ 16 ທັນວາ 2016 ຜ່ານມາ ທີ່ສູນຝຶກອົບຮົມ ແລະ ການຮ່ວມມື ລາວ-ຢີ່ປຸ່ນ ICTC, ນະຄອນຫຼວງວຽງຈັນ ໄດ້ຈັດກອງປະຊຸມວຽກງານການຕ່າງປະເທດ ຄັ້ງທີ XIII ພາຍໃຕ້ຄຳຂວັນ “ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ, ຍົກສູງຄວາມສາມາດ, ລັກສະນະນຳໜ້າ ແລະ ຄວາມເປັນເຈົ້າການຂອງພະນັກງານ ໃນຂະແໜງການຕ່າງປະເທດ”. ພາຍໃຕ້ການເປັນປະທານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ໂດຍການໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ອະດີດຮອງນາຍົກລັດຖະມົນຕີ, ມີບັນດາທ່ານລັດຖະມົນຕີ-ຮອງລັດຖະມົນຕີ, ແຂກຖືກເຊີນ ພ້ອມດ້ວຍ ພະນັກງານ-ລັດຖະກອນຂອງຂະແໜງການຕ່າງປະເທດ ເຂົ້າຮ່ວມ ຢ່າງພ້ອມພຽງ.
ໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ລາຍງານໃຫ້ຊາບວ່າ: ກອງປະຊຸມໃນຄັ້ງນີ້ ແມ່ນມີຄວາມໝາຍສໍາຄັນ ສໍາລັບວຽກງານການຕ່າງປະເທດຂອງພັກ-ລັດ ໃນຊຸມປີຕໍ່ໜ້າ ພາຍໃຕ້ສະພາບການໃໝ່. ພ້ອມດຽວກັນນີ້, ກອງປະຊຸມ ຍັງໄດ້ພ້ອມກັນສະຫຼຸບຕີລາຄາ ຜົນການເຄື່ອນໄຫວວຽກງານການຕ່າງປະເທດ ໃນໄລຍະທ້າຍຂອງການຈັດຕັ້ງຜັນຂະຫຍາຍ ມະຕິ IX ຂອງພັກ, ມະຕິຂອງກອງປະຊຸມວຽກງານການຕ່າງປະເທດ ຄັ້ງທີ XII ໃນໄລຍະປີ 2013-2016, ປຶກສາຫາລືເພື່ອກໍານົດແຜນການເຄື່ອນໄຫວວຽກງານການຕ່າງປະເທດ ແຕ່ປີ 2017-2019 ໃນຕໍ່ໜ້າສະພາບການໃນພາກພຶ້ນ ແລະ ສາກົນ ທີ່ມີການຜັນແປຢ່າງເລິກເຊິ່ງ ແລະ ສະຫຼັບ ຊັບຊ້ອນ ແນໃສ່ເພື່ອເພີ່ມທະວີຄວາມເປັນເຈົ້າການຂອງທົ່ວພັກ, ທົ່ວລັດ ແລະ ທົ່ວປວງຊົນ ໃນການຈັດຕັ້ງປະຕິບັດແນວທາງການຕ່າງປະເທດ ທີ່ໄດ້ກໍານົດໄວ້ໃນມະຕິ X ຂອງພັກວາງອອກ ນໍາເອົາຜົນປະໂຫຍດຕົວຈິງ ມາສູ່ປະເທດ ແລະ ສ້າງຄວາມຢູ່ດີກິນດີ ໃຫ້ແກ່ປະຊາຊົນລາວບັນດາເຜົ່າ ຢ່າງທົ່ວໜ້າ.
ໃນໂອກາດເຂົ້າຮ່ວມກອງປະຊຸມວຽກງານການຕ່າງປະເທດ ຄັ້ງທີ XIII ໃນຄັ້ງນີ້, ນາຍົກລັດຖະມົນຕີ ໄດ້ຊີ້ນໍາ ແລະ ເນັ້ນໜັກຂະແໜງການຕ່າງປະເທດເອົາໃຈໃສ່ ຄື: ໃຫ້ເອົາໃຈໃສ່ໃນການຄົ້ນຄວ້າວິໄຈ ກໍ່ຄື ການຕີລາຄາບັນຫາຕ່າງໆ ທີ່ເກີດຂຶ້ນໃນພາກພື້ນ ແລະ ສາກົນ ຢ່າງຖືກຕ້ອງ, ຊັດເຈນ ແລະ ທັນສະພາບການ ເປັນແຕ່ລະໄລຍະ ເພື່ອຮັບປະກັນ ໃຫ້ແກ່ການເປັນເສນາທິການໃຫ້ແກ່ການນຳ ໃນຂັ້ນຂອງຕົນຮັບຜິດຊອບ ເຊິ່ງບາງຂໍ້ມູນ, ບາງເຫດການ, ບາງການຕົກລົງ ແລະ ຕັດສິນບັນຫາ ກໍ່ຕ້ອງໄດ້ຜ່ານການປຶກສາຫາລື, ຂໍທິດຊີ້ນຳ ແລະ ມີຄວາມເປັນເອກະພາບສູງ ຈຶ່ງພ້ອມກັນຈັດຕັ້ງປະຕິບັດ; ການພົວພັນກັບຕ່າງປະເທດ ໃນລະດັບໃດກໍ່ຕາມ ສຳຄັນ ແມ່ນມີສະຕິ, ໃຫ້ກຽດເຊິ່ງກັນ ແລະ ກັນ, ໃຊ້ຄວາມອ່ອນໂຍນ, ທຸ່ນທ່ຽງ, ມີໄຫວພິບ, ສະດຸ້ງໄວ, ຖືກທິດບົນພື້ນຖານການພົວພັນຢ່າງເຄັ່ງຄັດ, ຄຳນຶງເຖິງຜົນປະໂຫຍດລວມຂອງປະເທດ ເປັນຫຼັກ, ພະຍາຍາມເຮັດໃຫ້ບັນຫາໃຫຍ່ກາຍເປັນບັນຫານ້ອຍ ແລະ ເຮັດໃຫ້ບັນຫານ້ອຍ ກາຍບໍ່ມີບັນຫາ ຍິ່ງເປັນການດີ, ບໍ່ອະນຸຍາດອອກນອກແນວທາງຂອງພັກ, ນະໂຍບາຍຂອງລັດ ຢ່າງເດັດຂາດ (ບໍ່ໃຫ້ຜິດເຂວ); ນັກການທູດທຸກຄົນ ຈົ່ງພ້ອມກັນເຮັດໜ້າທີ່ຮັກສາ, ຍົກບົດບາດ ແລະ ຊື່ສຽງຂອງ ສປປ ລາວ ໃຫ້ສູງເດັ່ນຂຶ້ນຢ່າງບໍ່ຢຸດຢັ້ງ.
ແຫຼ່ງຂ່າວ: ກົມປະຊາສຳພັນ ຫສນຍ