ອີງຕາມການລາຍງານຂອງເວັບໄຊຂ່າວປະເທດຈີນລາຍງານໃນຕອນເຊົ້າວັນທີ 12 ທັນວາ 2016 ຜ່ານມາວ່າ ເຈົ້າໜ້າທີ່ກູ້ໄພ ເມືອງສາງງເຕີ໋ ມົນທົນຫູໜານ ໄດ້ຮັບແຈ້ງຈາກເຈົ້າໜ້າທີ່ຕຳຫຼວດວ່າ ເກີດເຫດເດັກນ້ອຍຍິງ ອາຍຸປະມານ 2 ປີ ຫ້ອຍຢູ່ເທິງເຫຼັກກັນຂະໂມຍ ທີ່ອອກມາດ້ານນອກ ບໍລິເວນປ່ອງຢ້ຽມຊັ້ນ 4 ຂອງອາຄານບ້ານພັກ ເຊິ່ງເປັນສະຖານທີ່ອັນຕະລາຍທີ່ສຸດ
ຫຼັງຈາກເຈົ້າໜ້າທີ່ໄປຮອດບ່ອນເກີດເຫດ ໄດ້ພົບເດັກນ້ອຍຍິງຄົນດັ່ງກ່າວ ຕົນໂຕໄດ້ລອດລົງໄປໃນຊ່ອງເຫຼັກທີ່ຕິດຢູ່ບໍລິເວນປ່ອງຢ້ຽມ ໄດ້ຫ້ອຍຄ້າງຢູ່ ແລະໄຫ້ບໍ່ເຊົາ ເພາະຄວາມຕົກໃຈ, ແມ່ຂອງເດັກນ້ອຍໄດ້ເລົ່າວ່າ ເວລານັ້ນລາວມີວຽກຈຳເປັນຕ້ອງອອກໄປນອກ ຈຶ່ງໄດ້ປະໃຫ້ລູກສາວຢູ່ໃນເຮືອນຄົນດຽວ ແຕ່ບໍ່ຄິດວ່າລູກຈະປີນຫຼິ້ນເທິງຮາວເຫຼັກກັນຂະໂມຍປ່ອງຢ້ຽມ ແລະຍັງລອດຫວ່າງເຫຼັກລົງໄປໄດ້ ໂຊກດີທີ່ມີຄົນມາເຫັນແລ້ວ ແຈ້ງເຈົ້າໜ້າທີ່ຕຳຫຼວດ ແລະກູ້ໄພໃຫ້ມາຊ່ວຍ
ທາງເຈົ້າໜ້າທີ່ກໍໄດ້ເວົ້າອອຍເດັກບໍ່ໃຫ້ຢ້ານ ແລະກໍໄດ້ໃຊ້ເສື້ອຄຸມໂຕສ່ວນເທິງຂອງເດັກໄວ້ ແລ້ວໃຊ້ເຄື່ອງຕັດໂລຫະຕັດເຫຼັກທັງສອງດ້ານອອກ, ຂະນະດຽວກັນກໍໄດ້ອູ້ມເດັກ ແລະດັນໂຕເດັກຈາກທາງລຸ່ມໄວ້ ເພື່ອຄວາມປອດໄພ ເຊິ່ງໃຊ້ເວລາຊ່ວຍເຫຼືອເດັກ 10 ນາທີຈຶ່ງອອກມາໄດ້ ແລະຖືກນຳສົ່ງໄປໂຮງໝໍ ເພື່ອກວດຮ່າງກາຍຫຼັງຈາກໄດ້ຮັບການຊ່ວຍເຫຼືອ
ທາງດ້ານເຈົ້າໜ້າທີ່ກູ້ໄພກໍໄດ້ອອກມາເຕືອນທາງພໍ່ແມ່ ວ່າບໍ່ຄວນປ່ອຍໃຫ້ເດັກຢູ່ບ້ານຄົນດຽວ ເພາະອາດເກີດອັນຕະລາຍກັບເດັກໄດ້