ເຖິງແມ່ນວ່າ ໂດນັນ ທຣັມ ຍັງເປັນພຽງວ່າທີ່ປະທານາທິບໍດີອາເມລິກາຍັງບໍ່ສາມາດດຳເນີນການໃດໆຕາມທີ່ໃຫ້ໄວ້ໃນການຫາສຽງບໍ່ວ່າຈະເປັນການລົ້ມເລີກຂໍ້ຕົກລົງຮຸ້ນສ່ວນເສດຖະກິດພາກພື້ນປາຊິຟິກ(ທີພີພີ), ການເປີດເຈລະຈາເພື່ອປັບເງື່ອນໄຂຂໍ້ຕົກລົງເຂດການຄ້າເສລີອາເມລິກາເໜືອ(ນາຟຕ້າ)ຫຼືການກຳນົດກຳແພງພາສີສຳລັບການນຳເຂົ້າສິນຄ້າຈາກສປ ຈີນ.

ນັກວິຊາການ ແລະ ນັກວິເຄາະທັງຫຼາຍເຊື່ອວ່າຖ້າຫາກທຣັມດຳເນີນຕາມນັ້ນຈະສົ່ງຜົນໃຫ້ເກີດການລໍຕົວຢ່າງຮຸນແຮງຂອງການຄ້າໂລກຊຶ່ງຈະສົ່ງຜົນເສຍຫາຍໃຫຍ່ຫຼວງຕໍ່ເສດຖະກິດໂລກໂດຍລວມເພາະຕົວຈິງພາວະການຄ້າໂລກໂດຍລວມໃນເວລານີ້ກໍຕົກຢູ່ໃນສະພາບທີ່ບໍ່ຄ່ອຍດີຢູ່ແລ້ວ.
ໄອເອັມເອຟລລະບຸວ່າການຄ້າໂລກຢູ່ໃນສະພາບລໍຕົວຢ່າງໜັກ ອັດຕາສ່ວນການຂະຫຍາຍຕົວລາຍປີນັບຕັ້ງແຕ່ປີ 2012 ເປັນຕົ້ນມາມີພຽງ 3% ເທົ່ານັ້ນເພື່ອໃຫ້ເຫັນຈະແຈ້ງການລໍຕົວໄອເອັມເອຟຊີ້ວ່າລະຫວ່າງປີ 1985-2007 ອັດຕາການຂະຫຍາຍຕົວຂອງການຄ້າໂລກຈະມີມູນຄ່າສະເລ່ຍຄິດເປັນ 2 ເທົ່າຂອງການຂະຫຍາຍຕົວຂອງຕົວເລກຜະລິດຕະພັນພາຍໃນ(ຈີດີພີ)ລວມທັງໝົດຂອງໂລກແຕ່ໃນໄລຍະ 4 ປີທີ່ຜ່ານມາ ອັດຕາການຂະຫຍາຍຕົວທາງການຄ້າໂລກເຮັດໄດ້ດີທີ່ສຸດສະເລ່ຍແລ້ວພໍກັບການຂະຫຍາຍຕົວຂອງຈີດີພີໂລກເທົ່ານັ້ນ.
ພາວະການຄ້າໂລກຍັງສະທ້ອນອອກມາໃຫ້ເຫັນຜ່ານທາງທຸລະກິດເດີນເຮືອສິນຄ້າໂດຍບໍລິສັດການຄ້ານາວີໃຫຍ່ສຸດຂອງຍີ່ປຸ່ນເຊັ່ນ: ນິບປອນ ຢູເຊນ, ມິດຊຸຍ ໂອເອສເຄ ແລະ ຄາວາຊາກິ ໄຄເຊນ ລ້ວນແຕ່ຂາດທຶນທັງໝົດ ແລະ ຄາດວ່າທັງ 3 ບໍລິສັດລວມກັນຈະຂາດທຶນສູງເຖິງ 85 ຕື້ເຢນສຳລັບການດຳເນີນງານໃນປີງົບປະ ມານ 2017 ຊຶ່ງກຳນົດສິ້ນສຸດປີງົບປະມານໃນເດືອນມີນາປີໜ້າ.
