ບັນຫາລາຄາຢາງພາລາຕົກຕ່ຳ ສົ່ງຜົນກະທົບພໍສົມຄວນແກ່ຊາວສວນ ຜູ້ເລືອກປູກໄມ້ຊະນິດນີ້ ໂດຍສະເພາະ
ຢູ່ຫຼວງນ້ຳທາ, ພາກລັດແຈ້ງລາຄາຫຼຸດລົງ ຍ້ອນປະລິມານການຕອບສະໜອງທີ່ເພີ່ມຂຶ້ນ ເກີນຄວາມສາມາດຜະ
ລິດ ລວມເຖິງຄຸນນະພາບຂອງຢາງ ສຳລັບການແກ້ໄຂດີແທ້ຄວນລວມກຸ່ມທີ່ໜັກແໜ້ນ ແລະ ມີສັນຍາຜູກພັນ.
ໃນຊຸມປີຜ່ານມາ ຢູ່ປະເທດເຮົາປະຊາຊົນຫຼາຍແຂວງ ແມ່ນໄດ້ພາກັນປູກຢາງພາລາຢ່າງແພ່ຫຼາຍ ຮອດຂະນະນີ້
ຫຼາຍເຂດໄດ້ເກັບກູ້ຜົນຜະລິດ ແຕ່ກໍຫຼີກເວັ້ນບໍ່ໄດ້ການປ່ຽນແປງຂອງລາຄາຕະຫຼາດເຊັ່ນດຽວກັບ ແຂວງຫຼວງນ້ຳ
ທາທີ່ປະຊາຊົນໄດ້ຮຽກຮ້ອງຫາສະພາແຫ່ງແຫ່ງຊາດ ເພື່ອເບິ່ງຄວາມເໝາະສົມລາຄາຢາງພາລາທີ່ມີທ່າອຽງຫຼຸດລົງ.
ຕໍ່ກໍລະນີດັ່ງກ່າວນີ້ ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງອຸດສະຫະກຳ ແລະ ການຄ້າກ່າວວ່າ:
ກ່ຽວກັບບັນຫາລາຄາຢາງພາລາຕົກຕ່ຳໃນແຂວງຫຼວງນ້ຳທາ ຄວາມຈິງທາງພະແນກອຸດສະຫະກຳ ແລະ ການຄ້າ
ແຂວງຫຼວງນ້ຳທາ ໄດ້ອອກແຈ້ງການກຳນົດລາຄາໃນການເກັບຊື້ຢາງພາລາສູງສຸດນຳປະຊາຊົນຂອງ ບັນດາ ບໍລິ
ສັດ ແລະ ໂຮງງານຜະລິດຢາງໃນທົ່ວແຂວງ ສູງສຸດແມ່ນປະມານ 6.700-7.000 ກີບຕໍ່ກິໂລ ສຳລັບວັນທີ 17 ກໍລະ
ກົດ 2014 ໂດຍອີງຕາມຄຸນນະພາບຂອງຢາງແຕ່ລະປະເພດ ເປັນຕົວກຳນົດ ທັງນີ້ກໍເພື່ອເປັນບ່ອນອີງໃຫ້ແກ່ຊາວ
ສວນຢາງສາມາດຕໍ່ລອງກັບບໍລິສັດທີ່ເກັບຊື້ ຮູ້ເຖິງການຂຶ້ນລົງຂອງຢາງພາລາແຕ່ລະໄລຍະ.
ສ່ວນສາເຫດທີ່ເຮັດໃຫ້ລາຄາຢາງພາລາຕົກຕ່ຳ ໃນປະຈຸບັນແມ່ນເກີດຈາກການຜະລິດຢາງມີຫຼາຍກວ່າຄວາມຕ້ອງ
ການຂອງຕະຫຼາດໂລກ ຂະນະດຽວກັນຢູ່ບາງປະເທດເຊັ່ນ: ອິນເດຍ ແລະ ມາເລເຊຍ ມີປະລິມານໃນການເກັບຊື້ຢາງ
ເພີ່ມຂຶ້ນເຮັດໃຫ້ການນຳເຂົ້າຢາງຂອງ ເອີຣົບ ໜ້ອຍລົງ.
ບໍ່ພຽງເທົ່ານັ້ນການທີ່ລາຄາຢາງພາລາຢູ່ແຂວງຫຼວງນ້ຳທາຕົກຕ່ຳ ກໍມີຜົນມາຈາກລັດຖະບານຈີນໃຫ້ ໂຄຕ້າຈຳກັດ
ແກ່ບໍລິສັດຈີນ, ບໍລິສັດເອກະຊົນ ແລະ ຜູ້ປະກອບການທຸລະກິດຂອງລາວບໍ່ໄດ້ຮັບສິດເຂົ້າເຖິງໂຮງງານການຜະລິດ
ດັ່ງນັ້ນ ລາຄາເກັບຊື້ຈິ່ງຂຶ້ນກັບຈີນພຽງຜູ້ດຽວ ໂດຍບໍ່ໄດ້ຄຳນຶງເຖິງຜົນກະທົບຂອງປະຊາຊົນ ອີກດ້ານໜຶ່ງຄຸນນະພາບ
ຂອງຢາງ, ເຕັກນິກການເກັບຮັກສາ ກໍມີສ່ວນເຮັດໃຫ້ຊາວສວນຂາຍບໍ່ໄດ້ຕາມໃຈຕົນເອງ, ທ່ານ ບຸນມີ ມະນີວົງກ່າວ.
ດັ່ງນັ້ນ, ປະຊາຊົນທີ່ມີຄວາມຕັ້ງໃຈໃນອາຊີບນີ້ ມີຄວາມຈຳເປັນທີ່ຕ້ອງໄດ້ລວມກຸ່ມກັນ ເພື່ອໃຫ້ມີການຈັດຕັ້ງທີ່ເຂັ້ມ
ແຂງ ມີຄວາມສາມາດຕໍ່ລອງລາຄາກັບບໍລິສັດເກັບຊື້ ແລະ ມີສັນຍາຜູກພັນສອງສົ້ນລະຫວ່າງຜູ້ຊື້ຂາຍຍິ່ງເປັນການດີ.
ທີ່ມາ: http://www.sedthakid.la/home/khao/19712.html