ໃນວັນທີ 14 ທັນວາ 2016 ອົງການກວດສອບແຫ່ງລັດ ໄດ້ຈັດພິທີປະກາດແຕ່ງຕັ້ງຫົວໜ້າອົງການກວດສອບປະຈໍາພາກກາງ ( ຜູ້ໃໝ່ ) ຂຶ້ນ, ເຂົ້າຮ່ວມໂດຍ ທ່ານ ນາງ ວຽງທອງ ສີພັນດອນ ກໍາມະການສູນກາງພັກ ປະທານ ອົງການກວດສອບແຫ່ງລັດ, ມີບັນດາແຂກຖືກເຊີນ ພ້ອມດ້ວຍຄະນະ ນໍາອົງການກວດສອບພາກກາງ, ຫ້ອງການ, ບັນດາກົມ, ສູນຝຶກອົບຮົມຂອງອົງການກວດສອບແຫ່ງລັດເຂົ້າຮ່ວມ.
ໃນພິທີ, ທ່ານ ວຽນທອງ ສິງຄໍາພັນ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຂອງສະພາແຫ່ງຊາດ ສະບັບເລກທີ 0144/ຄປຈ ລົງວັນທີ 28 ກັນຍາ 2016 ວ່າດ້ວຍການແຕ່ງຕັ້ງຫົວໜ້າອົງ ການກວດສອບປະຈໍາພາກກາງ ໂດຍຕົກລົງ ແຕ່ງຕັ້ງທ່ານ ອໍາໄພວັນ ພັນທະວົງ ເປັນຫົວໜ້າອົງການກວດສອບປະຈໍາພາກກາງແທນ ທ່ານ ຄໍາຫລ້າ ອຸມາລີ ຫົວໜ້າອົງການກວດສອບປະຈໍາພາກກາງ ໄປຮັບໜ້າທີ່ໃໝ່ຢູ່ ສູນກາງແນວລາວສ້າງຊາດ ຕາມແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 393/ຄຈສພ ລົງວັນທີ 22 ພະຈິກ 2016 ເລື່ອງ ການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່.
ໂອກາດດຽວກັນ, ທ່ານ ນາງ ວຽງທອງ ສີພັນດອນ ກໍໄດ້ເນັ້ນໃຫ້ຫົວໜ້າອົງການກວດສອບປະຈໍາພາກກາງຄົນໃໝ່ ພ້ອມຄະນະ ຈົ່ງເອົາໃຈໃສ່ປະສານສົມທົບກັບການຈັດຕັ້ງທຸກພາກສ່ວນ ເພື່ອພ້ອມກັນປຶກສາຫາລືກັບບັນດາເປົ້າໝາຍກວດສອບ, ບັນດາສະຫາຍຕ້ອງຢຶດໝັ້ນຫລັກການປະຕິບັດລະບອບການລາຍງານ ເພື່ອຂໍທິດຊີ້ນໍານໍາຂັ້ນເທິງຢ່າງເປັນປົກກະຕິ; ສືບຕໍ່ກໍ່ສ້າງພະນັກງານ-ລັດຖະກອນຂອງອົງການກວດສອບປະຈໍາພາກກາງ ຫັນເປັນມືອາຊີບ ເທື່ອລະກ້າວ; ຍົກລະດັບຂີດຄວາມສາມາດໃນການຊີ້ນໍາ-ນໍາພາວຽກງານກວດສອບແຕ່ລະດ້ານ ໃຫ້ມີຄວາມເຂັ້ມແຂງ, ມີຄຸນນະພາບ ແລະ ຫັນເປັນທັນສະໄໝຕາມທິດລວມຂອງອົງການກວດສອບແຫ່ງລັດ.
ຂ່າວ: ສຳນັກຂ່າວສານປະເທດລາວ