ຕາມການລາຍງານຂ່າວຕ່າງປະເທດເມື່ອວັນທີ 14 ທັນວາ 2016 ວ່າ ຄົນອິນເດຍ 12 ຄົນຖືກຈັບ ໃນວັນຈັນ ວັນທີ 12 ທັນວາ 2016 ຜ່ານມາ ເພາະພວກເຂົາປະຕິເສດທີ່ຈະຢືນສະແດງຄວາມເຄົາລົບ ເມື່ອເພງຊາດເລີ່ມຂຶ້ນ ກ່ອນເບິ່ງຮູບເງົາ
ເຫດການດັ່ງກ່າວເກີດຂຶ້ນ ຢູ່ເທດສະການຮູບເງົາໃນເມືອງ Trivandrum ຂອງລັດ ເກຣລະ ຫຼັງຈົບການສາຍຮູບເງົາ ບັນດາຜູ້ທີ່ບໍ່ຢືນສະແດງຄວາມເຄົາລົບຖືກຈັບ ໃນຂໍ້ຫາບໍ່ປະຕິບັດຕາມຕຳສັ່ງຂອງທາງການ ເຊິ່ງກໍ່ຄວາມລຳຄານ ແລະທຳລາຍຄວາມສະຫງົບຂອງຄົນອື່ນ
ສິ່ງທີ່ເກີດຂຶ້ນນັ້ນແມ່ນຜົນມາຈາກ ສານສູງຂອງອິນເດຍ ອອກຄຳສັ່ງໃຫ້ໂຮງຮູບເງົາທຸກໂຮງ ຕ້ອງເປີດເພງຊາດກ່ອນຈະສາຍຮູບເງົາ ເພື່ອໃຫ້ປະຊາຊົນລຸກຂຶ້ນຢືນສະແດງຄວາມເຄົາລົບ ໂດຍພາບທີ່ສາຍຈະເປັນທຸງຊາດຂອງອິນເດຍ, ໃນລະຫວ່າງທີ່ເພງຊາດເປີດຢູ່ ປະຕູຮູບເງົາຈະຖືກປິດ ແລະບໍ່ອະນຸຍາດໃຫ້ໃຜຍ່າງໄປມາ , ເຊິ່ງຄັ້ງນີ້ບໍ່ແມ່ນຄັ້ງທຳອິດ ທີ່ຄົນອິນເດຍຫຼາຍຄົນຖືກຈັບ