ສຳນັກຂ່າວຕ່າງປະເທດລາຍງານເມື່ອວັນທີ 13 ທັນວາ 2016 ນີ້ວ່າ ທ່ານ ອັນໂຕນິໂອ ກູເຕີເຣດ ອະດີດນາຍົກອະດີດນາຍົກລັດຖະມົນຕີ ຂອງປ໋ອກຕຸຍການ ອາຍຸ 67 ປີ ໄດ້ເຮັດພິທີສາບານຕົນເຂົ້າຮັບຕຳແໜ່ງ ເລຂາທິການໃຫຍ່ສະຫະປະຊາຊາດຄົນທີ່ 9 ເມື່ອວັນຈັນ ວັນທີ່ 12 ທັນວາ 2016ຜ່ານມາ ໂດຍໄດ້ວາງມືເທິງສຳເນົາກົດບັດຂອງສະຫະປະຊາຊາດ ຕໍ່ໜ້າກອງປະຊຸມສະມັດຊາອົງການສະຫະປະຊາຊາດ 193 ປະເທດເປັນສະມາຊິກ
ທ່ານ ກູເຕີເຣດ ຈະເຂົ້າຮັບຕຳແໜ່ງເລຂາທິການສະຫະປະຊາຊາດຄົນໃໝ່ ຕໍ່ຈາກ ທ່ານ ບັນຄີມູນ ອາຍຸ 72 ປີ ຈາກປະເທດເກົາຫຼີໃຕ້ ໃນວັນທີ 1 ມັງກອນ 2017 ນີ້, ເຊິ່ງທ່ານບັນຄີມູນ ກໍຈະສິ້ນສຸດຕຳແໜ່ງໃນທ້າຍເດືອນ ທັນວາ 2016 ນີ້ ເພາະປະຕິບັດພາລະກິດມາໄດ້ 2 ສະໄໝ, ສະໄໝລະ 5 ປີແລ້ວ
ທ່ານ ກູເຕີເຣດ ເຄີຍດຳລົງຕຳແໜ່ງນາຍົກລັດຖະມົນຕີ ຂອງປ໋ອກຕຸຍການ ຕັ້ງແຕ່ປີ 1995-2002 ແລະຍັງເຄີຍດຳລົງຕຳແໜ່ງ ຂ້າຫຼວງໃຫຍ່ເພື່ອຜູ້ລີ້ໄພ ແຫ່ງສະຫະປະຊາຊາດໃນປີ 2005-2015