ໃນວັນທີ 13 ທັນວາ 2016 ຜ່ານມານີ້ ເປັນວັນຄ້າຍວັນເກີດຂອງທ່ານໄກສອນ ພົມວິຫານ ທາງຄະນະຮັບຜິດຊອບ ພິພິທະພັນໄກສອນ ພົມວິຫານ ກໍໄດ້ຈັດວາງສະແດງ ໃນຫ້ອງປະຊຸມສູນກາງ 401 ຢູ່ເຂດອະນຸສອນສະຖານ ປະທານ ໄກສອນ ພົມວິຫານ ຫລັກ 6 ນະຄອນຫລວງວຽງຈັນ ເພື່ອສະເຫລີມສະຫລອງ ວັນເກີດຂອງປະທານ ໄກສອນ ພົມວິຫານ ຄົບຮອບ 96 ປີ ໃຫ້ມີບັນຍາກາດຄຶກຄື້ນມ່ວນຊື່ນ ເຕັມໄປດ້ວຍຄວາມໝາຍສໍາຄັນໃນປະຫວັດສາດ ເປັນກຽດຕັດແຖບຜ້າຂອງທ່ານ ສຸວັນດີ ສີສະຫວັດ ຮອງຫົວໜ້າຫ້ອງວ່າການສູນກາງພັກ, ຫົວໜ້າຄະນະຮັບຜິດຊອບ ພິພິທະພັນໄກສອນ ພົມວິຫານ ອະດີດຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ແລະ ພະ ນັກງານອາວຸໂສບຳນານເຂົ້າຮ່ວມ.
ຫ້ອງປະຊຸມດັ່ງກ່າວ, ໄດ້ສ້າງຂຶ້ນໃນປີ 1980 ແມ່ນສະຖານທີ່ປະຊຸມ ກົມການເມືອງສູນກາງພັກ, ຄະນະບໍລິຫານງານສູນກາງພັກ, ຄະນະເລຂາທິການສູນກາງພັກ, ປະຊຸມປະສົມລະ ຫວ່າງພັກກັບລັດຖະບານ, ກອງປະຊຸມສະພາລັດຖະມົນຕີ ແລະ ປະຊຸມກ່ຽວກັບອົງການຈັດຕັ້ງມະຫາຊົນ ນອກຈາກນີ້, ປະທານ ໄກສອນ ພົມວິຫານ ຍັງໄດ້ໃຊ້ຫ້ອງປະຊຸມພົບປະກັບແຂກຕ່າງປະເທດ ໂດຍສະເພາະກອງປະຊຸມ 3 ຊາດ ລາວ, ຫວຽດນາມ, ກຳປູເຈຍ.
ຕະຫລອດໄລຍະທີ່ປະທານ ໄກສອນ ພົມວິຫານ ດຳລົງຊີວິດເຮັດວຽກຢູ່ສະຖານທີ່ແຫ່ງນີ້ ແມ່ນໄລຍະເວລາແຫ່ງການທຸ້ມເທ ເຫື່ອແຮງຄວາມຄິດມັນສະໝອງ ແລະບົດຮຽນອັນອຸດົມຮັ່ງມີ ຍັງເປັນບ່ອນຮັກສາໄວ້ແບບຢ່າງອັນໃສແຈ້ງ ທາງດ້ານຄຸນສົມບັດຂອງຜູ້ນຳ ທີ່ມີນ້ຳໃຈເສຍສະຫລະອັນສູງສົ່ງ ມີມານະຈິດປະຕິວັດສຸດກົກສຸດປາຍ, ມີທັດສະນະມະຫາຊົນອັນກວ້າງຂວາງ, ມີຄວາມອົດທົນດຸໝັ່ນປະຢັດ, ສັດຊື່, ປອດໃສ ແລະ ຈົ່ງຮັກພັກດີຕໍ່ຜົນປະໂຫຍດຂອງປະເທດຊາດ.
ຂ່າວ: ລາວພັດທະນາ