ສິງກະໂປເປັນປະເທດທີ່ມີທ່າກຳປັ່ນການຄ້າໃຫ່ຍສຸດແຫ່ງໜຶ່ງຂອງໂລກໃນປີ 2015 ຫຼຸດລົງ 8,7% ແລະ ປີ 2016 ຍັງຫຼຸດລົງອີກ 1,7% ເຊັ່ນດຽວກັບຈີດີພີຂອງສິງກະໂປໃນໄຕມາດ 3 ຂອງປີນີ້ກໍຫົດຕົວເຖິງ 4,1%.
ໃນໄລຍະ 10 ເດືອນທຳອິດຂອງປີນີ້ ຈີນສົ່ງອອກລວມກັນຄິດເປັນມູນຄ່າພຽງ 1,7 ພັນຕື້ໂດລາສະຫະລັດຊຶ່ງຫຼຸດລົງຈາກໄລຍະດຽວກັນຂອງປີທີ່ຜ່ານມາເຖິງ 6,3% ໃນຂະນະທີ່ການນຳເຂົ້າຫຼຸດລົງ 7,5%.
ທ່ານ ທິມ ຄອນດອນ ຫົວໜ້າທິມນັກເສດຖະສາດປະຈຳພາກພື້ນອາຊີຂອງທະນາຄານໄອເອັນຈີລະບຸວ່າເງິນກູ້ດອກເບ້ຍຕໍ່າຫຼັງວິກິດເສດຖະກິດເຮັດໃຫ້ບໍລິສັດຈຳນວນຫຼາຍພາກັນຂະຫຍາຍທຸລະກິດຂອງຕົນເອງໂດຍບໍ່ເບິ່ງກຳລັງຊື້ ສົ່ງຜົນໃຫ້ເກີດ“ຜົນຜະລິດສ່ວນເກີນສະສົມກັນຢູ່ຫຼາຍທົ່ວໂລກ” ໃນເວລານີ້ເຮັດໃຫ້ຈຳເປັນຕ້ອງດິ້ນຣົນຊອກຫາຜູ້ຊື້ຊຶ່ງນັບມື້ນັບຫາຍາກຫຼາຍຂຶ້ນສິ່ງທີ່ເກີດຂຶ້ນຕາມມາຄື“ການທຸ່ມຕະຫຼາດ”ທີ່ຈະນຳໄປສູ່ການປິດກັ້ນທາງການຄ້າໃນຮູບຂອງການກຳນົດກຳແພງພາສີກັນເພີ່ມຫຼາຍຂຶ້ນເພື່ອຕອບສະໜອງຕໍ່ສຽງຮຽກຮ້ອງຂອງຜູ້ບໍລິໂພກທ້ອງຖິ່ນຂອງຕົນເອງ.
ຕົວຢ່າງທີ່ເຫັນໄດ້ຈະແຈ້ງກໍຄືກໍລະນີເຫຼັກຈາກຈີນທີ່ທາງອີຢູຫາກໍຕັດສິນໃຈເອີ້ນເກັບພາສີປ້ອງກັນການທຸ່ມຕະຫຼາດສູງເຖິງ 81,1% ເປັນຕົ້ນ ຫຼືກໍລະນີອາເມລິກາຂຶ້ນກຳແພງພາສີທີ່ນຳເຂົ້າຈາກຈີນ, ອິນເດຍ, ອິຕາລີ,ສ ເກົາຫຼີ ແລະ ໄຕ້ຫວັນ(ສປ ຈີນ)ໃນເດືອນມິຖຸນາທີ່ຜ່ານມາໃນຂະນະທີ່ຈີນກໍ່ກ່າວທຳນອງດຽວກັນກັບສິນຄ້ານຳເຂົ້າຈາກຍີ່ປຸ່ນ, ສ ເກົາຫຼີ ແລະ ເອີຣົບເປັນຕົ້ນຊຶ່ງລ້ວນແຕ່ສົ່ງຜົນກະທົບເຮັດໃຫ້ພາວະການຄ້າໂລກຍິ່ງຢຸດສະງັກ ແລະ ລໍຕົວລົງຫຼາຍຍິ່ງຂຶ້ນໄປອີກນັ້ນເອງ.

ຈາກໜັງສີພິມເສດຖະກິດ-ສັງຄົມ