ຫ້ອງການຄຸ້ມຄອງ ແລະ ບໍລິຫານຕົວເມືອງນະຄອນຫລວງວຽງຈັນໄດ້ຈັດກອງປະຊຸມລາຍງານຄວາມຄືບໜ້າການຈັດຕັ້ງປະຕິບັດໂຄງການຄຸ້ມຄອງນ້ຳເປື້ອນຄົວເຮືອນໃນຕົວເມືອງນະຄອນຫລວງວຽງຈັນ, ຊຶ່ງໄດ້ຮັບການສະໜັບສະໜູນ ຈາກອົງການຈັດຕັ້ງສະມາຄົມນະຄອນ ທີ່ໃຊ້ພາສາຝຣັ່ງ (AIMF), ອົງການ SIAAP ແລະ ອົງການນ້ຳແຊນນອກມັງດີ AESN ແລະ ມາຮອດປັດຈຸບັນ ໂຄງການດັ່ງກ່າວ ມີຄວາມຄືບປະມານ 80% ຊຶ່ງຕັ້ງຢູ່ບ້ານນາໄຫ, ເມືອງໄຊເສດຖາ, ໃນມູນຄ່າ 1,22 ລ້ານເອີໂຣ.

ໂຄງການນີ້ມີຄວາມສຳຄັນເພື່ອບໍລິການ ຮັບໃຊ້ສັງຄົມໃນການຫຼຸດພາວະໂລກຮ້ອນແລ້ວ, ຊຶ່ງເປັນນະວັດຕະກໍາໃໝ່ເພື່ອປະຢັດພະລັງງານ ແລະ ສາມາດນໍາມາໝູນໃຊ້ເຮັດປຸຍໄດ້ນຳອີກ, ຊຶ່ງໂຄງການນີ້ຈະເປັນຕົວແບບເພື່ອຜັນຂະຫຍາຍການຈັດຕັ້ງປະຕິບັດໄປສູ່ທ້ອງຖິ່ນອື່ນໆໃນອະນາຄົດອີກດ້ວຍ.

ກອງປະຊຸມດັ່ງກ່າວຈັດຂຶ້ນໃນວັນທີ 5 ທັນວານີ້, ໂດຍມີ ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ, ທ່ານນາງ ອາລີອານນາ ອາເດຊີ ຕົວແທນສະມາຄົມນະຄອນ ທີ່ໃຊ້ພາສາຝຣັ່ງ, ພ້ອມດ້ວຍຜູ້ປະສານງານອົງການ SIAAP, AESN ແລະ ພາກສ່ວນກ່ຽວຂ້ອງເຂົ້າຮ່ວມ

ຂ່າວ: ລາວພັດທະນາ