ຂປລ. ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ໃນວັນທີ 22 ພະຈິກ 2016 ຜ່ານມານີ້ ເຊິ່ງສະຫາຍເລຂາທິການໃຫຍ່ກໍໄດ້ໂອ້ລົມ ແລະ ໃຫ້ທິດຊີ້ນໍາພະນັກງານການນໍາຫລັກແຫລ່ງ ພາຍໃນແຂວງດັ່ງກ່າວ ແລະ ຍົກໃຫ້ເຫັນບາງດ້ານດັ່ງນີ້: ການຂະຫຍາຍຕົວເສດຖະກິດ-ສັງຄົມ ຕ້ອງຮັບໃຊ້ໃຫ້ແກ່ການແກ້ໄຂບັນຫາຕ່າງໆໃນສັງຄົມນັ້ນ ກ່ອນອື່ນແມ່ນແນໃສ່ຕອບສະໜອງຄວາມຮຽກຮ້ອງຕ້ອງການ ອັນເປັນຟື້ນຖານຂອງປະຊາຊົນເຊັ່ນ: ການກິນຢູ່, ນຸ່ງຖື, ການຮ່ຳຮຽນ, ປິ່ນປົວພະຍາດ, ຍົກລະດັບຊິວິດວັດທະນະທຳ, ຕ້ອງໄດ້ຮັບການແກ້ໄຂ ບັນຫາເລົ່ານັ້ນເປັນຢ່າງດີ ທັງເປັນຈຸດໝາຍຂອງພວກເຮົາ ແລະ ທັງເປັນການສ້າງກຳລັງຍູ້ແຮງໃຫ້ແກ່ການພັດທະນາ. ໃນດ້ານອື່ນໆ, ການແກ້ໄຂບັນຫາສັງຄົມ ຍັງຕ້ອງສອດຄ່ອງກັບຄວາມສາມາດຕົວຈິງ, ບໍ່ແມ່ນວາງອອກຕາມແນວຄິດອັດຕະວິໄສ, ອາລົມຈິດນິຍົມທີ່ເກີນກວ່າຄວາມສາມາດ.
ຈຸດໝາຍຂອງ ລະບອບປະຊາທິປະໄຕປະຊາຊົນ ແມ່ນເພື່ອຄວາມຢູ່ດີກິນດີຂອງຄົນ, ແຕ່ຄວາມຢູ່ດີກິນດີນັ້ນ ບໍ່ແມ່ນຈະໃຫ້ຜູ້ອື່ນ ນຳມາໃຫ້ ຫາກແມ່ນກະໂຕຄົນເປັນຜູ້ສູ້ຊົນເພື່ອສ້າງຂຶ້ນມາດ້ວຍຕົນເອງ, ອີງຕາມທັດສະນະດັ່ງກ່າວ ເພື່ອແກ້ໄຂບັນຫາສັງຄົມໃຫ້ໄດ້ດີ ຕ້ອງປະຕິບັດທິດນຳ (ລັດ ແລະ ປະຊາຊົນພ້ອມກັນເຮັດ), ລັດຄົ້ນຄວ້າ, ປະກາດໃຊ້ ແລະ ຈັດຕັ້ງປະຊາຊົນ ເພື່ອປະຕິບັດນະໂຍບາຍ ແລະ ລະບອບລະບຽບການຕ່າງໆທີ່ວາງອອກ, ປຸກລະດົມປະຊາຊົນ, ສົ່ງເສີມ, ຂະຫຍາຍມູນເຊື້ອອັນດີງາມຂອງວົງຄະນະຍາດ ພ້ອມກັບລັດຕ້ອງເອົາໃຈໃສ່ ແລະ ເບິ່ງແກ້ໄຂບັນຫາຕ່າງໆທາງດ້ານສັງຄົມ. ປະເທດເຮົາປະຈຸບັນ ຍັງມີຫລາຍບັນຫາ ທາງດ້ານສັງຄົມຄົງຄ້າງທີ່ຈະຕ້ອງໄດ້ແກ້ໄຂ ເນື່ອງຈາກວ່າພວກເຮົາມີຄວາມສາມາດ ແລະ ເງື່ອນໄຂຈຳກັດ, ບໍ່ສາມາດແກ້ໄຂໄດ້ທຸກໆບັນຫາໄດ້ພ້ອມໆກັນໃນມື້ໜຶ່ງຍາມດຽວ, ດັ່ງນັ້ນ ຈິ່ງຕ້ອງເລືອກທິດບູລິມະສິດ, ສຸມໃສ່ການແກ້ໄຂຢ່າງຕັ້ງໜ້າ ບັນດາຄວາມຕ້ອງການອັນຮິບດ່ວນກວ່າໝູ່, ພ້ອມດຽວກັນນັ້ນ ກໍ່ຕ້ອງເອົາໃຈໃສ່ຕໍ່ບັນຫາອື່ນອີກ ແລະ ມີມາດຕະການເພື່ອແກ້ໄຂ ຕາມຄວາມສາມາດ, ແຕ່ແນວໃດກໍດີ ກໍຕ້ອງສຸມໃສ່ແກ້ໄຂບັນດາຈຸດສຸມກ່ອນ ເຊັ່ນ: ລະດັບຄວາມຮູ້ຂອງປະຊາຊົນຍັງຕ່ຳ, ໄດ້ກາຍເປັນອຸປະສັກໃນການພັດທະນາ (ຄວນສຸມໃສ່ການສຶກສາ), ຍົກລະດັບຄວາມຮູ້ຂອງປະຊາຊົນ ເປັນການສ້າງກຳລັງຍູ້ແຮງໂດຍກົງ ເພື່ອພັດທະນາເສດຖະກິດ-ສັງຄົມ, ເປັນເສັ້ນທາງເພື່ອສ້າງຖັນແຖວຜູ້ອອກແຮງງານທີ່ມີຄວາມຮູ້, ຄວາມສາມາດ, ຮັບເອົາ ແລະ ນຳໄຊ້ຄວາມກ້າວໜ້າທາງດ້ານວິທະຍາສາດ, ເຕັກໂນໂລຍີ, ບຳລຸງຄວາມຮູ້ວິຊາສະເພາະ ເພື່ອຂະຫຍາຍກຳລັງການຜະລິດ, ຂະຫຍາຍເສດຖະກິດຕະຫລາດ, ຜະລິດວັດຖຸຊັບສິນ ໃຫ້ນັບມື້ນັບອຸດົມຮັ່ງມີ, ຍົກລະດັບ ຊິວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!
