ສຳນັກຂ່າວ MGR Online ຂອງໄທ ລາຍງານໃນວັນທີ 7 ທັນວາຜ່ານມານີ້ວ່າ ນັກທ່ອງທ່ຽວສາວຊາວອາເມຣິກາ ນາງ ອະເລັກຊານດຣາ ແຟຣຟິວ ໄດ້ອອກມາເປີດເຜີຍກັບສື່ມວນຊົນອາເມຣິກາ ໃນວັນອັງຄານທີ 6 ທັນວາຜ່ານມານີ້ ໂດຍອ້າງວ່າຕົນເອງຖືກມອມຢາ ແລະ ລັກພາຕົວເພື່ອໄປຂົ່ມຂືນ ໃນຂະນະທີ່ກຳລັງຢູ່ໃນຮ້ານກິນດື່ມແຫ່ງໜຶ່ງ ຢູ່ນະຄອນຫລວງບາງກອກ (ກຸງເທບ) ປະເທດໄທ ໂດຍມີກຸ່ມຊາຍສະກັນຊຶ່ງບາງຄົນສວມໃສ່ຊຸດຕຳຫລວດ ເປັນຜູ້ລົງມື.
ຍາດພີ່ນ້ອງຂອງນາງ ແຟຣຟິວ ໄດ້ເລົ່າວ່າ ນາງໄດ້ເດີນທາງໄປທ່ຽວບາງກອກ ປະເທດໄທ ຊຶ່ງພາຍຫລັງທ່ຽວຊົມຕົວເມືອງໃນຕອນກາງເວັນແລ້ວ ຕອນຄ່ຳຂອງມື້ດຽວກັນ ນາງໄດ້ໄປທ່ຽວຫລິ້ນຢູ່ບາແຫ່ງໜຶ່ງ, ແຕ່ໃນຂະນະທີ່ໝູ່ຂອງນາງລຸກໄປຫ້ອງນ້ຳ ແລະ ປ່ອຍໃຫ້ນາງຢູ່ຄົນດຽວ ນາງກໍຮູ້ສຶກມຶນຫົວ ແລະ ໝົດສະຕິໄປທັນທີ ກ່ອນທີ່ຈະມາຮູ້ສຶກຕົວອີກເທື່ອໜຶ່ງ ແມ່ນຖືກມັດມື ແລະ ມັດຕືນ ໃນຫ້ອງປູນທີ່ບໍ່ຮູ້ວ່າແມ່ນຢູ່ບ່ອນໃດ, ຈາກນັ້ນ ໄດ້ມີຊາຍສະກັນໃນຊຸດເຄື່ອງແບບຄ້າຍຕຳຫລວດ ຍ່າງເຂົ້າມາໃນຫ້ອງ ແລະ ພະຍາຍາມຈະຂົ່ມຂືນ ຊຶ່ງນາງໄດ້ຕັດສິນໃຈຕໍ່ສູ້ຄືນ ໂດຍໃຊ້ເກີບສົ້ນສູງຟາດເຂົ້າໜ້າຄົນຮ້າຍ 3 ຄັ້ງ ກ່ອນທີ່ຈະໂດດລົງຈາກລະບຽງຊັ້ນທີ 2 ແລ້ວຫລົບຊ່ອນຢູ່ໃນປ່າຫຍ້າກວ່າ 6 ຊົ່ວໂມງ ຈົນສາມາດລັດລົດແທັກຊີ້ກັບຄືນໂຮງແຮມ ແລະ ຕັດສິນໃຈຂຶ້ນເຮືອບິນກັບຄືນປະເທດທັນທີ ໂດຍບໍ່ກ້າທີ່ຈະແຈ້ງຄວາມຕໍ່ເຈົ້າໜ້າທີ່ ເນື່ອງຈາກບໍ່ສາມາດໄວ້ວາງໃຈໄດ້.
ຕິດຕາມເຮົາທາງFacebook ກົດຖືກໃຈເລີຍ!