ຕາມການລາຍງານຂອງສຳນັກຂ່າວຈີນ ເມື່ອວັນທີ 9 ທັນວາ 2016 ຜ່ານມາວ່າ ໜຸ່ມຊ່າງແປງລົດຄົນໜຶ່ງ ຊື່ວ່າ “ຫຍາງ ໄຫ່ຫົວ” ເປີດໂຕລົດທີ່ເຂົາລົງທຶນສ້າງ ແລະຜະລິດຂຶ້ນມາເອງ ຢູ່ເມືອງຝາງເສິງກ່າງ ເຂດປົກຄອງຕົນເອງ ຊົນຊາດກວ່າງຊີ່ຈ້ວງ ທາງພາກໃຕ້ຂອງຈີນ ເຊິ່ງເຂົາໃຊ້ເວລາຫວ່າງໃນການອອກແບບ ແລະສ້າງລົດສະປອດໃນຝັນສຸດຫຼູຄັນນີ້ຂຶ້ນມາ ໂດຍໃຊ້ເວລາ 3 ປີ ດ້ວຍເງິນ 8 ໝື່ນຢວນ
ຕາມການລາຍງານບອກວ່າ ລາວມີປະສົບການໃນການແປງລົດມາດົນເຖິງ 10 ປີ ເຊິ່ງລາວເອງຍັງເປັນຄົນທີ່ຫຼົງໄຫຼໃນເລື່ອງຂອງລົດເປັນພິເສດ ເຊິ່ງໃນປັດຈຸບັນລົດສະປອດຄັນນີ້ ໄດ້ຮັບໜັງສືຮັບຮອງສິດທິບັດການອອກແບບຜະລິດຕະພັນແລ້ວ ຫຼັງຈາກທີ່ໄດ້ຍື່ນຄຳຂໍສິດທິດັ່ງກ່າວ ກັບໜ່ວຍງານທີ່ກ່ຽວຂ້ອງ ແລະຈະເຂົ້າຮ່ວມໃນງານຈັດສະແດງແລກປ່ຽນກ່ຽວກັບລົດນຳອີກດ້ວຍ