ໃນປີ 2016 ນີ້ ສປປ ລາວ ສາມາດສົ່ງອອກເຂົ້າໄປຕ່າງປະເທດ ໂດຍສະເພາະ ຕະຫລາດ ເອີຣົບ , ຕະຫລາດຈີນ ແລະ ອື່ນໆ ໄດ້ຈຳນວນທັງໝົດ 21 ພັນໂຕນ ເຖິງວ່າຈະໄດ້ຮັບຜົນກະທົບຈາກສະພາບດິນຟ້າອາກາດ ເຊັ່ນຝົນທີ່ຕົກຫລ້າຊ້າ.
ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ໄດ້ໃຫ້ສຳພາດໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ປະຈຳປີ 2015 – 2016 ໃນວັນທີ 13 ທັນວາ 2016ນີ້ ຢູ່ ນະຄອນຫລວງວຽງຈັນວ່າ : ຄາດວ່າ ໃນປີ 2017 ທີ່ຈະເຖິງນີ້ ລາວ ຈະສາມາດ ສົ່ງອອກເຂົ້າ ໄປຕ່າງປະເທດໄດ້ຈຳນວນທັງໝົດ 20 ພັນໂຕນ ໂດຍຈະສືບຕໍ່ຈັດຕັ້ງປະຕິບັດ ຊຸກຍູ້ການຜະລິດປຸງແຕ່ງທີ່ທັນສະໄໝ ຕາມມາດຖານກະສິກຳສະອາດ ແລະ ສ້າງມາດຖານໂຮງສີເຂົ້າສະອາດຕາມລະບົບສາກົນ ໃຫ້ສາມາດສ້າງເຄື່ອງໝາຍການຄ້າໃຫ້ເຂົ້າລາວ ເພື່ອສົ່ງເສີມການສົ່ງອອກກັບທີ່ ແລະ ສົ່ງອອກໄປຕ່າງປະເທດໂດຍກົງ ກໍຄື ຈັດຕັ້ງປະຕິບັດບັນດາໂຄງການລົງທຶນຂອງລັດ ຢ່າງມີປະສິດທິພາບ , ປະສິດທິຜົນ , ຍົກສູງປະສິດທິຜົນຂອງການນຳໃຊ້ທຶນ ໂດຍການປະຕິບັດລະບຽບກົດໝາຍ, ວິໄນແຜນການ – ການເງິນຢ່າງເຂັ້ມງວດ.
ສຳລັບປີ 2016 ນີ້ ລາວ ສາມາດຜະລິດເຂົ້າໄດ້ທັງໝົດຈຳນວນ 4 ລ້ານກວ່າໂຕນ ໃນເນື້ອທີ່ຜະລິດເຂົ້າທັງໝົດປະມານເກືອບ 1 ລ້ານເຮັກຕາ
ຂ່າວ: ສຳນັກຂ່າວສານປຫະເທດລາວ