ທ່ານຫົວໜ້າພະແນກຄຸ້ມຄອງນຳໃຊ້ນ້ຳຊົນລະປະທານ, ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ປັດຈຸບັນທົ່ວປະເທດເຮົາມີໂຄງການຊົນລະປະທານທັງໝົດຫຼາຍກວ່າ 11.600 ແຫ່ງ ແລະ ອາດສາມາດຮັບປະກັນການສະໜອງນ້ຳ ໃຫ້ແກ່ເນື່ອທີ່ການຜະລິດລະດູແລ້ງນີ້ໄດ້ພຽງພໍ, ເນື່ອງຈາກໄດ້ສະສົມນ້ຳແຮ່ໄວ້ໃນອ່າງເກັບນ້ຳຕ່າງໄດ້ພຽງພໍ, ແຕ່ຈະຕ້ອງໄດ້ອອກແຮງບູລະນະປົວແປງຊົນະລະປະທານບາງແຫ່ງ ທີ່ໄດ້ຮັບຜົນກະທົບຈາກໄພທຳມະຊາດ ໃນລະດູຝົນທີ່ຜ່ານມາໃຫ້ດີຂຶ້ນ
ປັດຈຸບັນພາກສ່ວນກ່ຽວຂ້ອງ ກໍໄດ້ກະກຽມແຜນການ ເພື່ອແກ້ໄຂບັນຫາດັ່ງກ່າວແລ້ວ ດ້ວຍການຫັນມານຳໃຊ້ຈັກສູບນ້ຳຈາກຈຸດອື່ນມາທົດແທນ ແລະ ກົມຊົນລະປະທານກໍໄດ້ມອບຈັກສູບນ້ຳ ໃຫ້ບັນດາແຂວງຕ່າງໆໃນທົ່ວປະເທດເພື່ອແຮໄວ້ໃນກໍລະນີສຸກເສີນ, ພ້ອມດຽວກັນນັ້ນພາກສ່ວນກ່ຽວຂ້ອງກໍຍັງມີຈັກສູບນ້ຳຂະໜາດໃຫຍ່ ແລະ ລົດນ້ຳເຄື່ອນທີ່, ເພື່ອກຽມພ້ອມໃຫ້ການຊ່ວຍເຫຼືອໃນກໍລະນີຈຳເປັນອື່ນໆ.
ຂ່າວ: ລາວພັດທະນາ