ງານມະຫາກຳບຸນຊ້າງທີ່ແຂວງໄຊຍະບູລີປີ 2017 ຈະຈັດຂຶ້ນໃນລະຫວ່າງກາງເດືອນກຸມພາໜ້ານີ້ ຂະນະທີ່ອຳນາດການປົກຄອງແຂວງເປີດເຜີຍວ່າຈະມີຊ້າງເກືອບ 70 ເຊືອກເຂົ້າຮ່ວມ ຫຼາກຫຼາຍກິດຈະກຳຊ້າງ ພ້ອມງານວາງສະແດງສິນຄ້າ ແລະສິລະປະວັນນະຄະດີ ທັງນີ້ກໍເພື່ອເປັນການສ້າງຄວາມປະທັບໃຈ ໃຫ້ກັບບັນດາແຂກກໍຄືນັກທ່ອງທ່ຽວ ທີ່ເຂົ້າຊົມຕະຫຼອດງານ ໄດ້ຕິດອົກຕິດໃຈກວ່າຄັ້ງຜ່ານໆມາ.
ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ໃນນາມປະທານຮັບຜິດຊອບການຈັດງານ ໄດ້ຖະແຫຼງຕໍ່ສື່ມວນຊົນໃນທ້າຍອາທິດຜ່ານມາວ່າ: ງານບຸນຊ້າງໄຊຍະບູລີເປັນງານເທສະການບຸນໃຫຍ່ຂອງແຂວງໄຊຍະບູລີ ໄດ້ສ່ອງແສງເຖິງປະຫວັດສາດຄວາມເປັນມາຂອງລາວ ໃນອະດີດ ທີ່ມີຊ້າງຈຳນວນຫຼວງຫຼາຍ ຈົນບໍ່ສາມາດນັບໄດ້, ບັນດາຊ້າງເຫຼົ່ານີ້ ພັດຕິດພັນກັບການດຳລົງຊີວິດ ຂອງປະຊາຊົນລາວ ບັນດາເຜົ່າຈົນໄດ້ຂະໜານນາມປະເທດຕົນເອງວ່າ: ລາວລ້ານຊ້າງ.
ສຳລັບການຈັດງານມະຫາກຳບຸນຊ້າງປີ 2017 ທາງແຂວງຈະໄດ້ຍົກລະດັບຂອງງານບຸນໃຫ້ສູງກວ່າປີກ່ອນໆ ໂດຍຈະເນັ້ນໜັກກິດຈະກຳຫຼັກໆ ຂອງງານບຸນແມ່ນ ຈະມີການສະເເດງຂອງຊ້າງຄຳຮູ້ ໃຫ້ມີຄວາມຫຼາກຫຼາຍຂຶ້ນເມື່ອທຽບໃສ່ຫຼາຍໆຄັ້ງຜ່ານມາ ເພື່ອໃຫ້ບັນດາແຂກທັງພາຍໃນ ແລະຕ່າງປະເທດໄດ້ຮັບຊົມ ມີຄວາມປະທັບໃຈ ແລະເພິ່ງພໍໃຈ.
ສ່ວນກຳນົດງານແມ່ນຈະໄດ້ຈັດຂຶ້ນ ໃນລະຫວ່າງວັນທີ 13-19 ກຸມພາ ແຕ່ມື້ທາງການແມ່ນວັນທີ 17-19 ກຸມພາ 2017 ຊຶ່ງຈະມີຊ້າງເຂົ້າຮ່ວມ 68 ເຊືອກ ໂດຍພາຍໃນງານຈະມີກິດຈະກຳກ່ຽວກັບຊ້າງຫຼາຍລາຍການເຊັ່ນ: ຂະບວນແຫ່ຊ້າງ 68 ເຊືອກ, ປະກວດຊ້າງງາມບາສີສູ່ຂວັນຊ້າງ, ການສະເເດງຝຶກແອບຊ້າງ, ການຈັດງານລ້ຽງຊ້າງ ຫຼື ບຸບເຟຊ້າງ, ການເອົາຊ້າງອາບນ້ຳ, ການສະເເດງຊ້າງຄຳຮູ້, ການບໍລິການຂີ່ຊ້າງ ແລະອື່ນໆອີກຫຼາຍກິດຈະກຳ.
ນອກຈາກກິດຈະກຳ ຂອງຊ້າງຍັງມີ ການໂຄສະນາຂາຍສິນຄ້າປະເພດຕ່າງໆ ຈາກຫຼາຍພາກສ່ວນທັງພາຍໃນ ແລະຕ່າງປະເທດ, ການສະເເດງສິລະປະວັນນະຄະດີຈາກພາຍໃນແຂວງ, ຈາກກອງສິລະປະກອນແຫ່ງຊາດ ແລະກົມກອງຕ່າງໆ ໃນເເຕ່ລະຄືນມີການສະເເດງດົນຕີ ເທິງເວທີຂອງຜູ້ສະໜັບສະໜູນງານບຸນ ແລະພາກສ່ວນອື່ນໆຫຼາຍລາຍການ, ມີການສະເເດງວາງຂາຍຜະລິດຕະພັນ, ອາຫານພື້ນບ້ານທີ່ເປັນເອກະລັກຂອງທ້ອງຖີ່ນຢ່າງຫຼວງຫຼາຍ.
ດັ່ງນັ້ນ, ທ່ານຮອງເຈົ້າແຂວງໄຊຍະບູລີ ຈຶ່ງຂໍເຊີນຊວນບັນດາທ່ານກໍຄື, ນັກທ່ອງທ່ຽວຈາກພາຍໃນ ແລະຕ່າງປະເທດເຂົ້າມາທ່ຽວມາຊົມງານມະຫາກຳບຸນຊ້າງຢູ່ແຂວງໄຊຍະບູລີ ເມື່ອໄດ້ມາ ເຫັນມາຊົມແລ້ວບັນດາທ່ານຄົງຈະຕິດອົກຕິດໃຈ ມີຄວາມປະທັບໃຈໃນງານນີ້ ຫຼາຍກວ່າປີຜ່ານໆມາຢ່າງແນ່ນອນ.
ຂ່າວ: ເສດຖະກິດ-ສັງຄົມ