ໃນວັນທີ 8 ທັນວາ 2016 ຜ່ານມານີ້ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດ ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ຈູ ຫງອກ ແອັງ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 8-10 ທັນວາ 2016 ນີ້.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະຕີລາຄາສູງຕໍ່ການເດີນທາງມາຢ້ຽມຢາມ ແລະເຮັດວຽກ ຂອງທ່ານ ຈູຫງອກ ແອັງ ພ້ອມດ້ວຍຄະນະໃນຄັ້ງນີ້ ເຊິ່ງເປັນການປະກອບສ່ວນ ສຳຄັນເຂົ້າໃນການເສີມຂະຫຍາຍມູນເຊື້ອ ຄວາມສາມັກຄີແບບພິເສດ ແລະການພົວພັນຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໃຫ້ແຕກດອກອອກຜົນຍິ່ງຂຶ້ນເລື້ອຍໆ.
ພ້ອມດຽວກັນນີ້, ທ່ານ ຈູຫງອກ ແອັງ ກໍໄດ້ສະແດງຄວາມຂອບໃຈຕໍ່ ທ່ານ ທອງລຸນ ສີສຸລິດ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງໄດ້ແຈ້ງການເດີນທາງມາຢ້ຽມຢາມ ແລະ ເຮັດວຽກ ເພື່ອສືບຕໍ່ແລກປ່ຽນບົດຮຽນເຊິ່ງກັນ ແລະກັນ ໃນວຽກງານຕ່າງໆ ລະຫວ່າງ ສອງກະຊວງວິທະຍາສາດ ແລະເຕັກໂນໂລຊີ ລາວ-ຫວຽດນາມ
ຂ່າວ: ສຳນັກຂ່າວສານປະເທດລາວ