ປັດຈຸບັນ ສປປ ລາວ ໄດ້ສຳເລັດການກໍ່ສ້າງ ໂຄງການໄຟຟ້າພະລັງນ້ຳ ແລະ ພະລັງຄວາມຮ້ອນ ທັງໝົດ 42 ໂຄງການ, ມີກຳລັງຕິດຕັ້ງທັງໝົດ 6.300 ເມກາວັດ, ສາມາດຜະລິດພະລັງງານໄຟຟ້າໄດ້ເຖິງ 35 ພັນລ້ານກິໂລວັດໂມງ. ສຳລັບການພັດທະນາ ໂຄງການໄຟຟ້າ ທີ່ກຳລັງກະກຽມ ແລະ ດຳເນີນການກໍ່ສ້າງ ມີທັງໝົດ 53 ໂຄງການ, ຄາດວ່າຈະສຳເລັດພາຍໃນປີ 2020.
ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແຈ້ງໃຫ້ຮູ້ວ່າ: ສະເພາະປີ 2016 ແມ່ນຈະສຳເລັດ 7 ໂຄງການ, ມີກຳລັງຕິດຕັ້ງ 634 ເມກາວັດ, ປີ 2017-2018 ສຳເລັດ 9 ໂຄງການ, ປີ 2019 ມີ 14 ໂຄງການ ແລະ ປີ 2020 ສຳເລັດ 13 ໂຄງການ ເຊິ່ງຈະມີກຳລັງຕິດຕັ້ງທັງໝົດ ປະມານ 8.000 ເມກາວັດ, ຮອດປີ 2020 ສປປ ລາວ ຈະມີໂຄງການໄຟຟ້າ 90 ກວ່າແຫ່ງຢູ່ໃນການຄຸ້ມຄອງ, ມີກຳລັງຕິດຕັ້ງເກືອບ 14 ພັນເມກາວັດ. ພ້ອມກັບການພັດທະນາຂະແໜງໄຟຟ້າແລ້ວ ຍັງມີການຂະຫຍາຍສາຍສົ່ງໄຟຟ້າ ເຊິ່ງມີ 3 ລະດັບຄື: ແຮງສູງ 500 ກິໂລໂວນ, ແຮງກາງ 230 ກິໂລໂວນ ແລະ ແຮງຕ່ຳ 115 ກິໂລໂວນ, ຍາວເກືອບ7.000 ກິໂລແມັດ. ສຳລັບແຮງສູງ 500 ກິໂລໂວນ ຂະຫຍາຍໄດ້ເກືອບ 200 ກິໂລແມັດ ຮອດປີ 2018 ຈະສຳເລັດຕື່ມອີກປະມານ 90 ກິໂລແມັດ ລວມກວ່າ 100 ກິໂລແມັດ, ສາຍສົ່ງ 500 ກິໂລໂວນນີ້ ມີຄວາມສຳຄັນທີ່ສຸດ ເພາະຈະໄດ້ສະໜອງໄຟຟ້າໃຫ້ແຂວງພາກເໜືອ, ພາກກາງ ແລະ ພາກໃຕ້ ຮັບປະກັນການເຊື່ອມໂຍງໄຟຟ້າ ໃຫ້ເປັນລະບົບໃນທົ່ວປະເທດ, ພ້ອມນັ້ນ ຍັງເປັນລະບົບທີ່ເຊື່ອມໂຍງກັບປະເທດເພື່ອນມິດອ້ອມຂ້າງ ເຊັ່ນ: ໄທ, ຫວຽດນາມ, ກຳປູເຈຍ ແລະ ມຽນມາ, ພ້ອມມີແຜນຈະເຊື່ອມໂຍງໄປຍັງປະເທດມາເລເຊຍ ໃນຕໍ່ໜ້າ.
ສ່ວນສາຍສົ່ງລະບົບ 230 ແລະ 115 ກິໂລໂວນ ກໍມີການເຊື່ອມໂຍງໃນທົ່ວປະເທດ ເພື່ອສະໜອງໃຫ້ປະຊາຊົນ ໄດ້ຊົມໃຊ້ຢ່າງທົ່ວເຖິງ ເຊິ່ງປັດຈຸບັນກວມ 85% ຂອງຈຳນວນບ້ານທັງໝົດ ແລະ 92% ຂອງຈຳນວນຄອບຄົວທັງໝົດ. ໃນໄລະ 5 ປີ ຜ່ານມາ ໄດ້ມີການຊີ້ນຳ ນຳພາຈັດຕັ້ງປະຕິບັດ ວຽກງານພະລັງງານ ແລະ ບໍ່ແຮ່ ລວມຍອດການຜະລິດຕະພັນ ທັງໝົດປະມານ 95 ພັນຕື້ກວ່າກີບ, ໃນນັ້ນ ຂະແໜງໄຟຟ້າ 27 ພັນຕື້ກີບ, ຂະແໜງບໍ່ແຮ່ 68 ພັນຕື້ກີບ ເຊິ່ງເປັນມູນຄ່າມະຫາສານເພື່ອປະກອບສ່ວນພັດທະນາ ເສດຖະກິດ–ສັງຄົມຂອງປະເທດ.
ຢ່າງໃດກໍຕາມ ທ່ານລັດຖະມົນຕີ ກະຊວງພະລັງງານ ແລະ ບໍ່ແຮ່ ເຫັນວ່າ ຂະແໜງໄຟຟ້າໄດ້ຂະຫຍາຍຕົວລະດັບ 15% ໃນແຕ່ລະປີ ແຕ່ຂະແໜງບໍ່ແຮ່ຫລຸດລົງ ສະເລ່ຍປະມານ 6% ເນື່ອງຈາກລາຄາແຮ່ຄຳ, ທອງເງິນ, ເຫລັກ ແລະ ແຮ່ທາດຕ່າງໆ ໃນຕະຫລາດໂລກຫລຸດລົງ ແຕ່ຄາດວ່າຈະເພີ່ມຂຶ້ນອີກຮອບ ໃນປີ 2017.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!